600 யூனிட்டுக்குக் குறைவான மின்நுகர்வோருக்கு கட்டண உயர்வு இல்லை

தமிழ்நாடு மின்சார ஒழுங்குமுறை ஆணையர் கபிலன் சென்னையில் இன்று செய்தியாளர்களுக்கு அளித்துள்ள பேட்டியில் கூறியதாவது:-

மின்சார கட்டணத்தை உயர்த்த வேண்டும் என்று தமிழ்நாடு மின்வாரியம் எங்களிடம் மனு செய்திருந்தது. அந்த மனுமீது ஆய்வு நடத்தி, பொதுமக்களிடம் கருத்து கேட்கப்பட்டது. சென்னை, மதுரை, திருச்சி, கோவை ஆகிய 4 நகரங்களில் நடத்தப்பட்ட கட்டண உயர்வு பற்றிய கருத்துக் கேட்புக் கூட்டத்தில் பொதுமக்கள் கலந்து கொண்டு தங்கள் ஆலோசனைகளை வழங்கினார்கள்.

தென்னக ரெயில்வே, எரிசக்தித்துறை,நிதி, தகவல் தொழில்நுட்ப செயலர்கள், மின்வாரியத்தலைவர் ஆகியோரிடமும் கலந்து பேசப்பட்டது.அதன்படி மின் கட்டணத்தை மாற்ற முடிவு எடுக்கப்பட்டது. இரண்டு மாதத்தில் 600 யூனிட்டுக்கு குறைவாக மின்சாரத்தை பயன்படுத்தும் மின் நுகர்வோர்கள், குடிசைவாசிகள், விசைத்தறி, கைத்தறியாளர்கள், பொது வழிபாட்டு தலங்கள், விவசாயிகள் ஆகியோருக்கு மின் கட்டணத்தில் எந்த மாற்றமும் இல்லை.

இரண்டு மாதத்தில் 600 யூனிட்டுக்கு மேல் மின்சாரத்தை பயன்படுத்தும் மின் நுகர்வோருக்கு யூனிட் ஒன்றுக்கு தலா ரூ.1 வீதம் மின் கட்டணம் உயர்த்தப்பட்டுள்ளது. தொழில் மின் நுகர்வோரில் உயரழுத்த வகை நுகர்வோருக்கு யூனிட் ஒன்றுக்கு 50 காசுகளும்,தாழ்வழத்த வகை நுகர்வோருக்கு யூனிட் ஒன்றுக்கு 30 காசுகளும் மின் கட்டணம் உயர்த்தப்படுகிறது.

இரு மாதங்களுக்கு 1,500 யூனிட்டுக்குமேல் பயன்படுத்தும் குடிசைத்தொழில் மற்றும் குறுந்தொழில் மின் நுகர்வோருக்கு கட்டணம் யூனிட் ஒன்றுக்கு 40 காசுகள் உயர்த்தப்படுகிறது.

இரண்டு மாதத்துக்கு 1500 யூனிட்டுகளுக்கு குறைவாக பயன்படுத்தும் தொழில் மின் நுகர்வோரின் தாழ்வழுத்த வகையினருக்கு மின்கட்டண உயர்வு இல்லை.

வணிக மின் நுகர்வோரின் உயரழுத்த வகையினருக்கு யூனிட்டுக்கு 80 காசு உயர்த்தப்பட்டுள்ளது. வணிக மின்நுகர்வோரில் தாழ்வழுத்த வகையினர் யூனிட் ஒன்றுக்கு கூடுதலாக 50 காசு செலுத்த வேண்டும்.

உயரழுத்த வகை சினிமா தியேட்டர்களுக்கு யூனிட் ஒன்றுக்கு ஒரு ரூபாய் உயர்த்தப்பட்டுள்ளது. தாழ்வழுத்த வகையினருக்கு யூனிட் ஒன்றுக்கு ரூ.1.10 உயர்த்தப்பட்டுள்ளது.

