3 கட்சிகளுக்கு மாறிய போதும் செல்வப்பெருந்தகை எம்.எல்.ஏ.வாக நீடிக்கிறார்

ரபீக் · ரபீக் Thu Aug 05, 2010 12:40 pm

2006 தேர்தலில் விடுதலை சிறுத்தைகள் கட்சி சார்பில் மங்களூர் தொகுதியில் போட்டியிட்டு தேர்ந்து எடுக்கப்பட்டவர் செல்வப் பெருந்தகை எம்.எல்.ஏ.

2008-ம் ஆண்டு அக்கட்சியில் இருந்து விலகி பகுஜன் சமாஜ் கட்சியில் சேர்ந்தார். மாயாவதி முன்னிலையில் அந்த கட்சியில் சேர்ந்த அவரை எம்.எல்.ஏ. பதவியை ராஜினாமா செய்யும்படி அவர் கூறினார்.

அதன்படி செல்வப்பெருந்தகை தனது எம்.எல்.ஏ. பதவியை ராஜினாமா செய்து சபாநாயகரிடம் கடிதம் கொடுத்தார். ஈழ பிரச்சினைக்காக ராஜினாமா செய்கிறேன் என்று ராஜினாமா கடிதத்தில் குறிப்பிட்டு இருந்தார். அவரது ராஜினாமாவை சபாநாயகர் ஏற்றுக்கொள்ளவில்லை.

அ.தி.மு.க. எம்.பி. தம்பித்துரை, கட்சித்தாவல் சட்டப்படி செல்வப் பெருந்தகை மீது நடவடிக்கை எடுக்க வேண்டும் என்று சபாநாயகர் ஆவுடையப்பனிடம் புகார் கொடுத்தார். இந்த நிலையில் பகுஜன் சமாஜ் கட்சியின் மாநில தலைவராக செயல் பட்டு வந்த செல்வப்பெருந்தகையை அக்கட்சியில் இருந்து நீக்கப்பட்டார்.

இதையடுத்து அவர் காங்கிரசில் தற்போது இணைந்தார். கடந்த வாரம் தனது ஆதரவாளர்களுடன் மத்திய மந்திரி ப. சிதம்பரம் முன்னிலையில் காங்கிரசில் சேர்ந்தார்.

இதுபற்றி சபாநாயகர் ஆவுடையப்பன் கூறுகையில், விடுதலை சிறுத்தைகள் கட்சியில் இருந்து செல்வப்பெருந்தகையை நீக்கி விட்டதாக அக்கட்சி கடிதமோ, அதற்கான ஆதாரங்களை கொடுக்கவேண்டும். அந்த கட்சியும் கொடுக்கவில்லை. அதில் இருந்து வெளியேறிய செல்வப்பெருந்தகையும் விலகியதற்கான ஆதாரத்தை தரவில்லை. அப்போது அவர் மீது நடவடிக்கை எடுக்கமுடியும். அ.தி.மு.க. கொடுத்த புகார் தொடர்பாக செல்வப் பெருந்தகைக்கு பதில் கேட்டு கடிதம் எழுதினோம். அதற்கு அவர் விடுதலை சிறுத்தை கட்சியில் தொடர்ந்து இருப்பதாக தெரிவித்துள்ளார் என்றார்.

ஒரு கட்சியில் இருந்து தேர்ந்து எடுக்கப்பட்ட ஒரு சட்டமன்ற உறுப்பினர் தானாக விட்டு கொடுத்தாலோ, அல்லது தான் தேர்ந்து எடுக்கப்பட்ட கட்சி கொறாடாவுக்கு எதிராக ஓட்டு போட்டாலோ அல்லது போடாமல் இருந்தாலோ எம்.எல்.ஏ. பதவியில் இருந்து நீக்கப்படுவார் என்று கட்சித்தாவல் தடை சட்டத்தில் உள்ளது.

இதுபற்றி முன்னாள் பாராளுமன்ற உறுப்பினர் இரா. செழியன் கூறும்போது, இந்த சம்பவம் புரியாத புதிராக உள்ளது. செல்வப்பெருந்தகையை எம்.எல்.ஏ. பதவியில் இருந்து நீக்கவேண்டும் என்று விடுதலை சிறுத்தை கட்சி தான் கூற வேண்டும். இது அரசியல் கோட்பாட்டிற்கு எதிராக உள்ளது என்றார்.

இதுபற்றி செல்வப்பெருந்தகை எம்.எல்.ஏ. கூறுகையில், எம்.எல்.ஏ. பதவியில் இருந்து விலகி கொள்வதாக சபாநாயகரிடம் கடிதம் கொடுத்தேன். அவர் என்ன முடிவு எடுத்தாலும் ஏற்க தயார். சம்பளத்தை நான் நேரடியாக சென்று பெறுவதில்லை. எனது வங்கி கணக்கில் செலுத்தப்படுகிறது. எனக்கு ஒதுக்கப்பட்ட தொகுதி மேம்பாட்டு நிதியை மக்கள் நலப்பணிக்காக முழுமையாக செலவழித்து விட்டேன் என்றார்.