கல்லூரி மாணவரை கடத்தி பணம் கேட்ட இருவர் கைது

சென்னை:

வடமாநிலத்தை சேர்ந்த கல்லூரி மாணவனை கடத்தி, சித்ரவதை செய்து,
அவனது பெற்றோரிடம் பணம் கேட்டு மிரட்டிய இரண்டு மாணவர்களை போலீசார் கைது
செய்துள்ளனர். நெற்குன்றம், செல்லியம்மன் நகரில் வசித்து வருபவர் ராகுல்
குமார் (22). உத்திரப்பிரதேச மாநிலம், பாலி மாவட்டத்தைச் சேர்ந்த இவர்,
நெற்குன்றத்தில் தங்கியிருந்து, மதுரவாயலில் உள்ள தனியார் பொறியியல்
கல்லூரியில் எம்.சி.ஏ., மூன்றாம் ஆண்டு படித்து வருகிறார். நேற்று காலை,
உத்திரப் பிரதேசத்தில் உள்ள ராகுலின் தந்தைக்கு போன் செய்த மர்ம நபர்கள்,
ராகுலை கடத்தி வைத்திருப்பதாகவும், 50 ஆயிரம் ரூபாய் பணம் தர வேண்டும்
என்றும் கூறினர்.
ராகுலின் தந்தை, சென்னையில் உள்ள ராகுலின் நண்பர் பிரசாந்த்துக்கு
தகவல் தெரிவித்தார். அவர், மதுரவாயல் போலீசில் புகார் தெரிவித்தார்.
இன்ஸ்பெக்டர் தமிழ்வாணன் தலைமையில் எஸ்.ஐ., ஸ்டாலின் உள்ளிட்ட போலீசார்,
ராகுலின் நண்பர்களிடம் விசாரணை நடத்தினர். விசாரணையில், மர்ம அழைப்பு
முகப்பேரில் இருந்து வந்தது தெரிந்தது. முகப்பேர், ஏரி திட்டம்
குடியிருப்பு பகுதியில் அறை எடுத்துள்ள பீகாரைச் சேர்ந்த அமிதாப் தீபக்
(26) மற்றும் அவரது நண்பர் ராஜ்குமார் (22) ஆகிய இருவரும் சிக்கினர்.
ராகுல் படிக்கும் அதே கல்லூரியில் பல "அரியர்'களுடன் ஆறு ஆண்டுகளாக தீபக்
எம்.பி.ஏ., படித்து வருகிறார். ராஜ்குமார் தனியார் கல்லூரி ஒன்றில்
எம்.பி.ஏ., படித்து வருகிறார். இருவரிடமும் விசாரித்ததில், அவர்கள்
அறையில், கடத்தப்பட்ட ராகுல் குமாரை அடைத்து வைத்திருந்தது தெரிந்தது.
அங்கு சென்று ராகுல் குமாரை மீட்டு, அவரிடம் விசாரித்தனர். தீபக்கும்,
ராஜ்குமாரும் தன்னை கடத்தி வந்து அறையில் அடைத்து வைத்ததாகவும், மது
அருந்தி விட்டு அடிக்கடி அடித்து துன்புறுத்தியதாகவும், தந்தைக்கு போன்
செய்து பணம் கேட்டு மிரட்டியதாகவும் தெரிவித்தார். இதையடுத்து, அமிதாப்
தீபக், ராஜ்குமார் இருவரையும் மதுரவாயல் போலீசார் கைது செய்தனர். போலீசார்
மேலும் விசாரிக்கின்றனர்.