நன்மையை ஏவி, தீமையைத் தடுப்போம்

இஸ்லாமியக் கோட்பாட்டின்படி, இறைத் தூதர்களில் இறுதியாக வந்தவர் முஹம்மது நபி (ஸல்) ஆவார்.

"நன்மையை ஏவி, தீமையைத் தடுக்கின்ற பணி', ஓர் அழைப்புப் பணியாக நபி (ஸல்) அவர்களின் காலத்திற்குப் பிறகு அவர்களுடைய "உம்மத்' எனும் முஸ்லீம் சமூகத்தினர் மீது கடமையாக்கப்பட்டுள்ளது. இப்பணி, உலக இறுதி நாள் வரை தொடர வேண்டிய மார்க்கப் பணியாகவும் உள்ளது.

"நன்மையை ஏவுங்கள்' என்பதன் பொருள் விளக்கம் யாதெனில், "ஒருவர் தாமும் நன்மை செய்ய வேண்டும்; அதோடு பிறரையும் நன்மை செய்யத் தூண்ட வேண்டும்' என்பதேயாகும். ""பிறரை நன்மை செய்யும்படி ஏவுவதன் காரணமாக, ஏவுகிறவருக்கு ஒரு நன்மை கணக்கிடப்படுகிறது. ஏவப்பட்டவர், ஏவியபடி நன்மை செய்வாரெனில் அவருக்குக் கிடைக்கும் நற்பயன் போன்று ஏவியவருக்கும் கிடைக்கும். இதனால் இரண்டு பங்கு நன்மைகளை ஏவியவர் பெறுகிறார்'' என்பதாக "நபிமொழிகள்' நமக்கு விளக்கம் தருகின்றது.

அடுத்து, "ஒருவர், தான் நன்மை செய்யாதிருந்து கொண்டு, பிறரை மட்டும் நன்மை செய்யுமாறு தூண்டலாமா?' என்ற கேள்வி எழுகிறது. இப்படிச் செய்பவர்களை இரண்டு வகையாகப் பிரிக்கலாம்.

நன்மை செய்யச் சக்தியும், வாய்ப்பும் இருந்தும் வேண்டுமென்றே செய்யாதிருப்பவர் ஒரு வகை. நன்மை புரிய வேண்டுமென்ற ஆர்வம் இருந்தும் அதைச் செய்வதற்கான பொருள் வசதியும், உடல் ஆரோக்கியமும் இல்லாதிருப்பவர் இன்னொரு வகை.

முதல் வகையினர் பிறரை நன்மை செய்யுமாறு ஏவுவது போலித்தனமான செயலாகும். ஏனெனில் இவர்களுடைய எண்ணம் தூய்மையானதன்று. எனவே இத்தகையவர்கள், இறைவனிடமிருந்து எவ்வித நற்பயனையும் பெறமாட்டார்கள். மாறாக இவர்கள் இறைவனது கோபத்திற்கு ஆளாவதோடு, நரகம்தான் இவர்களுடைய புகலிடம் என்று கூறப்பட்டுள்ளது.

இரண்டாம் வகையினர், தாம் நன்மை செய்ய முடியாதிருந்தும் பிறரை நன்மை செய்யும்படி ஏவுவதன் மூலமாக, தாமும் நன்மை செய்தவருக்கு ஒப்பாகிவிடுகின்றனர். ஏனெனில் இவர்கள் தூய எண்ணத்துடன் செயல்படுகின்றனர்.

இதே போன்று, "தீமையைத் தடுங்கள்' என்பதன் பொருள் விளக்கம் யாதெனில், ஒருவர் பிறரைத் தீமை புரியாதவாறு தடுப்பதோடு தாமும் தீமை புரியாதிருப்பதாகும். ஒரு தீமை நிகழும்போது அதனைக் கண்டும் காணாதவர் போல இருந்துவிடுவது கண்டனத்துக்குரிய ஒன்றாகக் கருதப்படுகிறது. ஏனெனில், அத்தீமை தடுக்கப்படாவிட்டால் அது நல்லவர்களையும் பெரிதும் பாதித்து, அவர்களை அழிவுக்கு உள்ளாக்கிவிடுகிறது.

தீமையை எவ்வாறு தடுப்பது என்பதற்கான வழிமுறையையும் நபியவர்கள் விளக்கியுள்ளார்.

""ஒருவர் ஒரு தீமையைக் கண்டால், அவர் அதைத் தமது கையால் தடுக்கட்டும்; முடியாவிட்டால் தமது நாவால் (சொல்லால்) தடுக்கட்டும். அதுவும் முடியாவிட்டால் தமது உள்ளத்தால் அதை (வெறுத்து) ஒதுக்கட்டும்.''

மேற்கூறிய வகையில் நற்செயலை மேற்கொள்வதன் மூலமாக நாம், "சிறந்த மனிதர்' என்ற சிறப்பைப் பெறுவோமாக!

- எம்.கே.எஸ். பாவா

மிக சிறப்பானதொரு பதிவு

ஒரு சிறு திருத்தம்
நபி (ஸல்) என்று வரவேண்டிய இடத்தில நபி (ல்) என்று உள்ளது.

Hasan1 wrote:மிக சிறப்பானதொரு பதிவு

ஒரு சிறு திருத்தம்
நபி (ஸல்) என்று வரவேண்டிய இடத்தில நபி (ல்) என்று உள்ளது.

சுட்டிக்காட்டியமைக்கு நன்றி ஹசன்! மாற்றிவிட்டேன்!

சிறந்த ஒரு பதிவு !
தங்கள் பதிவிற்கு