வேலை பறிபோகும் அச்சத்தில் 6,000 டாஸ்மாக் ஊழியர்கள்

வேலைநிறுத்தப் போராட்டத்தில் தீவிரம் காட்டுவதால், பணி நிபந்தனைகளை மீறியதாக தமிழக அரசு தரப்பில் மெமோ அளிக்கப்பட்ட 6,000 டாஸ்மாக் ஊழியர்களும் பணிநீக்கம் செய்யப்படலாம் என்ற அச்சத்தில் உள்ளனர்.
தமிழக அரசுக்கு ஆண்டுக்கு ரூ. 14,000 கோடி வருவாய் ஈட்டித்தரும் அட்சயப் பாத்திரமாக மாநிலம் முழுவதும் 7,000 டாஸ்மாக் மதுபானக் கடைகள் உள்ளன. இவற்றில் மேற்பார்வையாளர், விற்பனையாளர் என சுமார் 32,000 ஊழியர்கள், கடந்த 19.11.2003 முதல் பணியாற்றி வருகின்றனர்.

பணிநிரந்தரம், அரசு ஊழியருக்கு இணையாக ஊதியம், 8 மணி நேரம் வேலை, வார விடுமுறை, பணிப் பாதுகாப்பு உள்ளிட்டவை இவர்களது நீண்டநாள் கோரிக்கை. இந்தக் கோரிக்கைகளை வலியுறுத்தி, ஆர்ப்பாட்டம், உண்ணாவிரதம் என பல்வேறு போராட்டங்களையும் அவர்கள் நடத்தினர். ஆனாலும், தங்களது கோரிக்கைகள் நிறைவேறாததால், வருகிற 11-ம் தேதி வேலைநிறுத்தப் போராட்டம் செய்யவுள்ளதாக அவர்கள் அறிவித்தனர்.

இதுதொடர்பாக வேலைநிறுத்த ஆயத்த மாநாட்டை கடந்த மாதம் 24-ம் தேதி திருச்சியில் நடத்தினர். இந்த மாநாட்டில் பங்கேற்ற, அதாவது வேலைநிறுத்தப் போராட்டத்தில் தீவிரம் காட்டி வரும் தொழிற்சங்க ஊழியர்கள் சுமார் 6,000 பேருக்கு கடந்த மாதம் 28-ம் தேதி அரசு மெமோ அளித்தது.

அந்த மெமோவில் குறிப்பிட்டுள்ளதாவது: பணி நிபந்தனைகளை மீறியதால் உங்களை ஏன் நிரந்தப் பணிநீக்கம் செய்யக்கூடாது என்பதற்கு இன்னும் 14 நாள்களில் விளக்கம் அளிக்க வேண்டும். தவறினால் தொடர் நடவடிக்கை எடுக்கப்படும் என்று குறிப்பிடப்பட்டுள்ளது.
14 நாள்கள் கால அவகாசம் என்பது வேலைநிறுத்தம் அறிவிக்கப்பட்டுள்ள ஆகஸ்ட் 11-ம் தேதி வரை வருகிறது. எனவே, மெமோவிற்கு எந்தமாதிரி விளக்கம் அளித்தாலும், வேலைநிறுத்தத்தில் கலந்து கொள்வதைக் காரணம்காட்டி, அவர்களைப் பணிநீக்கம் செய்ய அரசு தயாராகிவிட்டதாகவே தெரிகிறது.

மாநிலம் முழுவதும் ஒவ்வொரு டாஸ்மாக் கடைக்கும் 2 சாவிகள் உள்ளன. அவற்றில் ஒன்றை அந்தந்த மாவட்ட டாஸ்மாக் மேலாளர்கள் 2 தினங்களுக்கு முன்பு ஊழியர்களிடமிருந்து திரும்பப் பெற்றுவிட்டனர்.

மேலும், ஊழியர்கள் வேலைநிறுத்தம் செய்யும் நாளன்று கடைகளைப் பூட்டிவிட்டுச் சென்றால், தங்கள்வசம் உள்ள மாற்றுச் சாவி மூலம் கடைகளைத் திறக்க முடிவு செய்து, தாற்காலிக ஊழியர்களையும் கணக்கெடுத்து வைத்துள்ளனர்.

இதுகுறித்து தஞ்சாவூர் மாவட்ட டாஸ்மாக் மேலாளர் கண்ணன் கூறியது: அரசுத் தரப்பில் வந்த உத்தரவுப்படி, மக்கள் நலப் பணியாளர்கள், வரி வசூலிப்பாளர்கள் ஆகியோரைக் கணக்கெடுத்து வைத்துள்ளோம். இந்தக் கணக்கெடுப்பை நாங்கள் தயார்நிலையில் வைத்துள்ளோம் என்றார்.
மெமோ, சாவி பறிமுதல், தயார் நிலையில் மாற்று ஊழியர்கள் என்று அரசுத் தரப்பில் வேலைநிறுத்தப் போராட்டத்தை முறியடிக்கும் பணிகள் தீவிரமடைந்திருப்பதால், மெமோ பெற்ற ஊழியர்கள் மத்தியில் பணிநீக்கம் குறித்த அச்சம் எழுந்துள்ளது.

இதுகுறித்து டாஸ்மாக் ஊழியர் சங்க மாநில சம்மேளன செயலர் கே. பழனிவேல் கூறியது: தமிழகம் முழுவதும் சுமார் 6,000 டாஸ்மாக் ஊழியர்களுக்கு மெமோ அளித்து, தொழிலாளர் விரோத நடவடிக்கையை அரசு மேற்கொண்டுள்ளது. வேலைநிறுத்தப் போராட்டத்தை அடக்குவதற்காக, ஊழியர்களை மிரட்டும் வகையில்தான் பூரண மதுவிலக்கு என்று முதல்வர் பேசத் தொடங்கியிருக்கிறார்.

தமிழ்நாடு கடைகள் மற்றும் நிறுவனங்களின் சட்டத்தில், ஒரு தொழிலாளி 6 மாதங்கள் தொடர்ந்து பணிபுரிந்திருந்தால் அவரைக் காரணமின்றி, குற்றச்சாட்டு நிரூபணமாகாமல் வேலைநீக்கம் செய்ய இயலாது என்று உள்ளது.

திட்டமிட்டப்படி வேலைநிறுத்தப் போராட்டம் உறுதியாக நடைபெறும். எங்களை அழைத்து பேச்சுவார்த்தை நடத்தி, நியாயமான கோரிக்கைகளை நிறைவேற்ற அரசு முன்வர வேண்டும் என்றார் பழனிவேல்.

எப்படியோ இந்த குழப்பத்தில் , எல்லா டாஸ்மாக் கடைகளையும் மூடி விட்டால் நல்லது ,

பல ஏழை குடும்பங்கள் நல்லபடியாக வாழும்

ராஜா wrote:எப்படியோ இந்த குழப்பத்தில் , எல்லா டாஸ்மாக் கடைகளையும் மூடி விட்டால் நல்லது ,

பல ஏழை குடும்பங்கள் நல்லபடியாக வாழும்

ஆகா.... எங்க பொளப்புல மண்ணு அள்ளி போட்டுருவீங்க போல இருக்கே?

ராஜா wrote:எப்படியோ இந்த குழப்பத்தில் , எல்லா டாஸ்மாக் கடைகளையும் மூடி விட்டால் நல்லது ,

பல ஏழை குடும்பங்கள் நல்லபடியாக வாழும்

பல ஏழை குடும்பங்கள் நல்லபடியாக வாழும்