மினசோட்டாவில் வாழையிலையில் மாபெரும் தமிழர் உணவுத் திருவிழா!

**krishnaamma** · **krishnaamma** Wed May 06, 2015 10:37 pm

மாபெரும் தமிழர் உணவுத்திருவிழாவினை கடந்த எப்ரல் 12ம் நாள் மினசோட்டா தமிழ்ச் சங்கமும், மினசோட்டா தமிழ்ப் பள்ளியும் இணைந்து வெகுச் சிறப்பாக நடத்தியது. தயாரிக்கப்பட்ட 26 தமிழக உணவு வகைகள் அனைத்தும் மதிய வேளையில் ஹாப்கின்ஸ் பள்ளிக்கு கொண்டுவரப்பட்டது. அறுசுவை உணவுகள் தன்னார்வலர்களால் தயாரிக்கப் பட்டிருந்தது.

தமிழர் விருந்தோம்பும் முறைப்படி உணவைப் பரிமாற வாழையிலையும் சுத்தம் செய்து கொண்டு வரப்பட்டிருந்தது. இளையராசாவின் இன்னிசைப் பாடல்கள் ஒலிக்க இனிதே உணவுத் திருவிழா ஆரம்பமாகியது! குழந்தைகளுக்கும், பெரியவர்களும், புது மணத்தம்பதிகளும், இளைஞர்களும் மினசோட்டாவில் வாழையிலையில் உணவு பரிமாறப்பட்டிருப்பது கண்டு மகிழ்ச்சி ஒவ்வொருவர் முகத்திலும் தெரிந்தது.

சுவை மிகுந்த உணவினை ருசித்து மகிழ்ந்து ஏற்பாடு செய்த அனைவரையும் பாராட்டிச் சென்றனர். நம்ம ஊரு பெட்டிக்கடை ஒன்று மதுரை மல்லி, கடலை மிட்டாய், மாங்காய் சீவல், குளிர்ந்த சுவையூட்டப்பட்ட தயிரு, சூடான மசாலா டீ, வார பத்திரிக்கையுடன் அமர்க்களமாக வடிவமைக்கப் பட்டிருந்தது.

உணவு உண்டு சென்றவர்கள் பெட்டிக்கடையிலும் பொருட்களை வாங்கியபடி உள்ளப் பூரிப்போடு சென்றனர். மினசோட்டா மாநிலத்தில் அங்கீகரிப்பட்ட ஒரே தமிழ்ப் பள்ளி என்ற சான்றினைப் பெற்ற மினசோட்டா தமிழ்ச்சங்க பள்ளியின் ஆண்டுவிழா அதன் பின் தொடர்ந்து நடைபெற்றது. மாணவர்களின் திறனை வெளிப்படுத்தும் கலை நிகழ்சிகளும் சிறப்பாக நடைபெற்றது.

தினகரன்