ரயில்கள் மோதலை தடுக்கும் கருவி: தெற்கு ரயில்வேயில் விரைவில் அறிமுகம்

புது தில்லி,

ரயில்கள் மோதிக் கொள்வதைத் தடுக்கும் கருவி, தெற்கு ரயில்வேயில் சோதனை
அடிப்படையில் விரைவில் அறிமுகம் செய்யப்படும் என்று ரயில்வே இணை அமைச்சர்
இ. அகமது தெரிவித்தார்.இது குறித்து மாநிலங்களவையில் வெள்ளிக்கிழமை அவர் கூறியதாவது:ரயில்கள்
மோதி விபத்துக்குள்ளாவதைத் தடுக்கும் வகையில் ரயில் மோதல் தடுப்பு கருவியை
கொங்கண் ரயில்வே வடிவமைத்தது. வடகிழக்கு எல்லை ரயில்வேயில் 1,736
கி.மீட்டர் வழித்தடங்களில் இக் கருவி சோதனை செய்யப்பட்டு வருகிறது.இதை
பயன்படுத்துவதன் மூலம் கிடைத்த அனுபவத்தின் அடிப்படையில் இக் கருவியின்
செயல்திறன், நம்பகத்தன்மையை அதிகரிக்கும் வகையில் சில மாற்றங்கள்
பரிந்துரைக்கப்பட்டுள்ளன. அந்த மாற்றங்களை கொங்கண் ரயில்வே அக்டோபருக்குள்
செய்து முடிக்கும் என்று தெரிகிறது. புதிய கருவி அறிமுகப்படுத்தப்பட்ட
பின்னர், தெற்கு ரயில்வே, தென்மத்திய ரயில்வே, தென்மேற்கு ரயில்வே ஆகிய 3
மண்டலங்களில் 1,600 கி.மீ. வழித்தடத்தில் கருவி சோதித்து பார்க்கப்படும்.
இந்த மண்டலங்களில் வெற்றிகரமாக செயல்படுவதைப் பொறுத்து நாடு முழுவதும் இக்
கருவி அறிமுகப்படுத்தப்படும்.ரயில்வே நிலம் குத்தகை: நாடு
முழுவதும் ரயில்வேக்கு சொந்தமாக 10.65 லட்சம் ஏக்கர் நிலம் உள்ளது.
இப்போதைய பணிகள் மற்றும் எதிர்கால பணிகளுக்காக இதில் 90 சதவீத நிலத்தை
ரயில்வே பயன்படுத்துகிறது. தேவைப்படாத 1.13 லட்சம் ஏக்கர் நிலத்தை
வர்த்தகரீதியில் பயன்படுத்திக் கொள்ள திட்டமிடப்பட்டுள்ளது.இதற்காக
ரயில் நிலம் மேம்பாட்டு ஆணையம் அமைக்கப்பட்டுள்ளது. 30 முதல் 45
ஆண்டுகளுக்கு நிலம் குத்தகைக்கு விடப்படும். இதுவரை 3,761 ஏக்கர் அடங்கிய
135 இடங்கள் மேம்பாட்டு ஆணையத்திடம் ஒப்படைக்கப்பட்டுள்ளன.ரயில்களில்
மருத்துவ வசதி: முன்னோடித் திட்டமாக அனைத்து துரந்தோ ரயில்களிலும் ஒரு
டாக்டர், ஒரு செவிலியர் நியமிக்கப்பட்டுள்ளனர். இதுதவிர, அனைத்து
ரயில்களிலும் முதலுதவி பெட்டிகள் வைக்கப்பட்டுள்ளன. ஆபத்து
காலத்தில் பணிகளுக்கு முதலுதவி அளிக்க ரயில் கண்காணிப்பாளர், டிக்கெட்
பரிசோதகர்கள் உள்ளிட்ட அதிகாரிகளுக்கும் பயிற்சி அளிக்கப்பட்டுள்ளது.தேவைப்பட்டால்
வழியில் உள்ள ரயில் நிலையங்களில் ரயில் நின்று செல்லவும்
அனுமதிக்கப்பட்டுள்ளது. ரயில் நிலையங்களைச் சுற்றியுள்ள பகுதிகளில்
இருக்கும் அரசு, தனியார் மருத்துவமனைகள் குறித்த விவரம் அனைத்து ரயில்
நிலைய அதிகாரியிடம் உள்ளன. இது அவசர காலத்தில் உதவிகரமாக இருக்கும்.மாற்றுத்திறனாளிகளுக்கு வசதிகள்:2009-10
ஆம் ஆண்டில் முன்பதிவுள்ள ரயில் பெட்டிகளில் மாற்றுத்திறனாளிகள்,
பக்கவாதத்தால் பாதிக்கப்பட்டோர் 9.84 லட்சம் பேர் சலுகை கட்டணத்தில் பயணம்
செய்துள்ளனர். சக்கர நாற்காலி பயன்படுத்தும் மாற்றுத்
திறனாளிகளுக்கு வசதியாக கழிப்பறை வசதியுடன்கூடிய பிரத்யேக ரயில் பெட்டிகளை
ரயில்வே தயாரித்து வருகிறது.ரயில் நிலையங்களில் மாற்றுத்
திறனாளிகளுக்காக சக்கர நாற்காலிகள் வைக்க ஏற்கெனவே உத்தரவிடப்பட்டுள்ளது.
முக்கிய ரயில் நிலையங்களில் மாற்றுத் திறனாளிகள் மற்றும் முதியோருக்காக
இலவச பேட்டரி வாகனங்கள் இயக்கப்படுகின்றன. மாற்றுத் திறனாளிகளுக்காக
பேட்டரி வாகனங்கள் இயக்கப்படுகின்றன. மாற்றுத் திறனாளிகள்
நடைமேடையில் ஏறி, இறங்கவும், நடைமேடை மாறுவதற்கும் வசதியாக நடைமேடையின்
இரு புறமும் சரிவுப்பாதை உள்ளது என்றார் அமைச்சர் இ.அகமது.