புதுக்கோட்டை கல்லூரி மாணவியை கொன்று உடலில் திராவகம் ஊற்றிய மாணவர்

தஞ்சை மாவட்டம் பேராவூரணி அருகேயுள்ள பெருமகளூர் கே.ஆர்.புரத்தை சேர்ந்தவர் அடைக்கலம். இவரது மகள் வனிதா(வயது18). புதுக்கோட்டை அரசு கல்லூரியில் முதலாமாண்டு படித்து வந்தார்.

இவரது பக்கத்து வீட்டை சேர்ந்தவர் முருகன் மகன் கண்ணதாசன்(21). இவர் ஆலங்குடியில் உள்ள பாலிடெக்னிக் கல்லூரியில் மூன்றாமாண்டு படித்து வருகிறார்.

இந்நிலையில் மாணவி வனிதாவை, கண்ணதாசன் ஒருதலையாக காதலித்து வந்ததாக கூறப்படுகிறது. மாணவர் கண்ணதாசன் வனிதா செல்லும், அதே பஸ்சில் பயணம் செய்து வந்துள்ளார்.

இந்நிலையில் நேற்று முன்தினம் கல்லூரி விடுமுறை என்பதால் வனிதா வீட்டு அருகே உள்ள வயலில் உளுந்து செடி பறிக்க சென்றார். அப்போது கண்ணதாசன் திடீரென பின்தொடர்ந்து சென்று வழிமறித்துள்ளார். இதில் அவர்கள் 2 பேருக்கும் வாக்குவாதம் ஏற்பட்டது.

இதனால் ஆத்திரமடைந்த கண்ணதாசன், வனிதாவை அடித்து உதைத்து அருகேயுள்ள வாய்க்காலுக்குள் இழுத்து சென்றார். அங்கு கழுத்தை துணியால் இறுக்கி கொலை செய்தார். பின்னர் வனிதாவின் உடல் மற்றும் முகத்தில் திராவகம் ஊற்றி விட்டு கண்ணதாசன் தப்பி சென்றார்.

இந்நிலையில் நீண்ட நேரமாக வனிதா வீடு திரும்பாததால் அவரது பெற்றோர் அதிர்ச்சியடைந்தனர். இதனால் வனிதாவை பல இடங்களிலும் தேடியும் காணவில்லை.

இந்நிலையில் நேற்று காலை வனிதா அருகேயுள்ள ஒடையில் பிணமாக கிடப்பது தெரிய வந்தது. வனிதாவின் உடலை பார்த்து அவரது பெற்றோர், உறவினர்கள் கதறி அழுதனர்.

இதுகுறித்து தகவல் அறிந்ததும் பட்டுக்கோட்டை போலீஸ் துணை சூப்பிரண்டு நாராயணசாமி, இன்ஸ்பெக்டர் ஆறுமுகம் மற்றும் போலீசார் சம்பவ இடத்திற்கு சென்று தீவிர விசாரணை நடத்தினர். கைரேகை நிபுணர்களும் ரேகைகளை பதிவு செய்தனர்.

இதற்கிடையே வனிதாவை கொலை செய்த மாணவர் கண்ணதாசன், குடும்பத்துடன் தலைமறைவாகி விட்டார். இது குறித்து பேராவூரணி போலீசார் வழக்கு பதிவு செய்து விசாரணை நடத்தி வருகின்றனர்.

கல்லூரி மாணவி கொலை சம்பவம் பேராவூரணி பகுதியில் பரபரப்பை ஏற்படுத்தியுள்ளது.