ஆசைப்பட்ட ஐஸ் அடக்கி வாசித்த மேடை!

எந்திரன் விழாவுக்கு ஒரு இளவரசியின் கம்பீரத்தோடும், அழகோடும் வந்திருந்தார் ஐஸ்வர்யாராய். இவரை அழைப்பதற்கு முன்பு ஐஸ் பற்றி விவேக் கொடுத்த பில்டப்புகள் எல்லாமே அசர வைக்கும் ஆங்கிலத்தில். (அப்பதானே அவருக்கும் நன்றாக புரியும்?) சற்றே வெட்கத்தோடு மேடையேறினார் ஐஸ். ஆனால் அதற்கு முன்பாகவே நிகழ்ச்சி ஏற்பாட்டாளர்களிடம் ஐஸ் ஒரு விஷயத்தை வலியுறுத்தியதாக தெரிகிறது. எல்லாரையும் மேடைக்கு அழைப்பது போல தன்னை அழைக்கக் கூடாது என்றும். மேடையின் பின்புறத்திலிருந்து ஸ்பெஷல் எபெக்டுகளுடன் வர வேண்டும் என்று விரும்பினாராம். ஆனால் அது கடைசிவரை நிறைவேறவில்லை.

தன்னை ஸ்டேஜுக்கு அழைத்த விவேக் உள்ளிட்ட அத்தனை பேரையும் புகழ்ந்து பேசிய ஐஸ் நிகழ்ச்சியின் மையப்புள்ளியான ரஜினி பற்றி பேச மறந்துவிட்டு நாலடி நகர, பின்பு போன வேகத்தில் ஓடிவந்து மூச்சிரைக்க பேசியது தனி அழகு.

எந்திரன் படம் ரொம்ப ஸ்பெஷல். எனக்கும் இந்த படம் ஸ்பெஷல்தான். இந்த படத்துக்காக இரண்டு வருடம் கஷ்டப்பட்டு முழுமையான ஈடுபாட்டுடன், நம்பிக்கையுடன் நடித்திருக்கிறேன். படத்தை மிகவும் பிரமாண்டமான முறையில் தயாரித்திருக்கிறது சன் பிக்சர்ஸ். இந்த படம் இந்திய சினிமாவின் புதிய அடையாளமாக உலகம் முழுவதும் வெற்றிபெறும் என்ற நம்பிக்கை எனக்கு இருக்கிறது. அதற்காக கலாநிதிமாறனுக்கு நன்றி சொல்ல வேண்டும். எந்திரனில் பணியாற்றிய அனைத்து தொழில்நுட்ப கலைஞர்களுக்கும் என்னுடைய வாழ்த்துக்கள். இயக்குனர் ஷங்கரால் முடியாதது எதுவும் இல்லை என்று இந்த படத்தின் மூலம் நிரூபித்திருக்கிறார். படத்தின் மகத்தான வெற்றி குறித்து எனக்கு எந்த சந்தேகமும் இல்லை என்றார் ஐஸ்.