மன நிலை பாதிக்கப்பட்டவர் கலாட்டா : மூன்று மணி நேரம் வேலூரில் பரபரப்பு

வேலூர் : வேலூரில் கல்வீசி தாக்குதல் நடத்திய மனநலம் பாதித்த வாலிபரை,
இரண்டு மணி நேர போராட்டத்திற்கு பிறகு, பொதுமக்கள் பிடித்து போலீசில்
ஒப்படைத்தனர்.
வேலூர் சி.எம்.சி., மருத்துவமனை பகுதியில், நேற்று காலை 6.30 மணிக்கு,
31 வயதுள்ள வாலிபர், ரோட்டில் நடந்து செல்பவர்களை அடித்து, பெண்களை
விரட்டிக் கொண்டிருந்தார். அவ்வழியாக சென்ற பொதுமக்கள், பீதியடைந்தனர்.
அங்கிருந்த வியாபாரிகள், அவரை அங்கிருந்து விரட்டியதால், ஆத்திரமடைந்த
வாலிபர், பழைய பஸ் ஸ்டாண்டின் அருகில் உள்ள யூனியன் வங்கி ஏ.டி.எம்.,
கண்ணாடியை உடைத்தார். மேலும், வங்கியின் மாடியில் உள்ள கம்ப்யூட்டர்
டேட்டா என்ட்ரி நிறுவனத்தின் கண்ணாடி கதவை உடைத்து உள்ளே சென்ற வாலிபர்,
அங்கிருந்த கம்ப்யூட்டர் உள்ளிட்ட பொருட்களை சூறையாடினார். இதை தடுக்க
சென்ற நிறுவனர் செந்திலை, உடைந்த கண்ணாடி துண்டை எடுத்து குத்தி விடுவதாக
மிரட்டினார். அங்கிருந்து வெல்ல மண்டிக்கு சென்று, மூட்டையில் இருந்த
வெல்ல உருண்டைகளை எடுத்து ரோட்டில் வீசினார். தடுக்க சென்றவர்கள் மீது,
வெல்ல உருண்டை மற்றும் கல்வீசி தாக்குதல் நடத்தினார்.
பஸ் ஸ்டாண்ட் பகுதியில் சுற்றி வந்த அவரை, இரண்டு மணி நேர
போராட்டத்துக்கு பிறகு, பொதுமக்கள் பிடித்து, வேலூர் வடக்கு போலீஸ்
ஸ்டேஷனில் ஒப்படைத்தனர். விசாரணையில், வேலூர் தாட்டப்பாளையத்தைச் சேர்ந்த
சேகர்(31), வெல்ல மண்டியில் கூலி வேலை செய்ததும், அவரது மனைவி மேகலா(25)
மகன் ராகுல்(2) குடும்ப பிரச்னை காரணமாக பிரிந்து சென்றதால், மனநிலை
பாதிக்கப்பட்ட அவர், சிகிச்சை பெற்று இரு நாட்களுக்கு முன் வீடு
திரும்பியது தெரிந்தது. சேகரின் கலாட்டாவால், காலை 6.30 முதல் 9.30 மணி
வரை, போக்குவரத்தும் நிறுத்தப்பட்டது. அவரை கைது செய்த போலீசார், பாகாயம்
மன நல மருத்துவமனையில் சேர்த்தனர்.