ஆந்திராவில் 12 தொகுதிகளில் இடைத்தேர்தல் சாராயம் விற்பனை: ரூ.47 கோடி அதிகரிப்பு

ஆந்திராவில் தனி தெலுங்கானா கோரிக்கையை வலியுறுத்தி தெலுங்கானா ராஷ்ட்ரீய சமிதி கட்சியைச்சேர்ந்த 12 எம்.எல்.ஏ.க்கள் பதவி விலகினார்கள்.

அந்த 12 சட்டசபை தொகுதிகளுக்கும் நாளை (செவ்வாய்க்கிழமை) தேர்தல் நடைபெற உள்ளது. இந்த தேர்தலுக்கான பிரசாரம் 12 தொகுதிகளிலும் நேற்று மாலை முடிந்தது.

12 தொகுதிகளிலும் காங்கிரஸ், தெலுங்குதேசம், தெலுங்கானா ராஷ்டீரிய சமிதி கட்சிகளிடையே மும்முனைப்போட்டி ஏற்பட்டுள்ளது. கடந்த 20 நாட்களாக 12 தொகுதிகளிலும் விறு விறுப்பான பிரசாரம் நடந் தது. தேர்தல் பிரசாரத்துக்கு, பணம் கொடுத்துதான் ஆட்களை திரட்ட வேண்டிய நிலை அரசியல் கட்சிகளுக்கு ஏற்பட்டது.

தேர்தல் பிரசாரம் செய்ய வரும் ஒவ்வொருவருக்கும் தினமும் ரூ. 250 மற்றும் மதியம் பிரியாணி கொடுக்கப்பட்டது. இது தவிர சாராயம் குடிக்க ஒவ்வொரு தொண்டருக்கும் தனியாக 50 ரூபாய் கொடுத்தனர். பிரசாரத்துக்கு கோஷம் போட வரும் ஆட்களை தக்க வைத்துக்கொள்வதற்காக காங்கிரஸ், தெலுங்குதேசம், தெலுங்கானா ராஷ்டீரிய சமிதி ஆகிய 3 கட்சித் தலைவர்களும் போட்டிப்போட்டு சாராயம் குடிக்க பணம் கொடுத்தனர்.

12 தொகுதிகளிலும் சாராயம் குடிப்பவர்கள் எண்ணிக்கை அதிகரித்ததால் சாராயம் விற்பனை பல கோடி ரூபாய் அளவுக்கு அதிகரித்தது. கரீம் நகர் மாவட்டத்தில் 5 தொகுதிகளில் தேர்தல் நடக்கிறது. அந்த 5 தொகுதிகளிலும் கடந்த 20 நாட்களில் ரூ. 22 கோடிக்கு சாராயம் அதிகமாக விற்றுள்ளது.

வாரங்கல் மாவட்டத்தில் ரூ. 8 கோடிக்கும், மேடக் மாவட்டத்தில் ரூ. 8 கோடிக்கும் அடிலாபாத் மாவட்டத்தில் ரூ. 11 கோடிக்கும் கூடுதலாக சாராயம் விற்பனை ஆகி உள்ளது. நிஜாமாபாத் மாவட்டத்தில் எவ்வளவு சாராயம் விற்றுள்ளது என்று இதுவரை தெரியவில்லை. கரீம் நகர் மாவட்டத்தை விட நிஜாமாபாத் மாவட்டத்தில் கூடுதலாக சாராயம் விற்பனை ஆகி இருக்கலாம் என்று கூறப்படுகிறது.

சாராய விற்பனை அதிகரிப்பு பற்றி அதிகாரப்பூர்வமாக தெரிய வந்த கணக்கெடுப்புப்படி ரூ. 47 கோடிக்கு சாராயம் விற்றுள்ளது. நிஜாமாபாத் மாவட்டத்தில் நடக்கும் இடைத்தேர்தல் தொகுதிகளில் விற்ற சாராயத்தையும் கணக்கெடுத்தால் ரூ. 60 கோடியை தாண்டும் என்று தெரிகிறது.

நாளை ஓட்டுப்பதிவு மற்றும் வாக்கு எண்ணிக்கை தினத்தன்றும் சாராயம் குடிப்பது அதிக அளவில் இருக்கும் என்று தெரிகிறது. 12 தொகுதிகளிலும் நேற்று முதல் செவ்வாய்க்கிழமை வரை மதுக்கடைகளை மூட உத்தரவிடப்பட்டுள்ளது. என்றாலும் 2 நாட்களுக்கு முன்பே அரசியல் தலைவர்கள் ஏராளமான சாராய பாட்டில்களை வாங்கி இருப்பு வைத்துள்ளனர்.
தொண்டர்களுக்கு காசும், சாராயம் கொடுத்ததில் காங்கிரஸ் கட்சி முதல் இடத்தில் இருப்பதாக சாராய விற்பனையாளர்கள் கருத்து தெரிவித்துள்ளனர்.