பாகிஸ்தானுக்கு வழங்கப்படும் ஆயுதங்கள் இந்தியாவுக்கு எதிராக திருப்பிவிடப்படுகிறதா? கண்காணிக்கிறது அமெரிக்கா

புதுதில்லி,

தீவிரவாதிகளை ஒடுக்கும் நடவடிக்கைகளுக்காக பாகிஸ்தானுக்கு
வழங்கப்படும் ஆயுதங்கள் இந்தியாவுக்கு எதிராக பயன்படுத்த
திருப்பிவிடப்படுகிறதா என்பதை அமெரிக்கா கண்காணிக்கிறது என்று அந்த
நாட்டின் பாதுகாப்புத்துறை செயலர் மிஷேல் புளோர்னாய் தெரிவித்தார்.தில்லி வந்துள்ள அவர் நிருபர்களிடம் செவ்வாய்க்கிழமை பேசினார்.தீவிரவாதிகளுக்கு
எதிரான போரில் தமது கூட்டாளியாக பாகிஸ்தானை இணைத்துக்கொண்டுள்ள அமெரிக்கா
பாகிஸ்தான் கோரும் உதவிகளை செய்துவருகிறது. ஆயுதங்கள், நிதி உதவி என அது
வாரி வழங்கி வருகிறது. பாகிஸ்தானுக்கு அமெரிக்கா தரும் ஆயுதங்கள்
இந்தியாவுக்கு எதிராகவே பயன்படுத்தப்படுகிறது. கடந்த கால அனுபவம்
இப்படித்தான் இருந்துள்ளது என இந்தியா தனது தரப்பு கவலையை அமெரிக்காவிடம்
தெரிவித்தபடி உள்ளது.அமெரிக்க தேசிய பாதுகாப்புச்செயலர் ஜேம்ஸ்
ஜோன்ஸ், முப்படைத்தளபதி மைக் முல்லன் ஆகியோர் அண்மையில் இந்தியாவுக்கு
சுற்றுப்பயணமாக வந்தபோது, இதுதொடர்பான கவலையை பாதுகாப்பு அமைச்சர் அந்தோனி
சுட்டிக்காட்டிப் பேசி இது சம்பந்தமாக அமெரிக்கா ஏதாவது ஒன்றை செய்தாக
வேண்டும் என்று வலியுறுத்தினார். அமெரிக்காவிலிருந்து வரும்
ஆயுதங்களை பாகிஸ்தான் குவித்து வைத்துக்கொள்வதால் இந்த பிராந்தியத்தில்
இந்தியா உள்ளிட்ட மற்ற நாடுகளுக்கு அச்சுறுத்தலாகவே இருக்கும் என்றும்
இந்தியா சுட்டிக்காட்டி வருகிறது.அமெரிக்காவும் இந்தியாவின் கவலையை புரிந்துகொண்டுள்ளது. இதுபற்றி நிருபர்களிடம் மிஷேல் புளோர்னாய் தெரிவித்ததாவது:பயங்கரவாதத்துக்கு
எதிரான போருக்கு பயன்படுத்தவேண்டும் என்ற அடிப்படையில் பாகிஸ்தானுக்கு
அமெரிக்கா வழங்கும் ஆயுதங்கள் தமக்கு எதிராக பயன்படுத்தப்படக்க்கூடும்
என்கிற இந்தியாவின் கவலையை மறுக்கவில்லை. பாகிஸ்தானுக்கு போதிய
ஆயுதங்கள் தரும் அதே வேளையில் அந்த ஆயுதங்கள் வேறு நோக்கத்துக்கு
திருப்பிவிடப்படுகிறதா என்பதை அமெரிக்கா கண்காணிக்கிறது. இதுபற்றி
பாகிஸ்தானிடம் விரிவாக பேசியுள்ளோம். பாகிஸ்தானுக்கு எந்த வகை ஆயுதங்களை
கொடுக்கலாம், என்னென்ன கொடுக்கக்கூடாது என்பதில் அமெரிக்கா மிகத் தெளிவாக
உள்ளது. ஆப்கானிஸ்தான் -பாகிஸ்தான் எல்லையில் பதுங்கி பயங்கரவாத
தாக்குதல்களில் ஈடுபடும் தீவிரவாதிகளை ஒழிக்க பாகிஸ்தானுக்கு உதவவேண்டிய
கட்டாயம் அமெரிக்காவுக்கு உள்ளது என்றார் புளோர்னாய்.அல் காய்தா
போன்ற தீவிரவாத அமைப்புகளுக்கு பாகிஸ்தான் நாட்டின் உளவு அமைப்பான ஐஎஸ்ஐ,
உதவுவதாக வெளியாகும் செய்தி பற்றி கேட்டதற்கு அதுபற்றி வெளிப்படையாக பேச
மறுத்த புளோர்னாய், தீவிரவாதம் எந்த வடிவில் வந்தாலும் அதை ஒடுக்குவது
என்பதில் அமெரிக்கா திண்ணமாக உள்ளது என்றார்.லஷ்கர்-இ-தொய்பா,
அல்காய்தா ஆகிய தீவிரவாத அமைப்புகளுக்கு இடையே பிணைப்பு இருப்பது
தெரிகிறது. இவ்வாறு கூட்டு சேர்ந்துகொண்டு பயங்கரவாத செயல்களில் ஈடுபடும்
தீவிரவாத அமைப்புகளுக்கு முடிவு காண்பதில் அமெரிக்கா உறுதியாக உள்ளது
என்றும் புளோர்னாய் தெரிவித்தார். தீவிரவாத அமைப்புகள் தொடர்பான உளவு
தகவல்களை சேகரிக்கவும், வேவு பார்க்கவும், கண்காணிக்கவும் உதவும்படி
பாகிஸ்தான் கோரியது. அதற்காக ஆளில்லாமல் இயங்கும் விமானங்களை அந்த
நாட்டுக்கு வழங்குவது பற்றி அமெரிக்கா பரிசீலிக்கிறது என்றும் அவர்
தெரிவித்தார்.புளோர்னாய், இந்த பயணத்தின்போது பாதுகாப்பு அமைச்சர்
அந்தோனி, தேசிய பாதுகாப்பு ஆலோசகர் சிவசங்கர் மேனன், பாதுகாப்பு செயலர்
பிரதீப் குமார் ஆகியோரை சந்தித்துப்பேசினார். கடல்சார் பாதுகாப்பு,
மனிதாபிமான உதவிகள், பேரிடர் நிவாரணம், பாதுகாப்புத்துறை வர்த்தகம்,
பயிற்சி போன்ற துறைகளில் ஒத்துழைப்பு தொடர்பாக விரிவாக இந்த சந்திப்பில்
விவாதிக்கப்பட்டது என்று புளோர்னாய் தெரிவித்தார்.