ஒரு லட்சம் முதியோருக்கு ஓய்வூதியம்

தமிழகத்தில் 11 லட்சம் முதியோருக்கு மாத
ஓய்வூதியம் வழங்கப்பட்டு வருகிறது. இந்த ஆண்டில் மேலும் ஒரு லட்சம் முதியோருக்கு ஓய்வூதியம் வழங்க தமிழக அரசு முடிவு செய்துள்ளது.



சென்னை கோட்டையில் செய்தியாளர்களிடம் பேசிய சமூகநலத்துறை செயலாளர் டாக்டர் பி.ராமமோகன் ராவ்,



தமிழகத்தில் முதியோருக்காக பல்வேறு நலத்திட்டங்கள் செயல்படுத்தப்பட்டு வருகின்றன. குறிப்பாக வறுமைக்கோட்டுக்கு கீழே

வாழும் முதியோருக்காக
பல திட்டங்கள் நடைமுறையில் உள்ளன. வயதான காலத்தில் அவர்களது தேவைகள்
பூர்த்தி அடையும் வகையில், மத்திய அரசின் நிதியுதவியுடன் முதியோர்
ஓய்வூதியம், சுமார் 10 லட்சம் பேருக்கு வழங்கப்பட்டு வருகிறது.
இத்திட்டத்தில் 65 வயதுக்கு மேற்பட்ட, வறுமைக்கோட்டுக்கு கீழே வாழும்
முதியோருக்கு மாதந்தோறும் ரூ.400 ஓய்வூதியம் வழங்கப்படுகிறது.
இத்திட்டத்தின் கீழ் பயனடைய விரும்புவோர், அந்தந்த மாவட்ட கலெக்டர்
அலுவலகத்தின் மூலம் விண்ணப்பித்து பயன் அடையலாம்.



இத்திட்டத்தில்,
தகுதியானவர்களை தேர்ந்தெடுப்பதற்கான, வறுமைக்கோட்டுக்கு கீழே உள்ளவர்களின்
பட்டியல், வருவாய்த்துறையிடம் உள்ளது. நகரப்பகுதிகளில், நகராட்சி மற்றும்
மாநகராட்சியிடம் இருந்து இந்த தகவல்களை கலெக்டர் அலுவலகத்தினர் வாங்கி,
உரிய நபர்களை தேர்ந்தெடுக்கிறார்கள். இந்த ஆண்டு மேலும் ஒரு லட்சம்
முதியோருக்கு ஓய்வூதியத்தை அளிக்க, முதல் அமைச்சர் கருணாநிதி
அனுமதித்துள்ளார். இதுதவிர, 60 வயதை எட்டிய, ஆதரவற்ற விவசாய
தொழிலாளர்களுக்கும், ரூ.400 மாதாந்திர ஓய்வூதியம் வழங்கப்பட்டு வருகிறது.
இத்திட்டத்தின் கீழ் 1.89 லட்சம் பேர் பயன்பெற்று வருகிறார்கள். முதியோர்
ஓய்வூதியம் பெறுவோருக்கு அங்கன்வாடிகளிலும் இலவச உணவினை வழங்கி வருகிறோம்.



முதியோர்களுக்காக
தமிழகத்தில் 79 இல்லங்கள் (இவற்றில் 49 மத்திய அரசு உதவியுடன்)
நடத்தப்பட்டு வருகின்றன. மேலும், முதியோருக்கான பன்முக சேவை இல்லங்களும்,
நடமாடும் மருத்துவ உதவி மையங்களும் செயல்பட்டு வருகின்றன. இதுதவிர
முதியோருக்கு பயனுள்ள, இன்னும் பல திட்டங்களை மத்திய அரசு சமீபத்தில்
அறிமுகப்படுத்தியுள்ளது. பகல் நேர பராமரிப்பு மையம் மற்றும் ஞாபகமறதி
உள்ளவர்களுக்கான மையங்கள், முதியோருக்கான பிசியோதெரபி மையம், முதியோர்
மனநல பாதிப்பு மையம், முதியோர் பராமரிப்பு அளிப்போருக்கான பயிற்சி
மையங்கள், முதியோர் நலன் பற்றி பள்ளிக்குழந்தைகளுக்கு விழிப்புணர்வு
ஏற்படுத்துதல், வயதான விதவைகள் மையம் என 16 திட்டங்கள்
அறிமுகப்படுத்தப்பட்டுள்ளன.



இவற்றை
நடத்துவதற்குத்தான் யாரும் முன்வரவில்லை. இத்திட்டங்களுக்கு நிதியுதவி
தரத்தயாராக இருக்கிறோம். இவற்றை தன்னார்வத்தொண்டு நிறுவனங்கள் (என்.ஜி.ஓ.)
மூலமாகத்தான் நடத்தவேண்டும். ஆனால், பெரும்பாலான நிறுவனங்களுக்கு இதுபற்றி
தெரிவதில்லை. அவர்களிடம் இருந்து இது தொடர்பாக கோரிக்கைகள் வந்தால்
நிச்சயம் பரிசீலிக்கப்பட்டு, அனுமதி அளிக்கப்படும். இத்திட்டத்தின் கீழ்
மாதத்துக்கு குறைந்தபட்சம் ரூ.2 லட்சம் நிதியுதவி அளிக்கப்படும் என்றார்.