விலைவாசி உயர்வை கட்டுப்பாட்டில் வைத்திருந்ததற்கு தமிழக அரசின் நிர்வாக திறமையே காரணம் - டி.ஆர்.பாலு பேச்சு

நிசாந்தன் · நிசாந்தன் Wed Aug 04, 2010 4:00 pm

விலைவாசி உயர்வை கட்டுப்பாட்டில் வைத்திருந்ததற்கு, தமிழக அரசின் நிர்வாக திறமையே முக்கிய காரணம் என்று, டி.ஆர்.பாலு எம்.பி. தெரிவித்தார்.

விலைவாசி உயர்வு பிரச்சினை குறித்து பாராளுமன்ற மக்களவை விவாதத்தில், தி.மு.க. சார்பில் பேசிய அவர் கூறியதாவது:-

காங்கிரஸ் தலைமையிலான ஐக்கிய முற்போக்கு கூட்டணியில் தி.மு.க. உள்ளதால் அரசின் நடவடிக்கைகளை சுட்டிக்காட்ட உரிமை உண்டு. இந்த அரசை தலைமை ஏற்று நடத்தி வரும் பிரதமர் டாக்டர் மன்மோகன்சிங் சர்வதேச அளவில் சிறந்த பொருளாதார நிபுணர் ஆவார்.

சர்வதேச அளவில் கச்சா எண்ணெய் விலையை கருத்தில் கொண்டுதான், பெட்ரோலிய பொருட்களின் விலையை மத்திய அரசு உயர்த்தி உள்ளது. ஏற்கனவே சில கால கட்டங்களில் ஆட்சியில் இருந்தவர்கள் இந்த விலையேற்றத்தை குறை கூறக்கூடாது.

அத்தியாவசிய பொருட்களை பதுக்கியவர்களுக்கு எதிராக நாடு தழுவிய அளவில் கைதான 9 ஆயிரத்து 12 பேரில் ஆயிரம் பேரில், ஏறத்தாழ பாதிப்பேர் 4 ஆயிரத்து 775 பேர் தமிழக அரசு சார்பில் கைதானவர்கள் ஆவர்.

ரேஷன் கடைகள் மூலம் பொது வினியோகத்திற்காக மத்திய அரசால் ஒதுக்கப்படும் பொருட்களை தவிர தமிழக அரசு சார்பில் வெளிச்சந்தையில் கூடுதல் விலைக்கு அரிசி, சர்க்கரை, கோதுமை மற்றும் பருப்பு வகைகளை வாங்கி மானிய விலைக்கு தமிழக மக்களுக்கு வழங்கப்பட்டு வருகிறது. சமையலுக்குத் தேவையான 10 மசாலா பொருட்களை கொண்ட பை ரூ.50க்கு அளித்து வருகிறோம்.

இந்த மாதம் (ஆகஸ்டு) முதல் இந்த மசாலா பொட்டல பை ரூ.25-க்கு வழங்கப்படும். இடைத்தரகர்களை தவிர்த்து விவசாயிகளிடம் இருந்து தமிழக அரசு நேரடியாக கொள்முதல் செய்வதால், இப்படி குறைந்த விலைக்கு வழங்குவது சாத்தியமாகிறது.

ஒரு கிலோ அரிசி தமிழ்நாட்டில் ஒரு ரூபாய்க்கு கிடைக்கிறது. மத்திய அரசு எங்களுக்கு தேவையான 3 லட்சத்து 16 ஆயிரம் டன் அரசியில் 2 லட்சத்து 90 ஆயிரம் டன் மட்டுமே வழங்கி வருகிறது. ஆனால், தேவையான 20 ஆயிரம் டன் அரிசியை வெளிச்சந்தையில் ரூ.15.75-க்கு வாங்கி ஒரு ரூபாய்க்கு தாயுள்ளத்துடன் கலைஞர் அவர்கள் வழங்குகிறார்.

இதேபோல் பற்றாக்குறையாக உள்ள 23 ஆயிரம் டன் சர்க்கரையை கிலோவுக்கு ரூ.40க்கு வாங்கி பொதுமக்களுக்கு ரூ.13.50-க்கு வினியோகம் செய்கிறோம். தமிழகத்தில் ரூ.40-க்கு வழங்கப்படும் துவரம்பருப்பு டெல்லியில் ரூ.76-க்கு விற்கப்படுகிறது. இதேபோல் இங்கு ரூ.40-க்கு விற்கப்படும் உளுத்தம்பருப்பு டெல்லியில் ரூ.67-க்கும் இதே போல் அனைத்து அத்தியாவசிய பொருட்களும் தமிழகத்தில் குறைந்த விலைக்கு வினியோகம் செய்யப்பட்டு வருகின்றன.

விலைவாசி உயர்வை கட்டுப்பாட்டுக்குள் கொண்டு வருவது மத்திய அரசின் கடமை என்று மட்டும் கருதாமல், மாநில அரசுகளும் மத்திய அரசுடன் இணைந்து தங்கள் கடமைகளை நிறைவேற்றும் பட்சத்தில் விலை உயர்வை கட்டுப்படுத்த முடியும் என்பதை தமிழக அரசு மேற்கொண்டு வரும் நடவடிக்கை மூலம் நிரூபிக்கப்பட்டு உள்ளது.

தமிழகத்தில் அத்தியாவசிய பொருட்களின் விலை உயர்வை கட்டுப்பாட்டுக்குள் வைத்திருந்ததற்கு தமிழக அரசின் நிர்வாகத் திறமையே முக்கிய காரணமாகும்``.

இவ்வாறு டி.ஆர்.பாலு கூறினார்.

விலைவாசி உயர்வை கட்டுப்பாட்டில் வைத்திருந்ததற்கு தமிழக அரசின் நிர்வாக திறமையே காரணம் - டி.ஆர்.பாலு பேச்சு

விலைவாசி உயர்வை கட்டுப்பாட்டில் வைத்திருந்ததற்கு தமிழக அரசின் நிர்வாக திறமையே காரணம் - டி.ஆர்.பாலு பேச்சு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக