மது விருந்து!: புனா எம்.பி.ஏ., மாணவ மாணவிகள் கைது!

காவல் துறை அனுமதி இல்லாமல் மது மற்றும் போதைப் பொருட்களோடு
நண்பர்கள் விழாவைக் கொண்டாடிய கல்லூரி மாணவ, மாணவிகள் 350 பேரை புனா
போலீசார் கைது செய்தனர்.

உலகம் முழுக்க நேற்று நண்பர்கள் தினம் கொண்டாடப்பட்டது. பூனா,
சிம்பியோசிஸ் கல்லூரியைச் சேர்ந்த மாணவ, மாணவிகளும் நண்பர்கள் தினத்தை
கோலகலமாகக் கொண்டாட முடிவு செய்தனர். புனாவில் இருந்து 30 கிலோ மீட்டர்
தூரத்தில் உள்ள தியார் என்ற பகுதியில் பண்ணை வீடு ஒன்றை தேர்வு செய்தனர்.

பண்ணை வீட்டில் நேற்று மாலை தொடங்கிய நண்பர்கள் தின கொண்டாட்டம் மது
போதைகளுடன் நள்ளிரவைத் தாண்டியும் நடைபெற்றுள்ளது. தகவல் கிடைத்தவுடன்
விரைந்து வந்த போலீசார் காவல் துறை அனுமதி இல்லாமல் விருந்து நடத்திய மாணவ
மாணவிகள் 350 பேரையும் கைது செய்தது.

மும்பை தடைச்சட்டம் அடிப்படையில் இந்த மாணவர்கள் அனைவரும் மருத்துவ
பரிசோதனைக்கு அனுப்பப்பட்டு, அவர்கள் ரத்தத்தில் கலந்துள்ள மதுவின் அளவு
கண்டறியப்படுகிறது.

மாணவிகளை விசாரித்த போலீசார் அவர்களிடம் வாக்குமூலக் கடிதம் எழுதி
வாங்கிக்கொண்டு அவரவர் வீட்டுக்கு அனுப்பி உள்ளனர். விசாரணையின் போது
அவர்கள் ஆஜராக வேண்டும். விருந்துக்கு ஏற்பாடு செய்த மாணவர்களிடம்
தொடர்ந்து விசாரணை நடத்தப்பட்டு வருகிறது. விசாரணைக்குப் பிறகு அவர்களை
ஜாமீனில் விட போலீசார் முடிவு செய்துள்ளனர்.

இந்நிகழ்வு குறித்து கவலை தெரிவித்துள்ள சிம்பியோசிஸ் கல்லூரியின்
இயக்குநர் டாக்டர். வித்யா எராவட்கர் கூறுகையில், 'குறிப்பிட்ட அளவு
தாமதத்துடன் விடுதிக்கு திரும்புவோம் என்று மாணவர்கள் அனுமதி கேட்டனர்.
ஆனால் கல்லூரி நடத்தை விதிமுறைகளைத் தாண்டியும் அவர்கள் திரும்பவில்லை.

இந்த நண்பர்கள் விருந்தில் போதைப் பொருட்கள் எதுவும் பயன்படுத்தப்படவில்லை என போலீசார் கூறியுள்ளனர்' என்று கூறியுள்ளார்.

நண்பர்கள் விருந்தில் கலந்து கொண்டு கூத்தடித்தவர்கள் எல்லாம் எம்.பி.ஏ., படிக்கும் மாணவர்கள் என்பது குறிப்பிடத்தக்கது.