நெருங்கியது காங். பாதயாத்திரை-பெல்லாரியிலிருந்து ரெட்டி பிரதர்ஸ் ஓட்டம்!

காங்கிரஸ் கட்சியினர் நடத்தி வரும் பாதயாத்திரை பெல்லாரியை நெருங்கி விட்டது. இதனால் பெல்லாரியில் பந்த் நடப்பது போன்ற மயான அமைதி காணப்படுகிறது. வன்முறை வெடிக்கலாம் என அச்சம் நிலவுவதால் ரெட்டி சகோதரர்கள் பெல்லாரியிலிருந்து வெளியேறியுள்ளனர்.

கர்நாடக அரசியலை ஆட்டிப்படைத்து வரும் ரெட்டி சகோதரர்களுக்கு எதிராக அங்கு காங்கிரஸ் கட்சியினர் போர்க்கொடி உயர்த்தியுள்ளனர்

ரெட்டி சகோதரர்கள் மேற்கொண்டு வரும் சட்டவிரோதமான சுரங்கத் தொழிலை ஒழிக்க வேண்டும். அவர்கள் மீது நடவடிக்கை எடுக்க வேண்டும், சிபிஐ விசாரணைக்கு உத்தரவிட வேண்டும் என அவர்கள் கோரி வருகின்றனர்.

ஆனால் ரெட்டி சகோதரர்களால் பிழைப்பு நடத்தி வரும் பாஜக ஆட்சியினரால் இந்தக் கோரிக்கையை ஏற்க முடியவில்லை. இந் நிலையில் எங்களை எதிர்த்து நீங்கள் பெல்லாரிக்குள் நுழைய முடியுமா என்று ரெட்டி சகோதரர்கள் காங்கிரஸ் தலைவர்களுக்கு சவால் விட்டனர்.

இதை உடனடியாக ஏற்றுக் கொண்ட காங்கிரஸ் சட்டமன்றத் தலைவர் சித்தராமையா உடனடியாக பாதயாத்திரையைத் தொடங்கினார்.

இதில் மாநில காங்கிரஸ் தலைவர் தேஷ்பாண்டே, துணைத் தலைவர் சிவக்குமார் உள்பட காங்கிரஸ் எம்எல்ஏக்கள் மற்றும் ஆயிரக்கணக்கான தொண்டர்கள் பங்கேற்றனர்.

ரெட்டி சகோதரர்களுக்கு எதிரான காங்கிரசின் இந்த பாதயாத்திரை பெங்களூரில் தொடங்கியது. கடந்த 15 நாட்களாக நடந்த இந்த யாத்திரை தனது 350 கி.மீ. தூரத்தை நிறைவு செய்து தற்போது பெல்லாரியை நெருங்கி விட்டது. இன்று மாலை பெல்லாரியில் பிரமாண்ட பொதுக்கூட்டம் ஏற்பாடு செய்யப்பட்டுள்ளது.

இதில் காங்கிரஸ் பொதுச் செயலாளர் ராகுல் காந்தியும் பேசுவார் என்று திடீரென அறிவிக்கப்பட்டுள்ளது. இதையடுத்து பெல்லாரியில் கடும் பாதுகாப்பு ஏற்பாடுகள் செய்யப்பட்டுள்ளன.

பெல்லாரிக்குள் காங்கிரஸ் பாதயாத்திரைக் குழுவினர் நுழைந்தவுடன் வன்முறை வெடிக்கலாம் என எதிர்பார்க்கப்படுவதால் 6,000க்கும் மேற்பட்ட போலீஸார் குவிக்கப்பட்டுள்ளனர். கலவரத் தடுப்புப் போலீஸாரும் குவிக்கப்பட்டுள்ளனர்.

வன்முறை மற்றும் கலவரம் மூண்டால் கண்டதும் சுடும் உத்தரவும் பிறப்பிக்கப்படலாம் என்ற எதிர்பார்ப்பு நிலவுவதால் பல பகுதிகளிலும் கடைகள் அடைக்கப்பட்டுள்ளன. பள்ளி, கல்லூரிகளுக்கு விடுமுறை விடப்பட்டுள்ளது. பெல்லாரி முழுவதும் மயான அமைதியும், பதட்டமும் நிலவுகிறது.

ரெட்டி சகோதர்கள் ஓட்டம்:

காங்கிரஸ் பாதயாத்திரை பெல்லாரியை நெருங்கி விட்டதால் முன்னெச்சரிக்கை நடவடிக்கையாக ரெட்டி சகோதரர்கள் பெல்லாரியை விட்டு வெளியேறியுள்ளனர். அவர்களது குடும்பத்தினர் வீடுகளுக்கு பலத்த பாதுகாப்பு போடப்பட்டுள்ளது.

அட அரசியலுல இதெல்லாம் சகஜமப்பா