மீஞ்சூர் கடல் நீரைக் குடிநீராக்கும் திட்டம்: ஓரிரு நாளில் சென்னைக்கு குடிநீர் விநியோகம்

சென்னை

மீஞ்சூரில் உள்ள காட்டுப்பள்ளி கடல் நீரைக் குடிநீராக்கும் நிலையத்தில்
இருந்து இன்னும் ஓரிரு நாளில் சென்னை நகருக்கு குடிநீர் விநியோகம்
செய்யப்படும் என எதிர்பார்க்கப்படுகிறது.முதல் கட்டமாக நாளொன்றுக்கு 15 மில்லியன் லிட்டர் (1.50 கோடி லிட்டர்) குடிநீர்கிடைக்கும் என சென்னை பெருநகர குடிநீர் வழங்கல் மற்றும் கழிவுநீரகற்று வாரிய அதிகாரிகள் தெரிவித்தனர்.சென்னை
நகரின் குடிநீர்த் தேவை நாளொன்றுக்கு சுமார் 700 மில்லியன் லிட்டர் என
கணக்கிடப்பட்டுள்ளது. சென்னைக்கு செம்பரம்பாக்கம், பூண்டி, செங்குன்றம்,
சோழவரம் ஏரிகளில் இருந்து தண்ணீர் பெறப்பட்டு பொதுமக்களுக்கு விநியோகம்
செய்யப்படுகிறது.இதனிடையே, குடிநீர் பற்றாக்குறையைப் போக்க
சென்னையை அடுத்த மீஞ்சூர் காட்டுப்பள்ளியில் கடல் நீரைக் குடிநீராக்கும்
திட்டத்துக்கான பணிகள் 2005-ல் தொடங்கப்பட்டன. இத்திட்டம் ரூ.600 கோடியில்
செயல்படுத்தப்பட்டுள்ளது.இந்த நிலையம், நாளொன்றுக்கு 100 மில்லியன் லிட்டர் (10 கோடி லிட்டர்) உற்பத்தி திறன் கொண்டது. இதற்கான
பணிகளை ஐ.வி.ஆர்.சி.எல். நிறுவனம் மற்றும் ஸ்பெயின் நாட்டு நிறுவனமான
பெபிசா கட்டுமான நிறுவனம் ஆகியன செய்து வந்தன. இப் பணிக்காக, இந்த இரு
நிறுவனங்கள் இணைந்து சென்னை வாட்டர் டீசாலினேஷன் லிமிடெட் என்ற
நிறுவனத்தைத் தொடங்கியுள்ளன.ஆயிரம் லிட்டர் குடிநீருக்கு ரூ.48
விலை: சென்னை வாட்டர் டீசாலினேஷன் லிமிடெட் நிறுவனத்துடன்
(சி.டபிள்யூ.டி.எல்.), சென்னை குடிநீர் வாரியம் செய்து கொண்ட மொத்த
குடிநீர் கொள்முதல் ஒப்பந்தத்தின்படி ஆயிரம் லிட்டர் குடிநீர் ரூ.48.66 என
கணக்கிடப்பட்டு பெறப்படும். இந்த ஒப்பந்தம் 25 ஆண்டுகளுக்கு நடைமுறையில் இருக்கும்.இந்த
மொத்த குடிநீர் கொள்முதல் ஒப்பந்தப்படி, சென்னை வாட்டர் டீசாலினேஷன்
லிமிடெட் நிறுவனம் துவக்க நாளில் இருந்து 12 மாதங்களுக்கு முதல்கட்டமாக
நாளொன்றுக்கு 15 மில்லியன் லிட்டர் குடிநீர் வழங்க வேண்டும்.இரண்டாவது
கட்டமாக 15 மாதங்களுக்குள் நாளொன்றுக்கு 100 மில்லியன் லிட்டர் குடிநீர்
வழங்க வேண்டும் என சென்னை குடிநீர் வாரிய அதிகாரிகள் தெரிவித்தனர்.முதல்கட்டமாக
15 மில்லியன் லிட்டர் குடிநீர் விநியோகம்: காட்டுப்பள்ளியில் கடல்நீரைக்
குடிநீராக்கும் சுத்திகரிப்பு நிலையத்தில் இருந்து மணலி நீரேற்று நிலையம்,
மாதவரம் நீரேற்று நிலையம், செங்குன்றம் சுத்திகரிப்பு நிலையங்களுக்கு
தண்ணீர் கொண்டு செல்லப்படும்.பின்னர் அங்கிருந்து குடிநீர் விநியோக
நிலையங்கள் மூலம் சென்னை நகர மக்களுக்கு விநியோகம் செய்யப்படும்.
முதல்கட்டமாக 15 மில்லியன் லிட்டர் குடிநீர் விநியோகம் செய்யப்படும் எனத்
தெரிகிறது.விறுவிறுப்பாக நடைபெறும் சுத்தம் செய்யும் பணி: கடல்
நீரைக் குடிநீராக்கும் நிலையத்தில் இருந்து தண்ணீரை எடுத்துச் செல்ல
குழாய்கள் அமைக்கப்பட்டு பல ஆண்டுகள் ஆகின்றன.அதனால், இப்போது குழாய்களில் குடிநீரை அனுப்பி சுத்தம் செய்யும் பணி விறுவிறுப்பாக நடந்து வருகிறது. இப்பணிகள் முடிந்ததும், குடிநீர் விநியோகம் செய்யப்படும் என குடிநீர் வாரிய அதிகாரிகள் தெரிவித்தனர்.இந்த குடிநீரால் எந்தெந்த பகுதி மக்கள் பயனடைவர் என்பதை அறிவிப்பதில் அதிகாரிகள் தயக்கம் காட்டுகின்றனர்.வட
சென்னை பகுதியினர் பயன்பெறுவார்கள் என அறிவிக்கப்பட்டாலும் 1.50 கோடி
லிட்டர் குடிநீர், எத்தனை மண்டலங்கள் அல்லது தொகுதிகளுக்குப் போதுமானதாக
இருக்கும். இந்த நீர் தினமும் குழாயில் வருமா என்பது போன்ற விவரங்களைத் தெரிவிக்க அதிகாரிகள் தயங்குகின்றனர்.