நீதிபதிகள், வக்கீல்கள் பரஸ்பரம் ஒத்துழைப்பு அளிக்க வேண்டும்: தலைமை நீதிபதி எம்.ஒய்.இக்பால்

நீதித்துறையை முன்னேற்ற பாதையில் நடத்துவதற்கு நீதிபதிகள், வக்கீல்கள்
பரஸ்பரம் ஒத்துழைப்பு அளிக்க வேண்டும் என்று தலைமை நீதிபதி
எம்.ஒய்.இக்பால் கூறினார்.
தமிழ்நாடு வக்கீல்கள் சங்கத்தின் சார்பில் சென்னை ஐகோர்ட்டு வளாகத்தில்
தலைமை நீதிபதி எம்.ஒய்.இக்பாலுக்கு பாராட்டு விழா நடத்தப்பட்டது. இதில்
தலைமை நீதிபதி எம்.ஒய்.இக்பால் பேசியதாவது:-
தமிழகம் மற்றும் சென்னையில் மிகப் பெரிய வக்கீல்களை நான் சந்தித்து
வருகிறேன். இங்குள்ள வக்கீல் சங்கங்கள் எனக்கு இதயப்பூர்வமாக நல்ல
ஒத்துழைப்பு தருகின்றனர். இது எதிர்காலத்தில் நீதி பரிபாலனைக்கு
தேவைப்படும் நல்ல அடையாளமாகும். அதே ஒத்துழைப்பை நானும் உங்களுக்கு
வழங்குவேன்.
தாசில்தார் ஒருவர் சான்றிதழ் வழங்கும் விவகாரத்தில் தலைமை நீதிபதிக்கு
வக்கீல் நோட்டீசு அனுப்பப்பட்டுள்ளது. அதன் கடைசி வரிகளில், "இதில்
நீங்கள் தலையிட்டு நடவடிக்கை எடுக்கத் தவறிவிட்டால், அதனால் ஏற்படும்
பின்விளைவுகளுக்கு நீங்கள்தான் பொறுப்பேற்க வேண்டும்" என்று கூறப்பட்டு
உள்ளது.
இந்த விஷயத்தில் நான் உடனடியாக நடவடிக்கை எடுக்கவில்லை. இதிலும் கூட
நான் மூத்த வக்கீல்களை அழைத்து பேசினேன். இது அவமதிப்பு நடவடிக்கைக்கு
கீழ் வரக்கூடிய விவகாரம், அதன் அடிப்படையில் நான் நடவடிக்கை எடுப்பதாகக்
கூறினேன். அந்த நோட்டீசை வாசித்த அவர்கள், எனது நடவடிக்கையை ஆமோதித்தனர்.
அப்படி நடவடிக்கை எடுத்தால் கோர்ட்டு புறக்கணிப்பு போன்ற போராட்டத்தில்
வக்கீல்கள் ஈடுபடுவார்களா? என்றும் கேட்டேன். நிச்சயமாக இல்லை என்று
தெரிவித்தனர்.
அதன் பிறகுதான் அவர்களின் சம்மதத்தோடு அந்த வக்கீல் மீது நான்
நடவடிக்கை எடுக்க முன்வந்தேன். நீதித்துறை என்பது நீதிபதிகளால் மட்டுமோ
அல்லது வக்கீல்களால் மட்டுமோ நடத்தப்படவில்லை. 2 பேரும் இணைந்து பரஸ்பரம்
ஒத்துழைப்பு வழங்கினால் மட்டுமே நீதித்துறையை சுமுகமாக முன்னேற்ற பாதையில்
நடத்திச் செல்ல முடியும். எனவே 2 தரப்பிலும் உள்ள நல்லுறவை சீர்படுத்துவது
அவசியம். இவ்வாறு அவர் பேசினார்.
தமிழ்நாடு வக்கீல்கள் சங்கத் தலைவர் எஸ்.பிரபாகரன் வரவேற்றார்.
அட்வகேட் ஜெனரல் பி.எஸ்.ராமன், கூடுதல் சொலிசிட்டர் ஜெனரல்
எம்.ரவீந்திரன், மூத்த வக்கீல்கள் ஆர்.கிருஷ்ணமூர்த்தி, என்.ஆர்.சந்திரன்,
ஏ.எல்.சோமயாஜி, எஸ்.வி.ஜெயராமன், கூடுதல் அட்வகேட் ஜெனரல் பி.வில்சன்
ஆகியோர் தலைமை நீதிபதி எம்.ஒய்.இக்பாலை பாராட்டிப் பேசினர். சுப்ரீம்
கோர்ட்டு நீதிபதியாக பதவி உயர்வு பெறுவதற்காக அவரை வாழ்த்தினர்.
சங்கத்தின் துணைத் தலைவர் அந்தோணி செல்வராஜ் நன்றி கூறினார்.
இந்த நிகழ்ச்சியில் ஐகோர்ட்டு நீதிபதிகள் கே.என்.பாஷா, சிவஞானம்,
சத்தியநாராயணன், சுந்தரேஷ் மற்றும் அரசு வக்கீல்கள், அகில இந்திய பெண்
வக்கீல் சங்க நிர்வாகி சாந்தகுமாரி உட்பட பலர் கலந்து கொண்டனர்.