லஞ்சம் வாங்கிய திரைப்பட தணிக்கை அதிகாரி கைது

புதிய திரைப்படம் ஒன்றை தணிக்கை செய்வதற்காக ரூ. 10 ஆயிரம் லஞ்சம் வாங்கியதாக மத்திய திரைப்பட தணிக்கை வாரிய சென்னை மண்டல இயக்குநர் ராஜசேகர் சிபிஐ அதிகாரிகளால் செவ்வாய்க்கிழமை மாலையில் கைது செய்யப்பட்டார்.
மத்திய திரைப்பட தணிக்கை வாரியத்தின் சென்னை மண்டல அலுவலகம் நுங்கம்பாக்கம் சாஸ்திரி பவன் வளாகத்தில் உள்ளது. இந்த அலுவலகத்தில் மண்டல இயக்குநராக ராஜசேகர் இருந்து வருகிறார்.

காதல் சொல்ல வந்தேன் என்ற புதிய திரைப்படத்தை இயக்குநர் ஜி. பூபதி பாண்டியன் இயக்கியுள்ளார். அமைச்சர் பரிதி இளம்வழுதியின் நெருங்கிய உறவினரான பாலாஜி இதில் கதாநாயகனாக அறிமுகமாகியுள்ளார். வேணுகோபால் இந்த படத்தை தயாரித்துள்ளார். இதன் செயல் தயாரிப்பாளர் கோவிந்தராஜ்.

தயாரிப்பு தொடர்பான அனைத்து பணிகளும் முடிந்த நிலையில் படத்தினை பார்த்து சான்று அளிக்க வேண்டும் என்று அதன் இயக்குநர், தயாரிப்பாளர், செயல் தயாரிப்பாளர் ஆகியோர், சென்னையில் திரைப்பட தணிக்கை அதிகாரியாக உள்ள ராஜசேகரிடம் கோரினராம்.

இவ்வாறு படத்தை பார்த்து தணிக்கை குழுவுக்கு பரிந்துரைக்க ரூ. 10 ஆயிரத்தை லஞ்சமாக தர வேண்டும் என ராஜசேகர் படத்தயாரிப்பு குழுவினரிடம் கேட்டாராம்.

இது தொடர்பாக படத்தின் செயல் தயாரிப்பாளர் கோவிந்தராஜ், சிபிஐயின் லஞ்ச ஒழிப்புப் பிரிவு அதிகாரிகளிடம் புகார் செய்தார்.

இந்த புகாரின் அடிப்படையில் வழக்குப் பதிவு செய்த சிபிஐ அதிகாரிகள், சாஸ்திரி பவனில் உள்ள திரைப்பட தணிக்கை வாரிய மண்டல அலுவலகத்தில் வைத்து கோவிந்தராஜிடம் இருந்து ரூ. 10 ஆயிரத்தை வாங்கும் போது ராஜசேகரை செவ்வாய்க்கிழமை மாலை கைது செய்தனர்.
அதே அலுவலகத்தில் தனி அறையில் வைத்து அவரிடம் சிபிஐ அதிகாரிகள் தொடர்ந்து விசாரணை நடத்தி வருகின்றனர்.