திருச்சியில் ஆக. 13-ல் உணவுத் திருவிழா தொடக்கம்

திருச்சி,

திருச்சி டிராவல் பெடரேஷன் சார்பில் உணவுத் திருவிழா திருச்சியில் வருகிற
13-ம் தேதி தொடங்கவுள்ளது. இந்தத் திருவிழா மூன்று நாள்கள் நடைபெறும். இதுகுறித்து சங்கத் தலைவர் வி. வாசுதேவன் புதன்கிழமை நிருபர்களிடம் தெரிவித்தது:
"இந்தத் திருவிழாவில் நட்சத்திர தகுதி பெற்ற ஹோட்டல்கள் உள்பட 10 முன்னணி
ஹோட்டல்கள், சுமார் 10 உணவகங்கள், 3 கேட்டரிங் கல்லூரிகள், 2 பேக்கரிகள்,
இதர உணவு சம்பந்தப்பட்ட 5 நிறுவனங்கள், 3 சுற்றுலா முகமைகள் ஆகியவை
அரங்குகள் அமைக்கவுள்ளன. திருச்சியில் இதுவரை இத்தனை ஹோட்டல்கள்,
உணவகங்கள் இணைந்து ஒரே இடத்தில் இதுபோன்ற விழாவை நடத்தியதில்லை.
இதையொட்டி, வருகிற 13-ம் தேதி மாலை 4.30 மணிக்கு ஆண்களுக்கும்,
பெண்களுக்கும் தனித்தனியாக உணவு உண்ணும் போட்டி நடைபெறவுள்ளது. வருகிற 14-ம் தேதி இல்லப் பெண்களுக்காகச் சிற்றுண்டி வகைகள், 15-ம் தேதி இனிப்பு வகைகள் சமைக்கும் போட்டிகள் நடத்தப்படவுள்ளன.
சமையல் கலை நிபுணர் தாமு தலைமையில் சிறந்த போட்டியாளர் தேர்வு
செய்யப்பட்டு, அவருக்குப் பரிசு அளிக்கப்படவுள்ளது. மேலும், காவிரிக்கரை
உணவுகள் என்ற செய்முறை நிகழ்ச்சியும் நடைபெறவுள்ளது. தவிர, 3
நாள்களிலும் மாலை 6 மணிக்கு காய், கனி செதுக்கும் கலையின் செய்முறை
விளக்கங்கள் அளிக்கப்படவுள்ளன. மழலையரை மகிழ்வூட்டும் வகையில் குழந்தைகள்
விளையாட்டரங்கம் அமைக்கப்படவுள்ளது. மேலும், பாவைக் கூத்து உள்ளிட்ட கலை
நிகழ்ச்சிகளும் நடைபெறவுள்ளன. நாள்தோறும் இரவு 9.30 மணிக்கு
விழாவுக்கு வருகை தரும் குடும்பங்களிலிருந்து குலுக்கல் முறையில்
தேர்ந்தெடுக்கப்படும் அதிர்ஷ்டசாலி தம்பதிக்கு திருச்சியிலிருந்து சென்னை
அல்லது கொழும்பு சென்று வருவதற்கான விமான பயணச் சீட்டு பரிசாக
வழங்கப்படும்' என்றார் வாசுதேவன். பேட்டியின்போது கூட்டமைப்புச்
செயலர் கே. மீனா, பொருளாளர் ரத்னகுமார், ஏர் இந்தியா நிறுவன நிலைய மேலாளர்
டி.ஹெச். ராதாகிருஷ்ணன், ஜென்னீஸ் அகாதெமி முதல்வர் பொன். இளங்கோ ஆகியோர்
உடனிருந்தனர்.