அணுசக்தி மூலப்பொருள் மறு சுழற்சி: இந்திய-அமெரிக்க ஒப்பந்தம் கையெழுத்து

அணு மின் உலைகளில் பயன்படுத்தப்படும் அணுசக்தி மூலப் பொருள்களை மறு சுழற்சி செய்வதற்கான ஒப்பந்தத்தில் இந்தியாவும், அமெரிக்காவும் கையெழுத்திட்டன.

÷வாஷிங்டனில் உள்ள வெளியுறவு அமைச்சக வளாகத்தில் வெள்ளிக்கிழமை ஒப்பந்த கையெழுத்து நிகழ்ச்சி நடைபெற்றது. இதில் அமெரிக்காவுக்கான இந்திய தூதர் மீரா சங்கர், அமெரிக்க அரசியல் பொருளாதார விவகாரங்களுக்கான அமைச்சர் வில்லியம் பர்ன்ஸ் ஆகியோர் கையெழுத்திட்டனர்.

÷அணுசக்தியை ஆக்க பூர்வமான பணிகளுக்கு மட்டும் பயன்படுத்துவது தொடர்பாக இரு நாடுகளிடையே மேற்கொள்ளப்பட்ட ஒப்பந்தத்தின் இறுதிகட்ட நடவடிக்கையாக இந்த ஒப்பந்தம் கையெழுத்தானது.

÷இரு நாடுகளிடையிலான அணுசக்தி ஒப்பந்தத்தை நிறைவேற்றுவதில் அமெரிக்க அதிபர் ஒபாமா காட்டிவரும் தீவிரத்தின் ஒரு பகுதியாக இந்த ஒப்பந்தம் கையெழுத்தாகியுள்ளது என்று பில் பர்ன்ஸ் குறிப்பிட்டார்.

÷இந்த ஒப்பந்தத்தின்படி இந்தியாவில் உள்ள அணு உலைகளுக்கு வழங்கப்படும் மூலப் பொருளை இந்தியாவிலேயே சர்வதேச அணுசக்தி முகமை (ஐஏஇஏ) வகுத்துள்ள பாதுகாப்பு விதிகளின்படி மறு சுழற்சி செய்து கொள்ள முடியும்.

÷இந்தியா-அமெரிக்கா இடையிலான அணுசக்தி ஒப்பந்தத்தின் அடுத்த கட்டத்துக்கு முன்னேறியுள்ளதாக மீரா சங்கர் குறிப்பிட்டார்.

÷இரு நாடுகளிடையே அணுசக்தி ஒப்பந்தம் கையெழுத்தான ஓராண்டுக்குள் அடுத்தடுத்த கட்ட ஒப்பந்தங்கள் துரித கதியில் நிறைவேற்றப்பட்டு வருவதிலிருந்தே, இந்த ஒப்பந்தத்தை செயல்படுத்துவதில் இரு நாடுகளுக்கும் உள்ள ஈடுபாடு தெளிவாகப் புரியும் என்றார் அவர்.

பயங்கரவாதிகளுக்கு எதிராக கூட்டாக மேற்கொள்ள வேண்டிய நடவடிக்கைகளுக்கான ஒப்பந்தம் இந்தியா, அமெரிக்கா இடையே கடந்த வாரத்தில் புது தில்லியில் கையெழுத்தானது என்று மீரா சங்கர் குறிப்பிட்டார்.

÷இந்தியா, அமெரிக்கா இடையே மிகவும் முக்கியத்துவம் வாய்ந்த 123 அணுசக்தி ஒப்பந்தம் இரண்டு ஆண்டுகளுக்கு முன்னர் கையெழுத்தானது. இதன்படி அணுசக்திக்கான மூலப் பொருளை இந்தியாவிலேயே மறு சுழற்சி செய்வதற்கு அனுமதிப்பது என்ற விதியும் இதில் உள்ளது குறிப்பிடத்தக்கது.

÷இதற்கு முன்னர் இதுபோன்ற மறுசுழற்சி செய்வதற்கான அனுமதியை ஐரோப்பிய யூனியன் மற்றும் ஜப்பானுக்கு மட்டுமே அமெரிக்கா வழங்கியுள்ளது குறிப்பிடத்தக்கது.

÷இந்தியா, அமெரிக்கா இடையே அணுசக்தி ஒப்பந்தம் கையெழுத்தானதன் மூலம் இந்தியாவில் பல கோடி முதலீட்டில் அணுமின் திட்டங்கள் உருவாக வாய்ப்பு ஏற்பட்டுள்ளது.

÷முதல் கட்டமாக அணு ஈனுலை பூங்காவை ஆந்திரம் மற்றும் குஜராத்தில் நிறுவ முடிவு செய்யப்பட்டுள்ளதாக அமெரிக்க வெளியுறவு அமைச்சகம் வெளியிட்ட செய்திக் குறிப்பில் தெரிவிக்கப்பட்டுள்ளது. இதன் மூலம் பல ஆயிரக்கணக்கானோருக்கு வேலை வாய்ப்புக் கிடைக்கும். இந்தியாவில் அதிகரித்து வரும் மின் தேவையை சுற்றுச்சூழல் பாதிப்பின்றி பூர்த்தி செய்ய முடியும்.÷2022-ம் ஆண்டு இந்தியாவில் 35 ஆயிரம் மெகாவாட் மின்சாரத்தை அணு மின்நிலையம் மூலம் எட்ட இலக்கு நிர்ணயிக்கப்பட்டுள்ளது. 2032-ம் ஆண்டில் இது 60 ஆயிரம் மெகாவாட்டாக உயரும் என மதிப்பிடப்பட்டுள்ளது.

÷ஆந்திரம் மற்றும் குஜராத்தில் அமைய உள்ள மின் நிலையங்கள் குறித்து அமெரிக்க நிறுவனங்களுடன் இந்திய நிறுவனங்கள் பேச்சு வார்த்தை நடத்தி வருவது குறிப்பிடத்தக்கது.

ஒபாமா பயணம் வரலாறு படைக்கும்: அதிபர் ஒபாமா இந்தியாவில் நவம்பரில் மேற்கொள்ள உள்ள பயணம் வரலாறு படைக்கும் என ஒப்பந்தம் கையெழுத்தான பின் மீரா சங்கர் தெரிவித்தார்.

÷இரு நாட்டு உறவும் முன்னெப்போதும் இல்லாத அளவுக்கு மேம்படுவதுடன், சர்வதேச பிரச்னைகளுக்குத் தீர்வு காண்பதில் எவ்வாறு இரு நாடுகளும் இணைந்து பணியாற்றுகின்றன என்பதை உலகுக்கு எடுத்துக்காட்டுவதாகவும் அவரது பயணம் அமையும் என்றார்.