பைக் ரேஸ் நடத்திய 18 பேர் கைது

சென்னை :


கடற்கரை சாலையில் பொதுமக்களை அச்சுறுத்தும் வகையில் பைக் ரேசில் ஈடுபட்ட 18 பேர் கைது செய்யப்பட்டனர். பெசன்ட்நகர் பீச்சில் இருந்து மெரினா கடற்கரை வரை சனி மற்றும் ஞாயிறு விடுமுறை நாட்களில் பொதுமக்களை பயமுறுத்தும் வகையில் பைக் ரேஸில் இளைஞர்கள் ஈடுபடுகின்றனர். அவர்கள் சிக்னல்களில் எங்கும் நிற்பதில்லை. ஹாரன் அடித்தபடி, சைலன்சர்களை மாற்றி இரைச்சலுடன் செல்லும் பைக்குகளில் சென்று வந்தனர். பல நேரங்களில் சாலைகளில் செல்பவர்கள் மீது மோதி விபத்துக்குள்ளாகியுள்ளனர். பலர் காயமடைந்துள்ளனர். கடந்த 25ம் தேதி பட்டினப்பாக்கத்தில் இதேபோல தனியார் நிறுவன அதிகாரி ஒருவர் மீது பைக் ரேஸில் ஈடுபட்டவர்கள் மோதியதில், அவர் உயிரிழந்தார். அவரது உடல் உறுப்புகள் தானம் செய்யப்பட்டன.இந்தச் செய்தி, தினகரனில் வெளியானது. அதைத் தொடர்ந்து சனி, ஞாயிறு ஆகிய நாட்களில் பைக் ரேஸில் ஈடுபடுகிறவர்களைப் பிடிக்க துணை கமிஷனர் பெரியய்யா, உதவி கமிஷனர் ஐசக் பால்ராஜ் ஆகியோர் கொண்ட தனிப்படை அமைக்கப்பட்டது. தனிப்படை போலீசார், நேற்று முன்தினம் இரவு அதிரடி சோதனை நடத்தினர்.அதில் பெசன்ட் நகரில் இருந்து மெரினாவுக்கு சிக்னல்களை மதிக்காமல் வேகமாக பைக் ஓட்டி வந்தவர்களை போலீசார் விரட்டிச் சென்று மெரினாவில் மடக்கினர். 12 பைக்குகளில் வந்த 12 பேர் கைது செய்யப்பட்டனர்.அதேபோல, மெரினாவில் பைக் ரேஸில் ஈடுபட்ட 6 பேர் கைது செய்யப்பட்டனர். அவர்களிடம் இருந்து 6 பைக்குகள் பறிமுதல் செய்யப்பட்டன. அதேபோல சனி, ஞாயிறு ஆகிய நாட்களில் தொடர்ந்து சோதனை நடத்த போலீசார் முடிவு செய்துள்ளனர். இதுகுறித்து பொறுப்பு போலீஸ் கமிஷனர் சஞ்சய் அரோரா கூறும்போது, Ôபைக்ரேசில் ஈடுபடும் இளைஞர்கள் கைது செய்யப்பட்டு, நீதிமன்றத்தில் ஆஜர்படுத்தப்படுவார்கள். அவர்கள் மீது இந்திய தண்டனைச் சட்டம் 279(விபத்து ஏற்படுத்துதல்), 184(அச்சுறுத்தும் வகையில் வேகமாக ஓட்டுதல்) என்ற பிரிவுகளின் கீழ் வழக்கு பதிவு செய்யப்படும். குற்றம் நிரூபிக்கப்பட்டால் லைசென்ஸ் ரத்து செய்யப்படும். பெசன்ட் நகர் முதல் மெரினா வரை சாதாரண உடையில் போலீசார் கண்காணிப்பு பணியில் ஈடுபடுத்தப்படுவார்கள்ÕÕ என்றார்.