விபத்து நஷ்டஈடு தருவதில் தாமதம் : தமிழக அரசு விரைவு பஸ் ஜப்தி

புதுச்சேரி :

விபத்தில் இறந்தவரின் குடும்பத்தினருக்கு நஷ்ட ஈடு தராமல்
காலம் தாழ்த்தியதற்காக தமிழக அரசு விரைவு பஸ், கோர்ட் மூலம் ஜப்தி
செய்யப்பட்டது.
புதுச்சேரி சித்தன்குடியில் வசித்தவர் அழகானந்தம். இவர், 1995ம் ஆண்டு
நவம்பர் 22ம் தேதி இரவு காரில் தன் குடும்பத்தினருடன் திருப்பதிக்கு
சென்றுவிட்டு புதுச்சேரிக்கு திரும்பிக் கொண்டிருந்தார். வானூர் அருகே
உள்ள திருச்சிற்றம்பலம் கூட்டு ரோட்டை கடந்த போது, எதிரே வந்த தமிழக அரசு
விரைவு பஸ் ஒன்று, கார் மீது மோதியது. இந்த விபத்தில் காரை ஓட்டிவந்த
அழகானந்தம் பலத்த அடிபட்டு இறந்தார். காரில் பயணம் செய்த அவரது மனைவி
செங்கேணியம்மாள் மற்றும் மகன், மகள் காயமடைந்தனர். விபத்தில் இறந்த
அழகானந்தம் சார்பில் அவரது மனைவி செங்கேணியம்மாள், புதுச்சேரி மூன்றாவது
மாவட்ட கூடுதல் நீதிமன்றத்தில் நஷ்ட ஈடு கேட்டு வழக்கு தொடர்ந்தார்.
வழக்கை விசாரித்த நீதிபதி, 91 ஆயிரம் ரூபாய் நஷ்ட ஈடு வழங்க வேண்டுமென்று,
2001ம் ஆண்டு மார்ச் 15ம் தேதி உத்தரவிட்டார். தீர்ப்பு கூறி பல ஆண்டுகள்
ஆகியும் நஷ்ட ஈடு தொகையை அரசு போக்குவரத்து கழக நிர்வாகம் தரவில்லை.
இந்நிலையில் தீர்ப்பு தொகையின் ஒரு பகுதியை மட்டும் போக்குவரத்து கழக
நிர்வாகம் கோர்ட்டில் செலுத்தியது. மீதமுள்ள தொகையை தராமல்
இழுத்தடித்ததால், தீர்ப்பு நிறைவேற்று மனு தாக்கல் செய்யப்பட்டது. மனு
மீது கடந்த மாதம் 29ம் தேதி விசாரணை நடத்திய மூன்றாவது மாவட்ட கூடுதல்
நீதிபதி சித்தார்த்தர், மனுதாரருக்கு ஒரு லட்சத்து 50 ஆயிரம் ரூபாய்
தரவேண்டுமென்றும், இதற்காக அரசு விரைவு பஸ்சை ஜப்தி செய்யுமாறு
உத்தரவிட்டார். இதைத் தொடர்ந்து நேற்று பிற்பகல் புதுச்சேரி புதிய பஸ்
நிலையத்திற்கு வந்திருந்த அரசு விரைவு பஸ்சை கோர்ட் ஊழியர்கள் ஜப்தி
செய்து கோர்ட்டிற்கு கொண்டு வந்தனர்.