போலீசாருக்கு அடுத்த தலைவலி "பாலீஷ்' திருடர்கள் வடிவில் வந்தது

நவீன் · நவீன் Wed Aug 04, 2010 1:52 pm

மதுரை : மதுரையில் பாலீஷ் செய்து தருவது போல் நடித்து நகைகளை
கொள்ளையடிக்கும் கும்பலால், குற்றப்பிரிவு போலீசாருக்கு தலைவலி
ஏற்பட்டுள்ளது.வீட்டில் தனியாக இருக்கும் பெண்களை நோட்டமிட்டு, நகை பாலீஷ்
செய்து தருவது போல், நூதன முறையில் நகைகளை கொள்ளையடிப்பது இரு நாட்களாக
தொடர்கிறது. மதுரை சொக்கலிங்கநகர் ஒன்றாவது தெருவைச் சேர்ந்தவர்
விஜயா(22). நேற்று முன் தினம் வீட்டில் தனியாக இருந்தபோது இரண்டு பேர்
வந்தனர். வெள்ளி, தங்க நகைகளை பாலீஷ் செய்து தருவதாக கூறினர். வெள்ளி
கொலுசுகளை விஜயா கொடுத்தார். பவுடர் ஒன்றை தண்ணீர் கலந்து, அலசி
சுத்தப்படுத்தி கொடுக்க, "பளிச்' என கொலுசு மின்னியது.
இதை நம்பி, தோடு, கம்மல் என நாலரை பவுன் நகையை விஜயா கொடுத்தார்.
வீட்டு குக்கரை கேட்டு பெற்ற அவர்கள், "குக்கரில் தண்ணீர் கலந்த பவுடரில்
நகைகளை வைத்துள்ளோம். ஐந்து நிமிடம் சூடு செய்து, 15 நிமிடங்கள் கழித்து
திறந்து பாருங்கள். நகைகள் "பளிச்'சென மின்னும்' என்றுக்கூறிவிட்டு
வெளியேறினர். அவர்கள் சொன்னபடி, குக்கரை சூடுபடுத்தி விஜயா திறந்து
பார்த்தபோது, நகைகளுக்கு பதில் "ஆவி' மட்டும் இருந்தது. அதிர்ச்சியடைந்த
அவர் எஸ்.எஸ்.காலனி போலீசில் புகார் செய்தார். இதேபோல் நேற்றும் ஒரு
சம்பவம் நடந்தது. வடக்குபெருமாள் மேஸ்திரி வீதியைச் சேர்ந்தவர் கண்ணன்.
நகைபட்டறை தொழிலாளி. இவரது மனைவி தாரணி(28). வீட்டில் தனியாக இருந்த
இவரிடமும், நூதன முறையில் 6 பவுன் நகையை இருவர் திருடிச் சென்றனர்.
திலகர்திடல் போலீசார் விசாரிக்கின் றனர். மதுரையில் உருவாகியுள்ள இந்த
"பாலீஷ்' திருடர்களால் போலீசாருக்கு தலைவலி ஏற்பட்டுள்ளது. "முன்பின்
அறியாதவர்கள் வந்து நகையை "பாலீஷ்' செய்து தருவதாக கூறினால், ஏமாற
வேண்டாம்' என்று போலீசார் எச்சரித்துள்ளனர்.

உதயசுதா · உதயசுதா Wed Aug 04, 2010 2:10 pm

எத்தனை தடவை ஏமாந்தாலும் நம்ம மக்களுக்கு புத்தியே வராது.காசு மலிவா செய்து தரேன்னு சொன்னா போதும் இவங்களுக்கு,அது தரமானதா, போலியா எதுவும் பார்க்கறதே இல்லை