இலவச பஸ் பாஸ் - பேருந்து ஊழியர்களால் அவமானப்படுத்தப்பட்ட மாணவி தற்கொலை!

இலவச பஸ் பாஸ் எடுத்து வர மறந்துவிட்ட பள்ளி மாணவியை, அரசு பேருந்து ஊழியர்கள் தகாத வார்த்தைகள் கூறி அவமானப்படுத்தியதால் மனமுடைந்த மாணவி தூக்கு போட்டு தற்கொலை செய்து கொண்டார். இதுதொடர்பாக, இருவர் கைது செய்யப்பட்டனர்.

கும்மிடிப்பூண்டி அடுத்த கவரப்பேட்டை அருகே தச்சூர் கிராமத்தைச் சேர்ந்தவர் முருகேசன். பஞ்சர் கடை நடத்தி வருகிறார். இவரது மகள் நித்யபிரியா(15). பொன்னேரி அரசு பெண்கள் மேல்நிலைப்பள்ளியில் ஒன்பதாம் வகுப்பு படித்து வந்தார். நேற்று முன்தினம் மாலை பள்ளி முடிந்து வீட்டுக்குச் செல்ல பொன்னேரியில் இருந்து காஞ்சிபுரம் செல்லும் (தடம் எண் 167) அரசு பஸ்சில் ஏறினார். பஸ் நடத்துனர் உமாபதி மாணவியிடம் பஸ் பாஸ் கேட்டார். பஸ் பாஸ் கொண்டு வராததால், பயத்தில் சக மாணவனுடைய பஸ் பாசை அவர் காண்பித்தார். இதை கண்ட கண்டக்டர், பஸ் பாஸ் இல்லாமல் பயணித்த மாணவியை, பொன்னேரி அரசு போக்குவரத்து பஸ் டெப்போவில் ஒப்படைத்து விட்டுச் சென்றார்.

டெப்போ மேற்பார்வையாளர் ஜான்சுந்தர் (57), நேரக் காப்பாளர் ராஜேந்திரன் (48) ஆகியோர் அம்மாணவியை தகாத வார்த்தைகளால் பேசினர். பின், மாணவியின் தந்தைக்கு மொபைல் போனில் தொடர்பு கொண்டு, தகவல் தெரிவித்து விட்டு மாணவியை விடுவித்தனர். அங்கிருந்து வீட்டுக்குச் சென்ற நித்யபிரியா அவமானம் தாங்காமல் தன் தாய் விமலாவிடம் சம்பவத்தைக் கூறி அழுதுள்ளார். தாய் கடைக்குச் சென்ற நேரம் பார்த்து, தன் பள்ளி சீருடை துப்பட்டாவில் தூக்கிட்டு தற்கொலை செய்து கொண்டார்.

இதையறிந்த தச்சூர் கிராம மக்கள் ஆவேசமடைந்து, தச்சூர்- பொன்னேரி சாலையில் திடீர் மறியலில் ஈடுபட்டனர். பொன்னேரி நோக்கி வந்த மாநகர பஸ்சின், முன்பக்க கண்ணாடியை உடைத்தனர். சம்பவ இடத்துக்கு பொன்னேரி டி.எஸ்.பி., ரங்கராஜன், கும்மிடிப்பூண்டி டி.எஸ்.பி., ருத்ரசேகரன் மற்றும் ஏராளமான போலீசார் குவிக்கப்பட்டனர். மேலும், அசம்பாவிதம் ஏற்படாமல் இருக்க கிராம மக்களிடம் போலீசார் சமாதான பேச்சு வார்த்தை நடத்தினர். சம்பவ இடத்துக்கு மாவட்ட ஆட்சித் தலைவர் வர வேண்டும். அவரிடம் எங்கள் வேதனையை தெரிவிக்க வேண்டும். மாணவியின் சாவிற்கு காரணமான போக்குவரத்து ஊழியர்களை கைது செய்ய வேண்டும் எனக் கூறி மறியலை கைவிட மறுத்தனர்.

மாலை 6 மணிக்கு துவங்கிய சாலை மறியல், இரவு 11 மணி வரை நீடித்தது. இதனால் பொன்னேரி, பழவேற்காடு, மீஞ்சூர் சாலை போக்குவரத்து பாதிக்கப்பட்டது. இதையடுத்து, அதிரடி படை காவல்துறையினர் வரவழைக்கப்பட்டு, ஆர்ப்பாட்டத்தில் ஈடுபட்ட மக்கள் மீது தடியடி நடத்தி போக்குவரத்தை சீர்செய்தனர்.

பொதுச் சொத்தை சேதப்படுத்தி போக்குவரத்திற்கு இடையூறாக செயல்பட்டதாக, தச்சூர் கிராமத்தைச் சேர்ந்தபொதுமக்கள் 14 பேரைகாவல்துறையினர் கைது செய்தனர். இதனிடையே, பள்ளி மாணவியின் தந்தை முருகேசன் கொடுத்த புகாரின் பேரில்பேருந்து நடத்துனர் உமாபதி, நேரக் காப்பாளர் ராஜேந்திரன் மற்றும் மேற்பார்வையாளர் ஜான்சுந்தர் ஆகியோர் மீது காவல்துறையினர் வழக்கு பதிந்தனர். இதில் ராஜேந்திரன் மற்றும் ஜான்சுந்தர் ஆகியோரை கைது செய்த போலீசார் நடத்துனர் உமாபதியை தேடி வருகின்றனர்.

அரசு கொடுக்கும் பஸ் பாஸ் விவகாரத்தில் அரசு போக்குவரத்து துறையினர் சம்பந்தப்பட்ட மாணவ மாணவிகளிடம் அலட்சியமாக நடந்து கொள்ளும் சம்பவம் தொடர்ந்து நடைபெற்று வருகிறது. அரசுப் பணியாளர்கள் தங்கள் கடமையை உணர்ந்து அரசின் திட்டங்கள் ஏழைய எளிய மக்களைச் சென்றடையும் வகையில் பணியாற்றும் காலம் வருமா?

பேய் அரசாலும் நாட்டில் இப்படிதான் நடக்கும்