சென்னை மெட்ரோ ரெயிலுக்கு 168 நவீன பெட்டிகள் தயாரிப்பு

சென்னையில் மொத்தம் 42 மெட்ரோ ரெயில்களை இயக்கும் வகையில் 168 பெட்டிகளை தயாரிக்க திட்டமிடப்பட்டுள்ளது. இதற்கான ஒப்பந்த புள்ளிகள் முடிவு செய்யப்பட்டு ஆல்ஸ்டாம் டிரான்ஸ்போர்ட் எஸ்.ஏ., ஆல்ஸ்டாம் பிராஜக்ட்ஸ் இந்தியா லிமிடெட் ஆகிய நிறுவனங்களுக்கு வழங்கப்பட்டுள்ளது.
சென்னை மெட்ரோ ரெயில் திட்டப்பணிகள் வேகமாக நடந்து வருகின்றன. இதன் மொத்த நீளம் 45 கிலோ மீட்டர். இதில் 21 கி.மீ. சுரங்கப்பாதையாகவும், மீதமுள்ள தூரம் உயர்த்தப்பட்ட பாதையாகவும் அமைக்க திட்டமிடப்பட்டது. தற்போது இதன் மொத்தம் தூரத்தை அதிகரிக்க முடிவு செய்யப்பட்டுள்ளது.

ரூ.14,600 கோடி செலவில் தயாரிக்கப்பட்ட மெட்ரோ ரெயில் திட்டத்தின் ஒரு பாதை திருவொற்றியூரில் இருந்து அண்ணாசாலை வழியாக விமான நிலையம் செல்லும் மற்றொரு பாதை சென்டிரலில் இருந்து அண்ணா நகர், கோயம்பேடு வழியாக விமான நிலையம் வரை செல்லும். 2014-ல் மெட்ரோ ரெயிலை இயக்க திட்டமிடப்பட்டுள்ளது.

மெட்ரோ ரெயிலில் முதல் கட்டமாக 4 பெட்டிகள் இணைக்கப்படும். இதன்படி மொத்தம் 42 ரெயில்களை இயக்கும் வகையில் 168 பெட்டிகளை தயாரிக்க திட்ட மிடப்பட்டுள்ளது. இதற்கான ஒப்பந்த புள்ளிகள் முடிவு செய்யப்பட்டு ஆல்ஸ்டாம் டிரான்ஸ்போர்ட் எஸ்.ஏ., ஆல்ஸ்டாம் பிராஜக்ட்ஸ் இந்தியா லிமிடெட் ஆகிய நிறுவனங்களுக்கு வழங்கப்பட்டுள்ளது.

இந்த ரெயில் பெட்டிகள் துருபிடிக்காத எக்கினால் தயாரிக்கப்படுகிறது. முழுவதும் குளிர்சாதன வசதி கொண்ட இதில் தானாக திறக்கும் கதவு, கண்காணிப்பு கேமரா, நவீன இருக்கைகள் பொருத்தப்படும். ரெயிலில் நிற்கும் அடுத்த ஸ்டேஷனின் பெயரை அறிவிக்கும் டிஜிட்டல் போர்டும் இந்த ரெயில் பெட்டிகளில் இருக்கும்.

இந்த நவீன ரெயில் பெட்டிகளில், மாற்று திறனாளிகள் சக்கர நாற்காலியுடன் பயணம் செய்யவும், அந்த சக்கர நாற்காலியை நிறுத்தி வைக்கவும் முடியும். அவசர கால எச்சரிக்கை வசதியும் உண்டு. ஒரு பெட்டியில் இருந்து மற்றொரு பெட்டிக்கு செல்ல வசதியாக பெரியபாதை இருக்கும்.

இந்த பெட்டிகள் 25 கிலோ வாட் மின் தூரத்தில் இயங்கும். கண்ணை கவரும் வகையில் அழகிய தோற்றத்தில் உருவாகும். இந்த ரெயில் பெட்டிகள் ரூ.1471.3 கோடி செலவில் தயார் ஆகிறது.

4 பெட்டிகள் கொண்ட மெட்ரோ ரெயிலில் ஒரே நேரத்தில் 1276 பேர் பயணம் செய்ய முடியும். பின்னர் பெட்டிகளின் எண்ணிக்கை 6 ஆக அதிரிக்கப்படும். அப்போது பயணிகள் அதிக எண்ணிக்கையில் பயணம் செய்யமுடியும்.
பயணிகள் கூட்டம் அதிகம் இருக்கும் நேரங்களில் 3 நிமிடத்துக்கு ஒரு மெட்ரோ ரெயில் இயக்கப்படும். 80 முதல் 90 கிலோ மீட்டர் வேகத்தில் மெட்ரோ ரெயில் செல்லும் வகையில் நவீன பெட்டிகள் வடிவமைக்கப்பட்டுள்ளன. இந்த அதி நவீன பெட்டிகளை தயாரிக்கும் பணிகள் தொடங்கிவிட்டன.