மூளைக் காய்ச்சலை கட்டுப்படுத்த உதவும் மூலிகை

ஊட்டி:

ஊட்டி அருகே எமரால்டில் உள்ள மத்திய அரசு மூலிகை பண்ணையில்,
மூளைக்காய்ச்சலை கட்டுப்படுத்த உதவும் "அட்ரோபா பெலடோனா' என்ற மூலிகைச்
செடியை அதிகளவில் வளர்க்க முடிவு செய்யப்பட்டுள்ளது.
கிழக்காசிய
நாடுகளில் ஆண்டுதோறும் 50 ஆயிரம் பேர் மூளைக்காய்ச்சல் நோயால்
பாதிக்கப்படுகின்றனர். இதில், 10 ஆயிரம் பேர் போதிய சிகிச்சை கிடைக்காமல்
இறந்து விடுகின்றனர். இதில், 30 சதவீதம் பேர் குழந்தைகள் என்பது
அதிர்ச்சியான விஷயம். இதன் காரணமாக, மூளைக் காய்ச்சல் வராமல் இருக்கவும்,
வந்தால் முழுமையாக குணமாக்கவும் அலோபதி, ஓமியோபதி, ஆயுர்வேத மருத்துவ
முறைகளில் பல்வேறு ஆராய்ச்சிகள் நடந்து வருகின்றன. ஓமியோபதி மருத்துவ
ஆராய்ச்சியில், "அட்ரோபா பெலடோனா' என்ற மூலிகைச் செடியின் மூலம், மூளைக்
காய்ச்சலை கட்டுப்படுத்த முடியும் என முதற்கட்ட ஆராய்ச்சியில்
தெரியவந்துள்ளது. இதை, கோல்கட்டாவில் உள்ள மத்திய ஓமியோபதி மருத்துவ
மூலிகை ஆராய்ச்சி மைய இயக்குனர் ஜெனரல் டாக்டர் சத்ரு நாயக் தலைமையிலான
குழுவினர் நிரூபித்துள்ளனர். இத்தகைய சிறப்பு வாய்ந்த மூலிகைச்செடி குளிர்
வாசஸ்தலங்களில் மட்டுமே நன்றாக வளரும் என்பதால், அதை ஊட்டி அருகே எமரால்டு
பகுதியில் மத்திய அரசின் கீழ் செயல்படும் மூலிகை பண்ணையில் வளர்க்க முடிவு
செய்யப்பட்டுள்ளது. இதற்கான துவக்கப் பணிகள் இந்த மூலிகை பண்ணையில் நடந்து
வருகின்றன. இது குறித்து மூலிகை பண்ணை நிர்வாகி டாக்டர் ராஜன் கூறியதாவது:
மூளைக்காய்ச்சலை கட்டுப்படுத்த பயன்படும் "அட்ரோபா பெலடோனா' என்ற மூலிகைச்
செடி யூரேசியாவை தாயகமாக கொண்டது. முன்பு, ஊட்டியில் இருந்த "சின்கோனா'
மூலிகை பண்ணையில் இந்த மூலிகைச் செடிகள் வளர்க்கப்பட்டன. அந்த மூலிகை
பண்ணை மூடப்பட்ட பின், இந்த செடிகள் வளர்க்கப்படவில்லை. தற்போது, இத்தகைய
சிறப்பு வாய்ந்த மூலிகைச் செடிகளை எங்கள் பண்ணையில் அதிகளவில் வளர்க்க
மத்திய அரசு நடவடிக்கை எடுத்துள்ளது. இந்த பண்ணையில் முக்கியமான 80
மூலிகைச் செடிகள் வளர்க்கப்படுகின்றன. இவை ஒவ்வொன்றும் ஒவ்வொரு சிறப்பு
தன்மையை கொண்டதாகும். மூளைக்காய்ச்சலை கட்டுப்படுத்தும் இந்த மூலிகையில்
உள்ள "அட்ரோபின்' என்ற அமிலத்தன்மை, இந்த ஆராய்ச்சியில் முக்கியத்துவம்
பெற்றுள்ளது,'' என்றார்.