அக்னீஸ்வரர் கோவிலில் சுவாமி சிலைகள் திருட்டு அர்ச்சகர்கள் உட்பட மூன்று பேர் "சஸ்பெண்ட்'

நாகப்பட்டினம்:

நாகை அருகே பிரசித்தி பெற்ற தொன்மையான அக்னீஸ்வரர் கோவிலில் பழமையான
மூன்று சிலைகள் திருட்டு போனது. இது தொடர்பாக கோவில் அர்ச்சகர்கள் இருவர்,
மெய்க்காப்பாளர் ஆகியோர் சஸ்பெண்ட் செய்யப்பட்டுள்ளனர். நாகை மாவட்டம்
திருப்புகலூரில் பிரசித்தி பெற்ற தொன்மையான அக்னீஸ்வர சுவாமி
சரண்யபுரீஸ்வரர் கோவில் உள்ளது. மூலவராக அக்னீஸ்வரர், தேவியராக
கருந்தாள்குழலி அருள் பாலிக்கின்றனர். திருஞானசம்பந்தர், அப்பர்,
சுந்தரால் பாடல் பெற்ற, அப்பர் முக்தியடைந்த தலம். வேளாக்குறிச்சி ஆதீனம்
கட்டுப்பாட்டில் உள்ளது. கடந்த 2003ம் ஆண்டு மார்ச் 7ம் தேதி கோவிலின்
உட்பிரகாரத்தில் அப்பர் மண்டபம் கட்டுவதற்காக பள்ளம் தோண்டியபோது, 27
பழங்கால சிலைகள் கண்டெடுக்கப்பட்டன. இச்சிலைகள் எந்த நூற்றாண்டை
சேர்ந்தவை, எவ்வகையான சிலை என்று இதுவரை தெரியவில்லை. இது குறித்து
தொல்லியல் துறை அறிக்கைக்காக கோவில் நிர்வாகத்தினர் காத்திருக்கின்றனர்.
கோவிலில் கிடைத்த சிலைகள், ஏற்கனவே கோவிலில் பாதுகாக்கப்பட்டு வரும்
திருக்கண்டீச்சரம் பசுபதீஸ்வரர், ராமநத்தீஸ்வரம் ராமநாத சுவாமி, ஏனங்குடி
திருவாளந்துணையார், ஆதலையூர், திருப்பணையூர் கோவில்களின் 38 சிலைகள்
உட்பட, ஆதீன கோவில்களுக்கு சொந்தமான, 200க்கும் மேற்பட்ட பல்வேறு வகையான
பழங்கால சிலைகளுடன் பாதுகாப்பாக வைக்கப்பட்டு நாள்தோறும் தீபாராதனை
செய்யப்பட்டு வந்தது. கோவிலில் பாதுகாக்கப்பட்டு வரும் சிலைகளுக்கு
தீபாராதனை காட்டுவதற்காக கடந்த 7ம் தேதி கோவில் அர்ச்சகர் சென்றபோது
கண்ணப்பர், சோமாஸ்கந்தர், தசாயுத பூதகனம் சிலைகள் மாயமாகியிருப்பதை கண்டு,
நிர்வாகத்திடம் தெரிவித்தார். கோவில் தரப்பில் திட்டச்சேரி போலீசாரிடம்
புகார் அளிக்கப்பட்டது. கவனக்குறைவாக இருந்ததாக கோவில் அர்ச்சகர் ராமனாத
குருக்கள்(52) சிவராம குருக்கள்(42) மெய்க் காப்பாளர் மணி(59) ஆகியோர்
கோவில் நிர்வாகத்தால் சஸ்பெண்ட் செய்யப்பட்டுள்ளனர். வேளாக்குறிச்சி
ஆதினத்திற்கு சொந்தமான திருச்செட்டாங்குடி, திருமியச்சூர், ராமனாதீஸ்வரம்
ஆகிய கோவில்களில் உள்ள பழங்கால சிலைகள் மற்றும் இன்னும் பிற கோவில்களின்
சிலைகள், 200க்கும் மேற்பட்டவை இக்கோவிலின் உட்பிரகாரத்தில், மூலவர்
சன்னிதிக்கு இடது, வலது புறத்தில் இரும்பு கேட் அமைக்கப்பட்டு
பாதுகாக்கப்படுகிறது.
பிரகாரத்தின் வலது புறத்தில் உள்ள இரும்பு கேட்
நான்கு பூட்டுகள் போடப்பட்டு, அதன் சாவி, மடத்தின் வசம் உள்ள நிலையில்,
இரண்டு பூட்டுகளை உடைத்து, மூன்று சிலைகளை எடுத்துக் கொண்டு அதே
மாதிரியில் புதிய இரண்டு பூட்டுகளை மர்ம நபர்கள் போட்டுச் சென்றுள்ளனர்.
மக்கள் நடமாட்டம்மிக்க கோவிலின் பிரகாரத்திற்குள் பாதுகாப்பாக
வைக்கப்பட்டிருந்த சுவாமி சிலைகளில் மூன்று சிலைகள் மட்டும் திருடு
போயுள்ளது, பக்தர்களை அதிர்ச்சியில் ஆழ்த்தியுள்ளது.