வறட்சி நிவாரணத்துக்கு ரூ.15,000 கோடி

பாட்னா

வறட்சி நிவாரணமாக மத்திய அரசிடம் ரூ.15,000 கோடி உதவி கோர பிகார் அரசு
அறிக்கை தயார் செய்கிறது. அந்த மாநிலத்தில் மொத்தம் 38 மாவட்டங்கள் உள்ளன.
இவற்றில், 28 மாவட்டங்கள் வறட்சி பாதித்த பகுதிகளாக அறிவிக்கப்பட்டுள்ளன.
அங்கு நிவாரணப் பணிகளை மேற்கொள்ள தேசிய பேரிடர் நிவாரண நிதியில் இருந்து
ரூ.15,000 கோடி உதவித்தொகை கோர மாநில அரசு முடிவு செய்துள்ளது.இதற்கான
அறிக்கை தயாரிக்கும் பணி இறுதி நிலையில் இருப்பதாகவும், அதனை மத்திய
அரசிடம் சமர்ப்பிக்க முதல்வர் நிதீஷ்குமார், ஆகஸ்ட் 7-ம் தேதி தில்லி
செல்லவிருப்பதாகவும் மாநில அரசு வட்டாரங்கள் தெரிவித்தன. போதிய மழை
இல்லாமல் கடந்த இரண்டு ஆண்டுகளாக பிகாரில் வறட்சி நீடிக்கிறது. 2009-ல் 26
மாவட்டங்கள் வறட்சி பாதித்த மாவட்டங்களாக அறிவிக்கப்பட்டன. இந்த எண்ணிக்கை
நடப்பாண்டில் 28 ஆக அதிகரித்துள்ளது.கயா, ஜஹனாபாத், ஒளரங்காபாத்,
நாளந்தா, நவாடா, பாட்னா, போஜ்பூர், பக்சர், முங்கர் உள்பட 28
மாவட்டங்களில் 1 கோடியே 50 லட்சம் குடும்பங்கள் வறட்சியால்
பாதிக்கப்பட்டிருப்பதாக கணக்கிடப்பட்டுள்ளது. அந்த குடும்பங்களில்
பெரியவர்களுக்கு நாளொன்றுக்கு ரூ.20-ம், சிறார்களுக்கு ரூ.15 நிவாரணமும்,
ஒரு மாதத்தைக் கணக்கிட்டு குடும்பத்துக்கு தலா ஒரு குவிண்டால் உணவுப்
பொருள்கள் வழங்கவும் மாநில அரசு திட்டமிட்டுள்ளது.வழக்கமாக, ஜூன் 1
முதல் ஜூலை 31 வரை மாநிலத்தில் 508.5 மி.மீட்டர் மழை பெய்யும். ஆனால்,
நடப்பாண்டில் 392.8 மி.மீ. மழை மட்டுமே பெய்துள்ளது. இதனால் விவசாய
உற்பத்தி பாதிக்கப்பட்டிருப்பதோடு, நிலத்தடி நீர்மட்டமும் குறைந்துள்ளது.
இதை முன்னிட்டு 2010-11 ஆம் ஆண்டில் விவசாயம், கூட்டுறவு வங்கிக் கடன்கள்,
மின்சார கட்டணம் உள்ளிட்டவற்றை மாநில அரசு ரத்து செய்துள்ளது.
விவசாயிகளுக்கு மாற்று வேலைவாய்ப்பு கிடைக்கவும் அரசு நடவடிக்கை
மேற்கொண்டு வருகிறது.