12 லட்சம் ஆசிரியர்கள் தேவை: கபில் சிபல்

புது தில்லி,

நாடு முழுவதும் 12 லட்சம் ஆசிரியர் பணியிடங்கள் காலியாக உள்ளதாகவும்,
அவற்றை நிரப்ப அந்தந்த மாநில அரசுகள் நடவடிக்கை எடுக்க வேண்டும் என்றும்
மத்திய மனிதவள மேம்பாட்டுத் துறை அமைச்சர் கபில் சிபல் கேட்டுக் கொண்டார். மாநிலங்களவையில் வெள்ளிக்கிழமை அவர் மேலும் கூறியதாவது:
பிகாரில் 2,68,841 ஆசிரியர் பணியிடங்கள் உள்ளன. அவற்றில், 1,00,696
ஆசிரியர்கள் மட்டுமே நியமிக்கப்பட்டுள்ளனர். மீதமுள்ள பணியிடங்கள்
இன்னமும் காலியாக உள்ளன. இதேபோல் நாடு முழுவதும் 12 லட்சம்
ஆசிரியர்கள் பற்றாக்குறை நிலவுகிறது. ஆனால், சம்பந்தப்பட்ட மாநிலங்கள்
ஆசிரியர் பணியிடங்களை நிரப்பாமல் உள்ளது ஏன் என்று தெரியவில்லை.
பெரும்பாலான பள்ளிகளில் ஒரே ஒரு ஆசிரியர் மட்டுமே பணியில் உள்ளார்.
ஐக்கிய ஜனதா தளம்- பாஜக கூட்டணி ஆளும் பிகார் மாநிலத்தை மட்டும்
குறிப்பிட்டு பேசுவதாக நினைக்க வேண்டாம். காங்கிரஸ் ஆளும் ராஜஸ்தான் மாநில
புள்ளி விவரத்தையும் அளிக்க தயாராக உள்ளேன். மாநில அரசுகள்
பி.எட்., எம்.எட்., ஆசிரியர் பயிற்சி கல்லூரிகளை அதிக எண்ணிக்கையில்
தொடங்க வேண்டும். அப்போதுதான் போதுமான ஆசிரியர்களை உருவாக்க முடியும்.
இன்றைய சூழ்நிலையில், ஆசிரியர் பணிக்கு பெரும்பாலான இளைஞர்கள் முன்வருவது
இல்லை. அந்தப் பணிக்கு அதிக சலுகைகளை அளிப்பதன் மூலம் திறமையான இளைஞர்கள்
ஆசிரியர் பணியில் சேருவார்கள். கூடுதல் ஊதியம், இன்சூரன்ஸ், வீட்டு வசதித்
திட்டம் உள்ளிட்ட சலுகைகளை ஆசிரியர்களுக்கு அளிக்க வேண்டும். ஆசிரியர் பணியிடங்களை நிரப்புவதில் ஒவ்வொரு மாநிலமும் தனித்தனி கொள்கையை கடைபிடிக்கின்றன. அவற்றில் மத்திய அரசு தலையிடாது. மாநிலங்களவை உறுப்பினர்கள் தாங்கள் சார்ந்துள்ள மாநில அரசுகளிடம் பேசி, தேவையான ஆசிரியர்களை நியமிக்க நடவடிக்கை எடுக்க வேண்டும். 24,521
மாணவர்களுக்கு உதவித்தொகை: தேசிய கல்வி உதவித்தொகை திட்டத்தில் தகுதியான
உயர்நிலை மற்றும் மேல்நிலைப் பள்ளி மாணவர்களுக்கு மாதந்தோறும் ரூ.500
வழங்கப்படுகிறது. இத் திட்டத்தில், கடந்த ஆண்டு 54,564
மாணவர்கள் பயன் பெற்றனர். ஆனால், நடப்பாண்டில் 27 மாநிலங்களைச் சேர்ந்த
24,521 மாணவர்கள் மட்டுமே உதவித்தொகை பெறுகின்றனர். இந்த கல்வி உதவித்தொகைக்கு மாநில அரசுகள் போதுமான மாணவர்களை பரிந்துரைப்பது இல்லை.
தேசிய கல்வி உதவித்தொகை திட்டத்துக்காக நான்கு ஆண்டுகளுக்கு ரூ.3,000 கோடி
டெபாசிட் செய்யப்பட்டது. இந்த தொகையில் இருந்து கிடைக்கும் வட்டி மூலம்
உதவித்தொகை வழங்கப்பட்டு வருகிறது. இப்போது வட்டி விகிதத்தில்
ஏற்பட்டுள்ள வீழ்ச்சி காரணமாக ஒவ்வொரு ஆண்டும் பட்ஜெட்டில் கூடுதல் நிதி
ஒதுக்க முடிவு செய்யப்பட்டுள்ளது என்றார் அமைச்சர் கபில் சிபல்.