சரக்கு, சேவை வரி வரைவு மசோதா: மாநிலங்கள் ஏற்க மறுப்பு

மத்திய அரசு வரும்
நிதி ஆண்டில் அறிமுகப்படுத்த உள்ள சரக்கு மற்றும் சேவை வரி (ஜிஎஸ்டி)
விதிப்பு குறித்த வரைவு மசோதாவுக்கு மாநில அரசுகள் கடும் எதிர்ப்பு
தெரிவித்துள்ளன. மாநில அரசுகளின் உரிமையில் மத்திய நிதி அமைச்சர் தலையிட
வழிவகுக்கும் தற்போதைய நிலையில் அதை எதிர்ப்பதாக மாநில அரசுகள்
தெரிவித்துள்ளன.ஜிஎஸ்டி வரைவு மசோதாவின் தற்போதைய நிலையில்
அதை ஏற்க முடியாது என்று மாநில நிதி அமைச்சர்கள் அதிகாரமளிக்கும் குழுவின்
தலைவரும் மேற்கு வங்க நிதி அமைச்சருமான அசிம்தாஸ் குப்தா தெரிவித்தார்.மக்களவையில்
புதன்கிழமை விலைவாசி உயர்வு குறித்த விவாதத்துக்கு பதிலளித்து பேசிய
மத்திய நிதி அமைச்சர் பிரணாப் முகர்ஜி, ஜிஎஸ்டி அமலாக்கத்துக்கு அனைத்து
எதிர்க்கட்சிகளும் ஒத்துழைப்பு அளிக்க வேண்டும் என்று கோரிக்கை விடுத்தார்.இந்நிலையில்
புதன்கிழமை தில்லியில் நடைபெற்ற மாநில நிதி அமைச்சர்களின் கூட்டத்தில்
ஜிஎஸ்டி குறித்து விவாதிக்கப்பட்டு, இதை தற்போதைய வடிவில் ஏற்பதில்லை என
முடிவு செய்யப்பட்டுள்ளது.வரைவு மசோதாவில் உள்ள சில அம்சங்கள்
மாநிலத்தின் நிதிச் சுதந்திரத்தை பாதிப்பதாக உள்ளன. மேலும் ஜிஎஸ்டி
கவுன்சில் மற்றும் ஜிஎஸ்டி குறைதீர் ஆணையம் அமைப்பது தொடர்பான
விஷயங்களிலும் மாநில அரசுகளுக்கு மாற்றுக் கருத்து உள்ளது.மாநிலங்களின்
வரி விதிப்பு முறையில் மத்திய நிதி அமைச்சருக்கு உள்ள உயர்ந்தபட்ச
அதிகாரமளிக்கும் விதிமுறையை மாநில நிதி அமைச்சர்கள் கடுமையாக எதிர்த்தனர்.
மேலும் ஜிஎஸ்டி குறைதீர் ஆணையம் மூலம் தீர்வு காண்பதற்கு அரசியல் சாசன
விதிமுறைகள் மூலம் இடம்தருவதை ஏற்க முடியாது என்றும் தாஸ் குப்தா
குறிப்பிட்டார்.எனவே மத்திய அரசின் ஜிஎஸ்டி மற்றும் மாநில
அரசுகளின் வரி விதிப்பு முறையை ஒருங்கிணைக்கும் வகையில் வரி விதிப்பு அமைய
வேண்டும் என்றும் அவர் வலியுறுத்தினார். இது தொடர்பாக மாநில
அரசுகளுடன் மத்திய நிதி அமைச்சர் பிரணாப் முகர்ஜி பேச்சு நடத்த வேண்டும்.
இதற்கு மாநில அரசுகளுக்கு சிறிது கால அவகாசம் தேவை என்றும் அவர்
குறிப்பிட்டார்.வரிப்பட்டியலில் உள்ள பொருள்களுக்கு வரி விதிக்கும்
அதிகாரம் மாநில அரசுகளுக்கு உள்ளது என்ற விதிமுறையை மாநிலங்கள் ஏற்றுக்
கொண்டுள்ளன. ஆனால் அரசியல் சாசனப்படி இதை ஒட்டுமொத்தமாக ஏற்றுக் கொள்ள
முடியாது. இதனால் இந்த வரைவு மசோதா தாக்கல் ஆவது தாமதமாகுமா? என்று கேட்டதற்கு, தான் அந்த அர்த்தத்தில் கூறவில்லை என்றார் குப்தா.மத்திய
அரசு கொண்டு வர உள்ள சரக்கு, சேவை வரி விதிப்பு மூலம் உற்பத்தி வரி, சேவை
வரி, மத்திய வரி மற்றும் மதிப்பு கூட்டு வரி ஆகியன நீங்கி ஒருமுனை வரியாக
ஜிஎஸ்டி விதிக்கப்படும். சரக்குகளுக்கு 20 சதவீதமும், அத்தியாவசியப்
பொருள்களுக்கு 12 சதவீதமும், சேவை வரி 16 சதவீதமும் விதிக்க
உத்தேசித்திருப்பதாக பிரணாப் முகர்ஜி கடந்த மாதம் தெரிவித்திருந்தார்.