இறந்து கரையொதுங்கிய"ஸ்பெர்ம் வெல்' திமிங்கலம்

புதுச்சேரி:புதுச்சேரி கடற்கரையில் இறந்து ஒதுங்கிய 37 அடி நீளம் கொண்ட
"ஸ்பெர்ம் வெல்' ராட்சத திமிங்கலத்தை ஆயிரக்கணக்கானோர் வியப்புடன்
பார்த்து சென்றனர்.புதுச்சேரி தலைமைச் செயலகம் எதிரில், கடற்கரையில்
நேற்று காலை திமிங்கலம் ஒன்று இறந்த நிலையில் கரை ஒதுங்கியது.
இத்திமிங்கலம் 37 அடி நீளம், 15 டன் எடை கொண்டதாக இருந்தது. கடற்கரைக்கு
வந்த சுற்றுலாப் பயணிகள் மற்றும் பொது மக்கள் அங்கு திரண்டு, கரை ஒதுங்கிய
திமிங்கலத்தை ஆச்சரியத்துடன் பார்த்தனர். சில சுற்றுலாப் பயணிகள்
திமிங்கலத்தை மொபைல் போன் கேமராவில் படம் பிடித்தனர்.
தகவலறிந்த மீன்வளத்துறை இயக்குனர் ராமலட்சுமி, தாசில்தார் தில்லைவேலு,
வனத்துறை அதிகாரி அனில்குமார், முருகேசன், கால்நடைத் துறை இணை
இயக்குனர்கள் குணசீலன், மனோகரன் உள்ளிட்ட அதிகாரிகள் திமிங்கலத்தை
பார்வையிட்டனர். கடற்கரையில் கருங்கற்கள் கொட்டப்பட்டுள்ளதால் கரை
ஒதுங்கிய திமிங்கலத்தை வெளியே கொண்டு வருவதில் சிக்கல் ஏற்பட்டது.இறந்த
திமிங்கலத்தை விசைப்படகு மூலம் தேங்காய்த்திட்டு துறைமுகப் பகுதிக்கு கடல்
வழியாக இழுத்து வர முடிவு செய்யப்பட்டது. கனமான திமிங்கலம் என்பதால்
இழுத்து செல்வதில் சிரமம் ஏற்பட்டது. பல்வேறு சிரமங்களைக் கடந்து, மதியம்
2 மணிக்கு மீனவர்கள் திமிங்கலத்தை துறைமுக ஆற்றுப் பகுதிக்கு கொண்டு
சென்றனர். ஆற்றிலிருந்து ஜெ.சி.பி., மூலம் கரைக்கு கொண்டு வர முயற்சி
மேற்கொண்டனர்.
"ஸ்பெர்ம் வெல்' திமிங்கலம்:திமிங்கலத்தில் கில்லர் வெல், ஸ்பெர்ம்
வெல், புளூ வெல் உள்ளிட்ட பல்வேறு வகை உள்ளது. கடந்த 2003ம் ஆண்டில்
புதுச்சேரி கடற்கரையில் 10 டன் எடை கொண்ட "ஸ்பெர்ம் வெல்' வகையைச் சேர்ந்த
திமிங்கலம் இறந்து கரை ஒதுங்கியது. நேற்று ஒதுங்கிய 37 அடி நீளமுள்ள
திமிங்கலமும் "ஸ்பெர்ம் வெல்' வகையைச் சேர்ந்தது என்பது குறிப்பிடத்தக்கது.