ஊராட்சிமன்ற அலுவலகத்தை பூட்டி பெண்கள் ஆர்ப்பாட்டம்

கொடைக்கானல் அருகே
பூம்பாறை ஊராட்சிமன்றத்தில் 100 நாள்கள் வேலைவாய்ப்புத் திட்டத்தில்
குறைந்த ஊதியம் கொடுப்பதாகக் கூறி, பெண்கள் ஊராட்சிமன்ற அலுவலகத்தைப்
பூட்டி ஆர்ப்பாட்டம் (படம்) நடத்தினர். கொடைக்கானல் மேல்மலைக்
கிராமம் பூம்பாறை. இந்த கிராமத்தில் தேசிய ஊரக வேலைவாய்ப்பு உறுதித்
திட்டத்தின் கீழ் புல்லார் முதல் கருடக்குன்றம் வரை மண் சாலை அமைக்கும்
பணி நடைபெற்றது. இதில் 100-க்கும் மேற்பட்ட பெண்கள்
ஈடுபட்டுள்ளனர். இந்நிலையில் வேலைக்கு சேரும் போது ரூ.80-தருவதாக அதிகாரி
கூறியதன் பேரில் இப் பணியில் ஈடுபட்டுள்ளனர். வாரத்துக்கு ஒரு முறை
கூலி கொடுப்பது வழக்கம் இந் நிலையில் கடந்த வாரம் மண்சாலை அமைக்கும்
பணியில் ஈடுபட்ட பெண்களுக்கு குறைவான சம்பளம் கொடுத்துள்ளதாகக்
கூறப்படுகிறது. இந்தப் பணத்தை வேலை பார்த்த பெண்கள் வாங்க
மறுத்து விட்டனர். இதனால் கடந்த சில நாள்களாக பெண்களுக்கும்
அதிகாரிகளுக்கும் பிரச்னை ஏற்பட்டுள்ளது. புதன்கிழமை பூம்பாறை
ஊராட்சிமன்ற அலுவலகம் முன்பு தேசிய ஊரக வேலைவாய்ப்பு உறுதித் திட்டத்தில்
வேலை பார்த்த 100-க்கும் மேற்பட்ட பெண்கள் ஊராட்சி அலுவலகத்தைப் பூட்டி
முற்றுகையிட்டு ஆர்ப்பாட்டம் நடத்தினர். இது குறித்து பாதிக்கப்பட்ட பெண்கள் கூறியதாவது: மண் சாலை அமைக்கும் பணிக்கு ரு.80-சம்பளம் தருவதாகக் கூறி எங்களை வேலைக்கு அழைத்துச் சென்றனர்.
வாரம் முடிந்தவுடன் எங்களுக்கு குறைவான கூலி தருகின்றனர். இதனால் நாங்கள்
கூலியை வாங்கவில்லை. மேலும் எங்களை தொலைதூரம் அழைத்துச் செல்கின்றனர்.எங்களுக்குப் பேசிய கூலியை தரும்வரை நாங்கள் வேலைக்குப் போக மாட்டோம். காலையிலிருந்து நாங்கள் ஊராட்சிமன்றத்தில் இருந்து வருகிறோம். அதிகாரிகள்
எங்களிடம் பேச்சு வார்த்தை நடத்தவில்லை. தொடர்ந்து இதே நிலை நீடித்தால்
கொடைக்கானல் பகுதிகளிலுள்ள அரசு அலுவலகங்கள் முன் போராட்டம் நடத்துவோம்.
சாலை மறியலில் ஈடுபடுவோம் என்றனர். இப் பிரச்சனைக் குறித்து ஊராட்சிமன்ற அலுவலர் ஒருவர் கூறியதாவது:பூம்பாறை
ஊராட்சியில் புல்லார் முதல் கருடக்குன்றம் வரை மண்சாலை அமைக்கும் பணி
நடைபெற்றது. இதில் 316 பெண்கள் பணியில் ஈடுபட்டனர். அரசு நிர்ணயித்த
அளவுக்கும் குறைவாக பெண்கள் வேலை செய்துள்ளனர். வேலை செய்த அளவுக்கு
மட்டுமே கூலி கொடுக்க முடியும். ஆனால், வேலை பார்த்த பெண்கள் அதிக அளவு
சம்பளம் கேட்கின்றனர். இதை நாங்கள் தரமுடியாது எனக் கூறினோம். அதனால் வேலை
பார்த்த பெண்கள் மற்றும் சிலர் புதன்கிழமை ஊராட்சி மன்ற அலுவலகத்தை
பூட்டியுள்ளனர். இதுகுறித்து உயர் அதிகாரிகளுக்கு தகவல் கொடுக்கப்பட்டுள்ளது. உயர் அதிகாரிகளின் ஆலோசனைப்படி நடவடிக்கை எடுக்கப்படும் என்றார்.