உறி உருகினால் உலகம் அழியும்!

நவீன் · நவீன் Sat 7 Aug 2010 - 19:41

200 ஆண்டுகளுக்கு முன்பு... தாராபுரம் அருகே சின்னப்புத்தூர் கிராமத்தில்
வசித்தவர் சாமையங்கார். இவரது மகன் திருமலைசாமி. சிறிய வயதிலேயே இவரிடம்
அரிய சக்தி இருப்பதாக அப்பகுதி மக்கள் நம்பினர். அவர் கையில் எடுக்கும்
மணல் திடீரென சர்க்கரையாக மாறுவதையும், கற்கள் கற்கண்டாவதையும்
பனம்பழங்கள் பலாப்பழமாகவும் மாறுவதையும் பார்த்து அசந்துபோயினர். அவரை
‘பகவான்’ என்றே அழைக்க ஆரம்பித்தனர். நாடி வரும் பக்தர்களுக்கு ஒரு பிடி
சர்க்கரையைத்தான் பிரசாதமாக வழங்குவார்.

திடீரென ஒரு நாள்.
‘தேவலோகத்துக்கு என்னை அழைத்துப்போக தேவ கணங்கள் வருகிறார்கள். மறைந்ததும்
மீண்டும் பூமிக்கு வருவேன். அப்போது நான் சொன்னதெல்லாம் நடக்கும்’ என்று
சொன்னவர், திடீரென மறைந்துவிட்டார். மறைவதற்கு சில நாட்களுக்கு முன்பு,
அருகே உள்ள சீலநாயக்கன்பட்டியில் தனது பக்தர் சீரங்க கவுண்டர் வீட்டில்
உறி ஒன்றை கட்டி வைத்திருந்தார் ‘பகவான்’. அதில் ஒரு மண் சட்டியில் எதையோ
வைத்து, அதன் மீது மற்றொரு மண் சட்டியை வைத்து மூடி உறியை கட்டி
தொங்கவிட்டுள்ளார். ‘இந்த உறி உருகும் நாளில் உலகம் அழியும். அப்போது
மீண்டும் வருவேன். அப்போது பூமி முழுவதும் கணுக்கால் அளவு மனித
எலும்புகளும், முழங்கால் அளவு புல்லும் மட்டுமே இருக்கும்’ என்று
கூறியுள்ளார்.

சீரங்கர் வீட்டில் அவர் கட்டிவைத்த உறியை அவரது
தலைமுறையினர் தொடர்ந்து பூஜித்து வருகின்றனர். 5 தலைமுறையாக அந்த உறிக்கு
இப்போது வரை பூஜை நடந்து வருகிறது. சீரங்கர் குடும்பத்து வாரிசான
திருமலைசாமி என்பவர் தற்போது பூஜை செய்து வருகிறார். “200 ஆண்டுகள்
ஆகிறது. ஆனாலும், பகவான் வைத்த உறி இப்போதும் பழுதில்லாமல் இருக்கிறது.
பகவானின் சக்திக்கு இதுவே உதாரணம். உறி உருகக்கூடாது என வேண்டி இப்போதும்
வழிபட்டு வருகிறோம்” என்று உணர்ச்சி மேலிடச் சொல்கின்றனர் சீரங்க கவுண்டர்
வம்சாவளியினர்.

பகவான் சொன்னதுபோல உறி உருகியதும் உலகம்
அழிந்துவிடுமோ என்ற பீதி அப்பகுதி மக்களிடம் உள்ளது. உறியில் உள்ள மண்
சட்டியில் என்ன உள்ளது? உருகிவிடும் என்று பகவான் சொன்னது எதை? அவர்
எழுதிவைத்தவை எங்கு இருக்கின்றன? யாரிடம் இருக்கின்றன? என்ன
எழுதிவைத்தார்? அவர் சொன்னதுபோல உண்மையிலேயே உலகம் அழிந்துவிடுமா? விடை
தெரியாத கேள்விகள் பட்டியல் நீண்டுகொண்டே போகிறது.