தாதா வெள்ளை குணா கோர்ட்டில் ஆஜர்

புதுச்சேரி:
ஓட்டலில் கைது செய்யப்பட்ட பிரபல தாதா வெள்ளை குணாவை,
பலத்த போலீஸ் பாதுகாப்புடன் நீதிமன்றத்தில் ஆஜர்படுத்தி, சிறையில்
அடைத்தனர். புதுச்சேரி லாஸ்பேட்டையைச் சேர்ந்தவர் வெள்ளை குணா. பிரபல
தாதாவான இவர் மீது, புதுச்சேரி மற்றும் தமிழகத்தில் கொலை, கொள்ளை என
பல்வேறு வழக்குகள் நிலுவையில் உள்ளன. பல மாதங்களாக, புதுச்சேரி மத்திய
சிறையில் இருந்த வெள்ளை குணா சமீபத்தில் ஜாமீனில் வெளி வந்தார். இந்
நிலையில், கடந்த சில தினங்களுக்கு முன் பயங்கர ஆயுதங்களுடன் திரிந்த
நான்கு பேரை கடலூர் போலீசார் கைது செய்து விசாரித்தனர். விசாரணையில்,
வெள்ளை குணாவை கொலை செய்ய ஆயுதங்களை கொண்டு வந்ததாக அவர்கள் வாக்குமூலம்
அளித்தனர். இதற்கிடையே, தன்னை கொலை செய்ய ஆள் அனுப்பிய தமிழக பகுதியை
சேர்ந்த, முக்கிய புள்ளியை தீர்த்துக்கட்ட வெள்ளை குணா முடிவு செய்து,
தனது கூட்டாளிகள் மூலம் "ஸ்கெட்ச்' போட்டதாக தெரிகிறது. இந்த தகவல்
போலீசாருக்கு கிடைத்தது. கருவடிக்குப்பத்தில் உள்ள, தனியார் ஓட்டலில்
பதுங்கியிருந்த தாதா வெள்ளை குணாவை, போலீசார் நேற்று முன் தினம் சுற்றி
வளைத்து பிடித்தனர். அவரிடம் விசாரணை நடத்திய போலீசார், நேற்று காலை பலத்த
பாதுகாப்புடன் நீதிமன்றத்தில் ஆஜர்படுத்த வேனில் அழைத்து வந்தனர். ஜெ.எம்.
கோர்ட் 2ல் நீதிபதி தாமோதரன் முன்னிலையில் ஆஜர்படுத்தி, சிறையில்
அடைத்தனர். நீதிமன்ற வளாகத்தில் பரபரப்பு: வெள்ளை குணாவை கோர்ட்டில்
ஆஜர்படுத்துவதற்காக அழைத்து வந்தபோது, நீதிமன்ற வளாகத்திற்குள் வந்த
இரண்டு பேரை, பாதுகாப்பு பணியில் இருந்த உருளையன்பேட்டை போலீசார்
சந்தேகத்தின் பேரில் பிடித்து விசாரணை நடத்தினர். இருவரும்
தவளக்குப்பத்தைச் சேர்ந்தவர்கள் என்பதும், தங்கள் மீதுள்ள வழக்குக்காக
நீதிமன்றத்தில் ஆஜராக வந்ததாக தெரிவித்தனர். அதை தொடர்ந்து, போலீசார்
இருவரையும் அனுப்பி வைத்தனர். வெள்ளை குணாவை தீர்த்து கட்ட வந்ததாக கருதி,
அவர்களை போலீசார் பிடித்து விசாரித்ததால் பரபரப்பு ஏற்பட்டது.