கலர் ஜெராக்ஸ் எடுத்து கள்ள நோட்டு தயாரித்து புழக்கத்தில் விட்டவர் கைது

பெரம்பலூர் : பெரம்பலூரில் ரூபாய் நோட்டுகளை, கலர் ஜெராக்ஸ் எடுத்து
புழக்கத்தில் விட்ட வாலிபரை, பெரம்பலூர் போலீசார் கைது செய்து சிறையில்
அடைத்தனர்.
பெரம்பலூர் அருகே உள்ள மேட்டுப்பாளையம் கிராமத்தை சேர்ந்தவர் தங்கவேல்
மகன் வரதன் என்கிற வரதராஜ் (27). இவர், பெரம்பலூர் புது பஸ் ஸ்டாண்ட்
அருகில் உள்ள மீனாட்சிசுந்தரம் பெட்ரோல் "பங்க்'கில் ஊழியராக பணியாற்றி
வருகிறார்.நேற்று முன்தினம் இரவு 10.30 மணியளவில் பெட்ரோல் "பங்க்'கில்
வரதராஜ் பணியில் இருந்தபோது, டூ வீலரில் வந்த ஒரு வாலிபர் பெட்ரோல்
போட்டுக் கொண்டு 1,000 ரூபாய் நோட்டை கொடுத்தார். அந்த ரூபாய் நோட்டு
வித்தியாசமாக இருந்ததால், வரதராஜ் வேறு நோட்டு தருமாறு கேட்டார். அந்த
வாலிபர் தன்னிடம் 1,000 ரூபாய் நோட்டுக்கள்தான் இருக்கிறது என தெரிவித்து,
மேலும் தன்னிடம் இருந்த 1,000 ரூபாய் நோட்டுக்கள் சிலவற்றை
காண்பித்துள்ளார்.
சந்தேகமடைந்த, "பங்க்' ஊழியர் வரதராஜ், இது குறித்து பெரம்பலூர்
போலீசுக்கு தகவல் தெரிவித்தார். பெரம்பலூர் போலீசார் அந்த வாலிபரை கைது
செய்து விசாரித்தனர். விசாரணையில், அந்த வாலிபர் வி.களத்தூர் கிராமத்தை
சேர்ந்த பக்கீர் முகமது மகன் அப்துல்காதர் (30) என்பதும், எட்டாம் வகுப்பு
வரை படித்துள்ளதும் தெரிய வந்தது. இவர் கடந்த மூன்று வருடத்திற்கு முன்,
சவுதி அரேபியாவுக்கு சென்று திரும்பியதால் கடன் ஏற்பட்டது. பெரம்பலூர்
கிரசன்ட் நகரில் வாடகை வீட்டில் குடும்பத்துடன் வசித்து வருகிறார். வடக்கு
மாதவி சாலையில் ஏ.வி.ஆர்., பார்மாசூடிக்கல்ஸ் என்ற பெயரில் மெடிக்கல்
ஏஜென்சி வைத்துக்கொண்டு, கடையிலேயே ஸ்கேனர் பிரின்டர் மூலம் ஒரிஜினல்
ரூபாய் நோட்டுக்களை ஸ்கேன் செய்து, கலர் ஜெராக்ஸ் எடுத்து, அந்த
நோட்டுக்களை கடந்த ஒரு வருடமாக புழக்கத்தில் விட்டதும் தெரியவந்தது.
பெரம்பலூர் போலீசார், அப்துல் காதர் வீட்டில் வைத்திருந்த 1,000 ரூபாய்
கள்ள நோட்டுகள் 35, கடையில் வைத்திருந்த ஸ்கேனர், பிரின்டர், கட்டிங்
மெஷின் ஆகியவற்றை பறிமுதல் செய்தனர். அப்துல் காதரை, பெரம்பலூர்
குற்றவியல் நீதிமன்றத்தில் ஆஜர்படுத்தினர். நீதிபதி செல்வகுமார்,
அப்துல்காதரை 15 நாள் காவலில் வைக்க உத்தரவிட்டார்.

ஆகா நல்ல தொழிலா இருக்கும் போலருக்கே

ஒரு தொழிலதிபரை இப்படி அநியாயமா கைது பண்ணிட்டாங்களே