அதிபரின் அதிகாரத்தைப் பறிக்கும் அரசியல் சட்டம்

கென்யாவில் அதிபரின்
அதிகாரத்தைக் குறைத்து வடிவமைக்கப்பட்டுள்ள புதிய அரசியல் அமைப்புச்
சட்டத்தின் மீது புதன்கிழமை வாக்குப்பதிவு நடைபெற்றது. நாடு
முழுவதும் நடைபெற்ற இந்த வாக்குப்பதிவில் மக்கள் ஆர்வமாக கலந்து கொண்டனர்.
நாட்டின் தலைநகரான நைரோபியில் உள்ள வாக்குச் சாவடிகளில் மக்கள் நீண்டநேரம்
காத்திருந்து வாக்களித்தனர். நைரோபியின் பெரிய குடிசை பகுதியான
கிபெராவில் உள்ள வாக்குச் சாவடிக்கு மக்கள் அதிகாலை 3 மணிக்கே
வந்துவிட்டனர். அவர்கள் நீண்டவரிசையில் நின்று பொறுமையாக வாக்களித்தனர். ஆண்களைவிட பெண்கள் வாக்களிப்பதில் அதிக ஆர்வம் காட்டினர் என்று அங்கு தேர்தல் அதிகாரியாகப் பணியாற்றிய ஜார்ஜ் ராபல்லா தெரிவித்தார். நாட்டில்
சிறந்த அரசு அமைய வேண்டுமானால் சிறப்பான அரசியல் அமைப்புச் சட்டம்
அவசியம். இதனால் புதிய அரசியல் அமைப்புச் சட்டத்தை வரவேற்கிறேன் என்று
அந்நாட்டு பாதுகாப்பு வீரர் யுவிவாலிஸ் என்பவர் கூறினார்.பலத்த பாதுகாப்பு ஏற்பாடு... கென்யாவில் 2007-ல் நடைபெற்ற அதிபர் தேர்தலின் போது வன்முறை வெடித்தது. இதில்
1000-க்கு மேலானோர் உயிரிழந்தனர். இதுபோல புதிய அரசியல் அமைப்புச்
சட்டத்தின் மீதான வாக்குப்பதிவின் போதும் வன்முறை நடக்கலாம் என்று
எதிர்பார்க்கப்பட்டது. இதனால் முன்னெச்சரிக்கை நடவடிக்கையாக நாடு
முழுவதும் பலத்த பாதுகாப்பு போடப்பட்டிருந்தது. வாக்குச் சாவடிகளுக்கு
கூடுதலான பாதுகாப்பு அளிக்கப்பட்டது. இதனால் வாக்குப்பதிவு அமைதியான
முறையில் நடந்து முடிந்தது. வாக்குப் பதிவுக்கு பின்னர் ஏதாவது
வன்முறை வெடித்தால் அதை சமாளிக்கும் விதத்தில் பாதுகாப்பு
பலப்படுத்தப்பட்டுள்ளது. இதனால் மக்கள் அச்சம் அடையத் தேவையில்லை என்று
அந்நாட்டு பாதுகாப்பு அதிகாரிகள் தெரிவித்துள்ளனர். கென்ய அரசியல்
அமைப்புச் சட்டம் அதிபருக்கு எதேச்சை அதிகாரத்தை அளித்திருந்தது. அதிபரின்
அதிகாரத்தை பறிக்கும் வகையில் புதிய அரசியல் அமைப்புச் சட்டத்தை உருவாக்க
வேண்டும் என்று அங்கு பல்வேறு தரப்பினர் கோரிக்கைவிடுத்து வந்தனர். கென்ய
அதிபரின் அதிகாரத்தை பறிக்கும் விதத்தில் புதிய அரசியல் அமைப்புச்
சட்டத்தை உருவாக்குமாறு அந்நாட்டுக்கு அமெரிக்காவும் தொடர்ந்து
நெருக்குதல் அளித்து வந்தது. இதன்படி, புதிய அரசியல் அமைப்புச்
சட்டம் உருவாக்கப்பட்டது. அதிபரின் அதிகாரத்தைக் குறைத்தல், சொத்துரிமை,
கருக்கலைப்பு, முஸ்லிம் குடும்ப நீதிமன்றங்கள் உள்ளிட்டவை புதிய அரசியல்
அமைப்புச் சட்டத்தில் இடம்பெற்றுள்ளன.