ஆசனூர் வனத்தில் அபூர்வ பறக்கும் அணில்

சத்தியமங்கலம்,
ஆசனூர் வனத்தில் காயமடைந்த நிலையில்
உயிருக்கு போராடிக் கொண்டிருந்த அபூர்வ பறக்கும் அணிலுக்கு கால்நடை
மருத்துவர்கள் சிகிச்சை அளித்தனர்.
சத்தியமங்கலம் வனக் கோட்டத்துக்குட்பட்ட ஆசனூர் வனச் சரகம் ஒங்கல்வாடி
கிராமத்தில், விவசாயி ஒருவரின் தோட்டத்தில் உயிருக்கு போராடிக்
கொண்டிருந்த ஆபூர்வமான பறவை குறித்து வனத் துறையினருக்கு கிடைத்த
தகவலின்பேரில், அங்கு வந்த ஆசனூர் வனச் சரக அலுவலர் சண்முகம் காயமடைந்த
வினோத பறவையைப் பார்த்த போது அது அபூர்வ பறக்கும் அணில் என்பது
தெரியவந்தது.
அதனைத் தொடர்ந்து, காயமடைந்த அணிலை பாதுகாப்பாக எடுத்துச் சென்று
கால்நடை மருத்துவர்கள் சாமிநாதன், ஆறுமுகம் ஆகியோர் சிகிச்சை அளித்தனர்.
அதன் உடல்நிலை மேலும் மோசமானதால் காயமடைந்த அதன் இறக்கைகளுக்கு 16 தையல்
போட்டு அறுவைச் சிகிச்சை செய்யப்பட்டது. அணிலுக்கு கேரட்,கொய்யா மற்றும்
இதர பழவகைகளை உணவாகக் கொடுத்து அதனை வனத் துறையினர் பாதுகாத்து
வருகின்றனர்.
இது குறித்து மாவட்ட வன அலுவலர் ராம.சுப்பிரமணியம் கூறியது:
கருப்புநிறமுடைய அபூர்வவகை பறக்கும் அணில் இரவில் மட்டுமே நடமாடும்
தன்மை கொண்டது. கடல் மட்டத்தில் இருந்து 1000 முதல் 1800 மீட்டம்
உயரத்தில் பசுமைமாறா காடுகளில் வாழும் இந்த அணில் பழவகைகள், மரப்பட்டை
மற்றும் மரப்பாசம் ஆகியவற்றை தின்று வாழும். நீளமான இறக்கைகள் உடைய
அணிலின் வால்பகுதி 60 செ.மீ. உள்ளது.
மரத்துக்கு மரம் தாவும் போது எதிர்பாராதவிதமாக தோட்டத்துக்கு கம்பிவேலி
மீது தவறி விழுந்ததால், அதன் இறக்கைகள் காயமடைந்தன. அதற்கு தீவிர சிகிச்சை
அளித்து வருகிறோம். உடல் நலம் தேறியபிறகு அணில் மீண்டும் காட்டுக்குள்
விடப்படும் என்றார்.