பசியால் சாகும் தேசிய பறவைகள் கண்டுகொள்ளாத வனத்துறை

கமுதி,:

கமுதியில் வனத்துறையின் செயல்பாடால், இந்திய தேசியபறவையான மயில்,
உணவில்லாமல் பசியால் ரோட்டில் செத்து மடியும் அவலம்
தொடர்கிறது.ராமநாதபுரம் மாவட்டத்தில் பெரும் பகுதி கருவேல மரங்களை கொண்ட
காட்டுபகுதியாகவே உள்ளது.இதனால் இங்கு தேசிய பறவைகளும் அதிகம் உள்ளன .
சமீபகாலமாக இப்பகுதியில் வனத்துறையினர் மெத்தனமாக செயல்படும் நிலை உள்ளது.
சில நாட்களுக்கு முன் தண்ணீர் தேடி வந்த மான் வாகனத்தில் அடிபட்டு
இறந்தது. அதிகாலையில் உயிருக்கு போராடிய மானை மீட்க வனத்துறையினர் பல
மணிநேரத்துக்கு பின் வந்ததால், இறந்த நிலையிலே மானை மீட்க முடிந்தது. இதே
போல் சில தினங்களுக்கு முன் கமுதி அருகே மண்டலமாணிக்கத்தில், இரவு
11மணிக்கு தேசிய பறவை ஒன்று மயங்கிய நிலையில் ,நடுரோட்டில்
உயிருக்குபோராடியது. அப்பகுதியைசேர்ந்த மனித உரிமை கழக நிர்வாகிகள்
தண்ணீர் கொடுத்து, கமுதியில் செயல்படும் தீயணைப்புத்துறைக்கு தகவல்
அளித்தனர். உயிருக்கு போராடிய மயிலை தீயணைப்புத்துறையினர் கைப்பற்றினர்.
தம்மால் முடிந்த முதலுதவியை மேற்கொண்டு , வெளியூரில் பணிபுரியும் அரசு
கால்நடை மருத்துவரை அழைத்து வந்து வேண்டிய சிகிச்சை, உணவு வழங்கினர்.
இருப்பினும் அந்த மயில் அதிகாலை மூன்று மணிக்கு இறந்தது. இந்த
சம்பவத்துக்கு மறு நாளும் மேலும் ஒரு மயில் பசியால் இறந்து கிடந்தது.
தண்ணீர் மற்றும் பசியால் இது போல் உயிரினங்கள் இறப்பதை தடுக்க,
வனத்துறையினர் தண்ணீர் தொட்டி , உணவுதானியங்கள் வழங்க முன்வரவேண்டும். இது
போன்று செயல்கள் இனிமேலும் நடைபெறாமல் தடுக்க மாவடட நிர்வாகமும் கடும்
நடவடிக்கை எடுக்க வேண்டும்.