"காவல் நிலையங்களில் வழக்குப் பதிவு செய்ய மறுத்தால் புகார் செய்யலாம்'

திருச்சி

காவல் நிலையங்களில் வழக்குப் பதிவு செய்ய மறுத்தால், தொலைபேசி மூலம்
புகார் செய்யலாம் என்றார் மாநகரக் காவல் ஆணையர் கே. வன்னியபெருமாள். இதுகுறித்து வியாழக்கிழமை அவர் அளித்த பேட்டி:
"மாநகரில் திருட்டுச் சம்பவங்கள் தொடர்பாக காவல் நிலையங்களில் சரியாக
வழக்குப் பதிவு செய்வதில்லை என்ற பொதுவான குற்றச்சாட்டு உள்ளது. தற்போது
அதை சரி செய்து வருகிறோம். நிகழாண்டில் ஜூலை மாதம் வரை 271 வாகனத்
திருட்டு வழக்குகள் பதிவு செய்யப்பட்டுள்ளன. கடந்தாண்டு மொத்தம் 71
வழக்குகளே பதிவு செய்யப்பட்டிருந்தன. இவை திருட்டுகள் அதிகரித்துள்ளன
என்று அர்த்தமில்லை. அதிக வழக்குகள் பதிவு செய்யப்பட்டுள்ளன என்பதைத்தான்
காட்டுகின்றன. திருச்சியைப் பொருத்தவரை தற்போது டிராவல்ஸ்
முகவர்களிடம் ஏமாறுவது, போலி ஆவணங்கள் தயாரித்து நில மோசடியில்
ஈடுபடுவதும் அதிகரித்துள்ளது. இந்த விஷயத்தில் பொதுமக்கள் விழிப்புணர்வோடு
இருக்க வேண்டும். நிலம் வாங்குவோர் வில்லங்க சான்றிதழை முறையாகப்
பெற்ற பிறகே வாங்க வேண்டும். நகைப் பறிப்பு சம்பவங்களைத் தடுக்கும்
வகையில் நான்கு சிறப்பு தனிப் படைகள் அமைக்கப்பட்டுள்ளன. குற்ற
வழக்குகள் தொடர்பாக மாநகரில் உள்ள காவல் நிலையங்களில் புகார் கொடுத்தப்
பிறகு வழக்குப் பதிவு செய்ய மறுத்தால் 9788810000 என்ற எண்ணுக்கு
எஸ்.எம்.எஸ். மூலம் புகார் தெரிவிக்கலாம். அல்லது 100 எண்ணுக்குத் தொடர்பு
கொள்ளலாம். கடந்த சில நாள்களுக்கு முன் ஒரு செல்போன் எண்ணில்
இருந்து எனக்கு குறுந்தகவல் வந்தது. குறிப்பிட்ட நபரை அழைத்து எச்சரித்து
அனுப்பிவிட்டேன். சில வழக்குகள் தொடர்பாக சென்னையில் இருந்து
உயர் அதிகாரிகள் பேசுவதாகக் கூறி சிலர் பேசினர். விசாரணையில் அவர்கள்
கட்டப்பஞ்சாயத்து செய்யும் நபர்கள் என தெரிய வந்தது. பொய்த் தகவல்களை
கூறி செல்போனில் பேசியதாக இதுவரை சென்னையைச் சேர்ந்த இருவர் கைது
செய்யப்பட்டுள்ளனர். மேலும், திருச்சியில் விரைவில் "சைபர் கிரைம்' பிரிவு தொடங்கப்படவுள்ளது' என்றார் அவர்.