தூக்கமும் நோய்தான்! - Narcolepsy

‘‘சிலபேர் எப்ப பார்த்தாலும் தூங்கிக்கிட்டே இருப்பாங்க. இன்னும் சிலபேரு, தூக்கமே வரமாட்டேங்குதுனு புலம்பிகிட்டே இருப்பாங்க. இந்த ரெண்டுமே தூக்கம் சம்பந்தமா வர்ற நோய்தான்’’ என்கிறார் திருச்சி கி.ஆ.பெ.வி. அரசு மருத்துவக் கல்லூரி மூளை நரம்பியல் துறை பேராசிரியர் டாக்டர் அலீம். ‘தூக்கத் தொந்தரவு’ என்ற தலைப்பில் இவர் ஆய்வு செய்திருக்கிறார் என்பது குறிப்பிடவேண்டிய விஷயம்.

‘‘உலகத்துல 7லேந்து 18 சதவீதம் பேருக்கு தூக்கப் பிரச்னை இருக்கு. இதுல, 3லேந்து 13 சதவீதம் பேருக்கு தூக்க மாத்திரை இல்லாம தூக்கம் வர்றதே இல்ல. 4 முதல் 10 மணி நேரம் வரைக்கும் தூங்கறது சராசரி தூக்க நேரம்னு நிறைய பேர் நினைக்கிறாங்க. இது தப்பு. 7 மணி நேரம் தூங்கறதுதான் சரியான தூக்க நேரம். 4 மணி நேரத்துக்கு குறைவாகவும், 10 மணி நேரத்துக்கு அதிகமாகவும் தூங்கற நபர்களிடம்தான் இறப்பு விகிதம் அதிகமா இருக்கு. தூக்கத்தை இருவகையா பிரிக்கலாம். கண் அசைவுள்ள தூக்கம், கண் அசைவற்ற தூக்கம். தூங்க ஆரம்பிச்சதும் 90 முதல் 100 நிமிடங்களுக்கு கண் அசைவுத் தூக்கம் இருக்கும். அதுக்கப்புறம் கண் அசைவற்ற தூக்கம். இது இரவுல மாறி மாறி நடக்கும். தூக்கத்துலதான் பல்வேறு சுரப்பிகள் சுரக்குது. அதனால சீரான தூக்கம் முக்கியம். தூக்கம் சரியா வரலைன்னா அசதி, பொறுமை இழப்பு, மனதை ஒருநிலைப்படுத்துவதில் சிரமம்னு பல பிரச்னைகள் வந்துடும்.

தூக்கப் பிரச்னைகள் வயதுக்கு தகுந்தபடி மாறுபடுது. இரவுல சிறுநீர் கழித்தல், இரவு பயம், தூக்கத்துல நடக்கறது இதெல்லாம் குழந்தைங்ககிட்ட இருக்கிற பிரச்னைகள். தூக்கமின்மை அல்லது அதிகத் தூக்கம் வயசானவங்களுக்கு வர்ற பிரச்னை. நார்கோலெப்ஸி, (Narcolepsy) கேட்டாபிளக்ஸி மாதிரியான தூக்க நோய்கள் குழந்தைப் பருவத்துல ஆரம்பிச்சு வாழ்நாள் பூரா நீடிக்கும். தூக்கமின்மை ஒருகட்டத்துல மனநோய்கள், உடல் நோய்கள், போதைப் மருந்துப் பழக்கம் மாதிரியான செயல்களுக்கு கொண்டு போய் விட்டுடும். சிலர் படுத்ததுமே தூங்கிடுவாங்க. ஆனா, 2 அல்லது 3 மணி நேரத்துக்குள்ள விழிச்சுக்குவாங்க. இவங்களுக்கு தூக்கமும், விழிப்பும் மாறி மாறி வரும். ஜீரண மண்டலத்தில் பிரச்னை இருந்தா இப்படிப்பட்ட பாதிப்புகள் தோன்றும்.


40 முதல் 60 வயதுள்ளவர்களிடம் உள்ள பிரச்னை குறட்டை. இந்த நபர்கள் இரவுல உளறவும் செய்வாங்க. காலைல விழிச்சதும் தூக்க உணர்வு, தலைவலி மாதிரியான பாதிப்புகள் இருக்கும். இதுக்கு சரியானபடி சிகிச்சை எடுத்துக்கலைனா நோய் தீவிரமாகிடும். தூக்கத் தாக்கு என்ற நோய், பகல் நேரத்துல அதிக தூக்கத்தை உண்டாக்கிடும்.

நாம உறங்கற இடம், அதிக குளிர்ச்சியாகவோ சூடாகவோ இருக்கக்கூடாது. வெளிச்சம், சப்தம் கூடாது. படுக்கறதுக்கு முன்னாடி சிகரெட் பிடிக்கக் கூடாது. படுக்கறதும், விழிக்கிறதும் ஒரே நேரமா இருக்கணும். தூங்குவதற்கு 4 & 6 மணி நேரத்துக்கு முன்னால காபி, டீ குடிக்கக்கூடாது. மது அருந்தினா இரவுல அடிக்கடி விழிப்பு வரும். அதனால தூக்கத்துக்கு மதுவும் எதிரிதான். இதைவிட முக்கியம், இரவு நேரத்துல அளவோடு சாப்பிடணும். அதிகமா சாப்பிட்டா தூக்கம் சரியா வராது’’ என்கிறார் டாக்டர் அலீம்.