“ஹம்லா” ஆபரேஷன் தீவிரவாதிகள் என்று கருதி கடற்படை வீரர்களை பிடித்தனர்; போலீசுடன் கடும் வாக்குவாதம்

சென்னை,

தீவிரவாதிகள்
ஊடுருவி வந்தால் எப்படி தடுப்பது? என்பது தொடர்பான ஒத்திகை தமிழகம்
முழுவதும் நடந்து வருகிறது. இதில் கடலோர பாதுகாப்பு படையினரும், தமிழக
போலீசாரும் இணைந்து செயல்படுகிறார்கள். சென்னை போலீ சாருக்கான ஒத்திகை
நேற்று முன்தினம் நள்ளிரவு முதல் நடந்து வருகிறது.

கமாண்டோ போலீஸ் வீரர்களையே தீவிரவாதிகள் போல வேடமிட்டு பல்வேறு இடங்களிலும் ஊடுருவ செய்து அவர்களை பிடிக்க முயற்சித்து வருகின்றனர்.

இந்த
ஒத்திகைக்கு ஹம்லா ஆபரேஷன் என்று பெயரிடப்பட்டு உள்ளது. சென்னையில் போலீஸ்
கமிஷனர் (பொறுப்பு) சஞ்சய் அரோரா, கூடுதல் கமிஷனர்கள் ஷகில் அக்தர், ரவி
தலைமையில் இரவு முழுவதும் தீவிரமாக கண் காணிக்கப்பட்டது.

அப்போது
காசிமேடு கடற்பகுதி தீவிரவாதிகள் போல ஊடுருவிய 2 பேரை போலீசார் மடக்கி
பிடித்தனர். அவர்களுடன் வந்த 5 மீனவர்களையும் பிடித்தனர். இதுபோல நேற்று
அதிகாலை சீனிவாசபுரம் கடற்பகுதியில் ஊடுருவிய 4 பேர், நீலாங்கரை
கடற்பகுதிக்குள் நுழைந்த 4 பேரையும் சென்னை போலீசார் பிடித்தனர்.

மாலையில்
எழும்பூர் ரெயில் நிலையத்தில் நுழைந்த 3 பேர், ஸ்பென்சர் பிளாசாவிற்குள்
துப்பாக்கியுடன் வந்த 6 பேர் ஆகியோர் சிக்கினர். தீவிரவாதிகள் போல
ஊடுருவிய 19 கமாண்டோ வீரர்களை சென்னை போலீசார் சாதுர்யமாக பிடித்தனர்.
பிடிபட்ட அனைவரையும் வேப்பேரி போலீஸ் நிலையத்துக்கு கொண்டு சென்றனர்.

இந்நிலையில்
இன்று அதிகாலை 5.05 மணிக்கு மாநகர போலீஸ் கமிஷனர் அலுவலகத்திற்குள்
தீவிரவாதிகள் போல 3 பேர் உள்ளே நுழைந்தனர். சோதனையின்போது அவர்களை
போலீசார் பிடித்தனர்.

துறைமுகம்
பகுதியில் ஒரு மர்ம கப்பல் ஒன்று சந்தேகப்படும்படி சுற்றி கொண்டிருந்தது.
அதில் தீவிரவாதிகளாக இருக்கலாம் என கருதி போலீசார் படகில் அந்த கப்பலுக்கு
சென்று சோதனையிட்டனர். அங்கு கடற்படை வீரர்கள் போல உடை அணிந்து
துப்பாக்கியுடன் 6 பேர் இருந்தனர். தீவிரவாதிகளாக நடிக்கும் கமாண்டோ
வீரர்கள், கடற்படை வீரர்கள் வேடத்தில் வந்து இருக்கிறார்கள் என கருதி
அவர்களை மடக்கி பிடித்து கடற்கரைக்கு கொண்டு வந்தனர்.

அப்போது
அவர்கள் நாங்கள் உண்மையான கடற்படை வீரர்கள் என்று கூறி போலீசாருடன் கடும்
வாக்கு வாதம் செய்தனர். ஆனால் அதை போலீசார் ஏற்க வில்லை.

இந்த
நிலையில் அவர்கள் தங்கள் உயர் அதிகாரிகளுக்கு தகவல் கொடுத்தனர். உடனே
அதிகாரிகள் போலீஸ் கமிஷனர் (பொறுப்பு) ஷகீல் அக்தரிடம் இதுபற்றி
பேசினார்கள்.

அவர்
கடற்படை வீரர்களை பிடித்து வந்த போலீசாருக்கு தகவலை சொல்லி 6 பேரையும்
விடுவிக்கும்படி கூறினார். அதன் பின்னர் அவர்களை விடுவித்தனர்.

இதுவரை ஒத்திகையில் மொத்தம் 22 பேர் பிடிபட்டு உள்ளனர்.

இந்த
ஹம்லா ஆபரேஷன் இன்று மாலை 5 மணியுடன் முடிவடைகிறது. இந்த ஒத்திகை மூலம்
போலீசார் விழிப்போடு செயல்படுவார்கள். இதுவரை ஒத்திகை வெற்றிகரமாக
முடிந்துள்ளது என்று போலீஸ் கமிஷன் (பொறுப்பு) சஞ்சய் அரோரா கூறியுள்ளார்.


இந்த
ஒத்திகையில் தீவிரவாதிகள் போல கமாண்டோ வீரர்கள் ஊடுருவி சென்றால் அந்த
பகுதியில் பணியில் இருக்கும் போலீசார் மீது துறை ரீதியான நடவடிக்கை
எடுக்கப்படும்.