போலி டாக்டர்கள் என்று கைது செய்யப்பட்ட சித்த மருத்துவர்கள் மீதான வழக்கை கைவிட உத்தரவு

போலி டாக்டர்கள் என்று கைது செய்யப்பட்ட சித்த மருத்துவர்கள் மீதான
வழக்குகளை கைவிட வேண்டும் என்று உயர் நீதிமன்றம் உத்தரவிட்டுள்ளது.
சென்னை உயர் நீதிமன்றத்தில் தமிழ்நாடு சித்த மருத்துவர்கள் நலச்
சங்கத்தின் சார்பில் மனு தாக்கல் செய்யப்பட்டு இருந்தது. அலோபதி போன்ற
நவீன மருத்துவ முறைகளை கையாளும் தங்கள் சங்கத்தினரை போலி மருத்துவர்கள்
என்ற போர்வையில் சோதனை செய்வதோ, கைது செய்யவோ கூடாது என்று உத்தரவிட
வேண்டும் என்று கோரியிருந்தனர். இந்திய மருத்துவ மைய கவுன்சில் சட்டப்படி
சித்த மருத்துவ டாக்டராக பதிவு செய்துள்ள இந்த சங்கத்தைச் சேர்ந்தவரின்
தொழில் நடவடிக்கையில் போலீசார் தலையிடக் கூடாது என்று உயர் நீதிமன்றம்
கடந்த 7.4.06 அன்று இடைக்கால உத்தரவு பிறப்பித்தது. ஆனால் இந்த
உத்தரவையும் மீறி, இந்த சங்கத்தினர் சிலரை போலீசார் போலி டாக்டர் என்ற
போர்வையில் கைது செய்ததாக, டி.ஜி.பி. மீது கோர்ட்டு அவமதிப்பு வழக்கு
தொடரப்பட்டது.
இந்த விவகாரத்தில் போலீசுக்கு அரசு கொடுத்துள்ள அறிவுரை பற்றி உயர்
நீதிமன்றம் கேள்வி எழுப்பியது. இதுதொடர்பாக போலீஸ் அதிகாரிகளுக்கு தமிழக
அரசின் சுகாதாரத் துறை அனுப்பிய கடிதம் ஒன்று தாக்கல் செய்யப்பட்டது.
அதில், "போலி மருத்துவர்களை பிடிக்கும் நடவடிக்கையின் போது, ஆங்கில
மருத்துவ முறைகளை கையாளும் சித்தா, ஆயுர்வேதா, ஓமியோபதி, யுனானி
மருத்துவர்களின் ஆஸ்பத்திரிகளும் சோதனையிடப்பட்டன. இந்திய மருத்துவ மைய
கவுன்சில் சட்டப்படி, பதிவு செய்யப்பட்டுள்ள இவர்கள் அனைவரும் பயிற்சியின்
அடிப்படையில் நவீன அறிவியல் மருத்துவம், அறுவை சிகிச்சை, மகப்பேறு
மருத்துவம், காது-மூக்கு-தொண்டை, கண் மருத்துவம் போன்றவற்றை செய்ய தகுதி
பெற்றவர்கள். எனவே தமிழ்நாடு சித்த மருத்துவ கவுன்சில், இந்திய
மருத்துவத்தின் தமிழ்நாடு வாரியம் மற்றும் தமிழ்நாடு ஓமியோபதி மருத்துவ
கவுன்சில் ஆகியவற்றில் பெயர்ப் பதிவு செய்யப்பட்டிருந்தால் அவர்களின்
தொழிலில் தலையிட வேண்டாம் என்று போலீசுக்கு அறிவுறுத்தப்பட்டு உள்ளது.
அந்த வகையில் இவர்கள் யாரையாவது கைது செய்திருந்தால், அந்த நடவடிக்கையை
மறுபரிசீலனை செய்ய வேண்டும்" என்று அதில் கூறப்பட்டு இருந்தது.
இந்த வழக்கை நீதிபதி எப்.எம்.இப்ராகிம் கலிபுல்லா விசாரித்தார்.
மனுதாரர் தரப்பில் வக்கீல் எஸ்.பிரபாகரன் ஆஜரானார். கோர்ட்டு அவமதிப்பு
வழக்கை முடித்து வைத்த நீதிபதி, "இந்த மருத்துவ முறைகளில் பதிவு
பெற்றுள்ளவர்களுக்கு எதிராக எந்த நடவடிக்கையும் எடுக்கப்படக் கூடாது.
அப்படி யார் மீதாவது நடவடிக்கை எடுக்கப்பட்டு வழக்கு பதிவு செய்யப்பட்டு
இருந்தால் அவை அனைத்தும் கைவிடப்பட வேண்டும்" என்று உத்தரவிட்டார்.