நாடாளுமன்ற முட்டுக்கட்டை நீங்குமா?

எதிர்க்கட்சிகளின் அமளியால் நாடாளுமன்றம் கடந்த ஒரு வாரமாக முடக்கப்பட்டுள்ளதற்குத் தீர்வு காண்பதற்காக எதிர்க்கட்சித் தலைவர்களுடன் நிதியமைச்சர் பிரணாப் முகர்ஜி திங்கள்கிழமை காலை ஆலோசனை மேற்கொள்ள உள்ளார்.

÷இந்தக் கூட்டத்தில் பங்கேற்குமாறு மக்களவை எதிர்க்கட்சித் தலைவர் சுஷ்மா ஸ்வராஜ், ஐக்கிய ஜனதா தள தலைவர் சரத் யாதவ், சமாஜவாதி கட்சித் தலைவர் முலாயம் சிங் யாதவ், ராஷ்ட்ரீய ஜனதா தள தலைவர் லாலு பிரசாத் யாதவ், மார்க்சிஸ்ட் கம்யூனிஸ்ட் தலைவர் பாசுதேவ் ஆச்சாரியா, இந்திய கம்யூனிஸ்ட் கட்சித் தலைவர் குருதாஸ் தாஸ்குப்தா உள்ளிட்ட கட்சிகளின் தலைவர்களுக்கு அழைப்பு விடுக்கப்பட்டுள்ளது.

÷அரசுத் தரப்பில் நிதியமைச்சர் பிரணாப் முகர்ஜியுடன் நாடாளுமன்ற விவகாரத் துறை அமைச்சர் பவன்குமார் பன்சால், வேளாண் துறை அமைச்சர் சரத் பவார் உள்ளிட்டோர் பங்கேற்கின்றனர்.

÷அதிகரித்து வரும் பணவீக்க விகிதம், பொது விநியோகத் திட்டத்தில் குறைபாடு, சர்வதேச பொருளாதார மந்த நிலை உள்ளிட்ட காரணங்களால் இதுவரை இல்லாத அளவுக்கு விலைவாசி உயர்ந்துள்ளது.

÷இந்நிலையில், ஜூன் கடைசி வாரத்தில் பெட்ரோல், டீசல் விலையை மத்திய அரசு உயர்த்தியது. ஏற்கெனவே விலைவாசி உயர்ந்துள்ள நிலையில், பெட்ரோல், டீசல் விலை உயர்வு விலைவாசி உயர்வுக்கு மேலும் வழிவகுக்கும் எனக் கூறி, பெட்ரோல் விலை உயர்வைத் திரும்பப் பெற கோரி ஜூலை 5-ம் தேதி எதிர்க்கட்சிகள் ஒருங்கிணைந்து நாடு தழுவிய வேலைநிறுத்தப் போராட்டத்தை நடத்தின.

÷1975-ல் நெருக்கடி நிலைக்குப் பிறகு முதல்முறையாக பாஜக, கம்யூனிஸ்ட் உள்ளிட்ட எதிர்க்கட்சிகள் இந்த வேலைநிறுத்தப் போராட்டத்தில் ஒருங்கே பங்கேற்றன.

÷இந்நிலையில் நாடாளுமன்றத்தின் மழைக் கால கூட்டத் தொடர் ஜூலை 26-ம் தேதி தொடங்கியது. குடியரசு முன்னாள் துணைத் தலைவர் பைரோன் சிங் ஷெகாவத் உள்ளிட்ட மறைந்த தலைவர்களுக்கு அஞ்சலி செலுத்தியவுடன் முதல் நாள் கூட்டம் நிறைவு பெற்றது.

÷2-வது நாள், விலைவாசி உயர்வு குறித்து ஒத்திவைப்புத் தீர்மானத்தின் மீது விவாதம் நடத்த வேண்டும் என எதிர்க்கட்சிகள் கோரிக்கை விடுத்தன. அரசமைப்புச் சட்ட கடமைகளில் இருந்து அரசு தவறும்பட்சத்தில்தான் ஒத்திவைப்புத் தீர்மானம் கொண்டுவர முடியும் எனக் கூறி எதிர்க்கட்சிகளின் கோரிக்கையை மக்களவைத் தலைவர் மீரா குமார் நிராகரித்தார்.

÷இதனால், இரு அவைகளிலும் அலுவல்கள் எதுவும் நடைபெறமுடியாத வகையில் எதிர்க்கட்சியினர் 4 நாள்களாக அமளியில் ஈடுபட்டனர். இதையடுத்து 4 நாள்களும் எந்த அலுவலும் நடைபெறாமல் இரு அவைகளும் ஒத்திவைக்கப்பட்டன.

÷இந்த முட்டுக்கட்டைக்கு அரசுதான் தீர்வு காண வேண்டும் என எதிர்க்கட்சிகள் தொடர்ந்து வலியுறுத்தி வந்தன.

÷இதனிடையே, பிரதமர் மன்மோகன் சிங்கை எதிர்க்கட்சித் தலைவர் சுஷ்மா ஸ்வராஜ் கடந்த வெள்ளிக்கிழமை சந்தித்துப் பேசினார். இந்த சந்திப்பிலும் எந்தவித தீர்வும் எட்டப்படவில்லை. விலைவாசி உயர்வுப் பிரச்னை தொடர்பாக நாடாளுமன்றத்தில் விவாதத்துடன் வாக்கெடுப்பு நடத்த வேண்டும் என கோரி பாரதிய ஜனதா கட்சி வெள்ளிக்கிழமை புதிய நோட்டீஸ் அளித்தது.

இந்நிலையில், இந்த மாதக் கடைசி வரை நாடாளுமன்ற கூட்டத் தொடர் நடைபெற வேண்டியுள்ளதால், முட்டுக்கட்டைக்குத் தீர்வு காண்பதற்காக எதிர்க்கட்சித் தலைவர்களுடன் நிதியமைச்சர் பிரணாப் முகர்ஜி திங்கள்கிழமை ஆலோசனை மேற்கொள்கிறார்.

÷பன்சால் நம்பிக்கை: நாடாளுமன்ற முட்டுக்கட்டைக்கு இந்தக் கூட்டத்தில் தீர்வு காணப்படும் என்று நாடாளுமன்ற விவகாரத் துறை அமைச்சர் பவன்குமார் பன்சால் நம்பிக்கை தெரிவித்தார்.

÷பணவீக்க விகிதம் காரணமாக பொருளாதார நிலையில் ஏற்பட்டுள்ள மாற்றம் குறித்து இந்த அவை கவலை கொள்கிறது எனவும், இதன் தாக்கத்தைக் குறைக்க மத்திய அரசு நடவடிக்கை எடுக்க வலியுறுத்தியும் ஒரு தீர்மானத்தை இரு அவைகளிலும் நிறைவேற்றலாம் என இந்தக் கூட்டத்தில் அரசு தரப்பில் ஒரு தீர்வாக முன்வைக்கக் கூடும் என எதிர்பார்க்கப்படுகிறது