ஒரே நேரத்தில் 7 படங்களில் நடிக்கும் பூர்ணா

ஒரே நேரத்தில் துரோகி, ஆடுபுலி, அர்ஜூனன் காதலி, நரன், கொலைத் தொழில், வித்தகன் உள்ளிட்ட 7 படங்களில் நடிக்கிறார் நடிகை பூர்ணா.
இதைத்தவிர தெலுங்கு மற்றும் மலையாளத்திலும் இரு படங்களுக்காகப் பேச்சுவார்த்தை நடக்கிறது. கன்னடத்திலும் இவரை அணுகியுள்ளனர்.

ஒரே நேரத்தில் இத்தனை படங்களில் நடிப்பது குறித்து பூர்ணா கூறியதாவது:

ஒரே நேரத்தில் அதிக படங்களில் நடிப்பதால் முன்னணி இடத்துக்கு வந்து விட முடியாது. முன்னணி இடத்துக்கு காலம், நேரம் எல்லாம் கை கூடி வர வேண்டும். படங்களின் வெற்றி மிகவும் முக்கியமானது. தற்போது நடித்து வரும் படங்களின் கதை எல்லாமும் பிடித்திருக்கிறது. குறிப்பாக என் கேரக்டர் நன்றாக வந்திருக்கிறது. அது இல்லாமல் என்னை நம்பி வரும் இயக்குநர்களுக்கு மறுப்பு சொல்ல முடியவில்லை.

என்னை மனதில் வைத்து கதை தயார் செய்திருக்கிறார்கள். அதற்காகவும் ஒப்புக் கொண்டதாகவும் எடுத்துக் கொள்ளலாம். துரோகி படத்தில் முதன் முறையாக டப்பிங் பேசியிருக்கிறேன். இன்னும் சரியான தமிழ் உச்சரிப்பு வரவில்லை. அதற்கான பயிற்சிகளை எடுத்து வருகிறேன். விரைவில் அனைத்துப் படங்களிலும் டப்பிங் பேசுவேன். தமிழைத் தவிர தெலுங்கு மற்றும் மலையாள சினிமாக்களிலும் கவனம் வைத்திருக்கிறேன். எந்த இடத்தில், எந்த நேரத்தில் நமக்கு நல்லது நடக்கும் என சொல்லி விட முடியாது. என் தேர்வு இந்த மூன்று மொழி சினிமாக்களும்தான். எந்தவொரு மொழி சினிமாவிலாவது நான் நிச்சயம் முன்னணி இடத்துக்கு வந்து காட்டுவேன் என்றார்.