இரு மாதங்களுக்கு 200 யூனிட்டுகளுக்கு குறைவாக மின்சாரம் பயன்படுத்தும் தாழ்வழுத்தவகை வணிக மின் நுகர்வோருக்கு கட்டண உயர்வு இல்லை. இரு மாதங்களுக்கு 100 யூனிட்களுக்குக் குறைவாக மின்சாரத்தை பயன்படுத்தும் சிறுகடை வியாபாரிகளுக்கு மின் கட்டணம் யூனிட்டுக்கு ரூ.1 குறைக்கப்படுகிறது.

தனியார் கல்வி நிறுவன உயரழுத்த வகை நுகர்வோருக்கு யூனிட்டுக்கு ரூ.1 உயர்த்தப்பட்டுள்ளது. அரசு மற்றும் அரசு உதவி பெறும் கல்வி நிறுவன உயரழுத்த வகை நுகர்வோருக்கு யூனிட்டுக்கு 50 காசுகள் அதிகரிக்கப்பட்டுள்ளது.

தனியார் கல்வி நிறுவன தாழ்வழுத்தவகை நுகர்வோருக்கு யூனிட்டுக்கு கூடுதலாக ரூ.1.10 உயர்த்தப்பட்டுள்ளது. அரசு மற்றும் அரசு உதவி பெறும் கல்வி நிறுவனங்களுக்கு யூனிட்டுக்கு 40 காசுகள் உயர்த்தப்பட்டுள்ளது.

இந்த கட்டண மாற்றம் நேற்று (ஆகஸ்ட்-1) முதல் அமலுக்கு வருகிறது. இந்த விலை மாற்றம் காரணமாக மின்வாரியத்துக்கு 1651 கோடி ரூபாய் வருவாய் கிடைக்கும். நடப்பாண்டில் 6450 கோடி ரூபாய் இழப்பு ஏற்பட்டுள்ளது. 100% பற்றாக்குறையில் 20% அளவே கட்டண உயர்வு அமல்படுத்தப் பட்டுள்ளது.

600 யூனிட்டுக்கு மேல் மின்சாரம் பயன்படுத்துபவர்கள் தமிழ்நாட்டில் 5 லட்சத்து 15 ஆயிரத்து 299 பேர் உள்ளனர். 600 யூனிட்டுக்கு குறைவாக பயன்படுத்துபவர்கள் எண்ணிக்கை 1 கோடியே 53 லட்சம் பேர் இருக்கிறார்கள். இந்த 1 கோடியே 53 லட்சம் பேருக்கு கட்டண உயர்வு இல்லை.

3% மக்கள்தான் கூடுதல் மின்கட்டணம் கொடுக்க வேண்டியதிருக்கும். இந்த கட்டண திருத்தம் 2013-ம் ஆண்டு வரை அமலில் இருக்கும்.

தற்போது வீட்டு மின் நுகர்வோருக்கு யூனிட்டுக்கு 75 காசு முதல் ஒரு ரூபாய் 70 காசு வரை அரசு மானியமாக கொடுக்கிறது. இதேபோல கைத்தறி நெசவாளர்களுக்கு ஒரு ரூபாய் 10 காசு முதல் ஒரு ரூபாய் 30 காசு வரையிலும் விசைத்தறி நெசவாளர்களுக்கு ஒரு ரூபாய் 40 காசும் விவசாயிகளுக்கு குதிரை சக்தி ஒன்றுக்கு 250 ரூபாயும் அரசு மானியமாக வழங்குகிறது.அரசின் நடப்பாண்டுக்கான மொத்த மானியத் தொகை ரூ.1652 கோடியாகும்.

கடைசியாக 2003-ம் ஆண்டு மின் கட்டணம் உயர்த்தப்பட்டது.அதன் பிறகு 7 ஆண்டுகள் கழித்து தற்போதுதான் மின் கட்டணம் உயர்த்தப்பட்டு இருக்கிறது என்று கூறினார்.

பேட்டியின்போது தமிழ்நாடு மின்சார ஒழுங்கு முறை ஆணைய உறுப்பினர் வேணுகோபால் உடன் இருந்தார்