பளுதூக்குதல் அமைப்பிலும் செக்ஸ் சர்ச்சை

புதுடில்லி : பெண்கள் ஹாக்கியை தொடர்ந்து, இந்திய பளுதூக்குதல் கூட்டமைப்பிலும் செக்ஸ் சர்ச்சை வெடித்துள்ளது. ஜூனியர் வீராங்கனைகளுக்கு பயிற்சியாளர் ரமேஷ் மல்கோத்ரா, செக்ஸ் ரீதியான தொல்லை கொடுத்ததாக ஒலிம்பிக் நட்சத்திரம் மல்லேஸ்வரி புகார் கூறினார். இதையடுத்து மல்கோத்ரா "சஸ்பெண்ட்' செய்யப்பட்டார். அடுத்து பொது செயலர் சகதேவ் யாதவையும் நீக்க வேண்டுமென கோரிக்கை விடுக்கப்பட, பிரச்னை பெரிதாகியுள்ளது.

இந்திய அணியின் பளுதூக்குதல் பயிற்சியாளர் ரமேஷ் மல்கோத்ரா. வரும் அக்டோபரில் நடக்க உள்ள காமன்வெல்த் போட்டியில் பங்கேற்க உள்ள இளம் வீராங்கனைகளுக்கு பயிற்சி அளித்து வருகிறார். இவர் மீது, சிட்னி ஒலிம்பிக்கில் வெண்கலம் வென்ற பளுதூக்குதல் வீராங்கனை மல்லேஸ்வரி, செக்ஸ் புகார் கூறினார். ஜூனியர் வீராங்கனைகளிடம் தவறாக நடந்து கொள்வதாக குற்றம்சாட்டினார். இதை தொடர்ந்து மல்கோத்ரா "சஸ்பெண்ட்' செய்யப்பட்டார்.

விசாரணை கமிட்டி: இது பற்றி இந்திய பளுதூக்குதல் கூட்டமைப்பின்(ஐ.டபிள்யு.எப்.,) பொது செயலர் சகதேவ் யாதவ் கூறுகையில்,""பயிற்சியாளர் பொறுப்பில் இருந்து மல்கோத்ரா விடுவிக்கப் பட்டுள்ளார். இவர் மீதான புகார் பற்றி கும்பாசி சுப்ரமணியா தலைமையிலான 3 நபர் குழு விசாரித்து, 7 நாட்களில் அறிக்கை தாக்கல் செய்யும்,'' என்றார்.

மல்கோத்ரா ஆவேசம்: இதற்கு மல்கோத்ரா கடும் ஆட்சேபம் தெரிவித்தார். இது குறித்து இவர் கூறுகையில்,""எனது 26 ஆண்டு கால பயிற்சியாளர் பணிக்கு மல்லேஸ்வரி களங்கம் ஏற்படுத்தியுள்ளார். அவருடன் போனில் பேசியதன் அடிப்படையில் புகார் கொடுத்து உள்ளார். உரையாடலை முழுமையாக வெளியிட்டால் உண்மை தெரிய வரும். என்னிடம் பயிற்சி பெற்று வரும் வீராங்கனைகளிடம் விசாரித் தால், நான் தவறு எதுவும் செய்யவில்லை என்பதை கண்டறியலாம். கடந்த 2004ல் நடந்த ஒலிம்பிக் போட்டிக்கான தேர்வின் போது மல்லேஸ்வரிக்கு ஆதரவு தெரிவிக்கவில்லை. அதற்காக, இப்போது பழிதீர்க்கிறார்,''என்றார்.

நடவடிக்கை தாமதம்: இப்பிரச்னை குறித்து மல்லேஸ்வரி கூறியது: மல்கோத்ரா மீது கடந்த பிப்ரவரியில் நடந்த ஐ.டபிள்யு.எப்., செயற்குழு கூட்டத்தில் புகார் கூறினேன். ஆனால், எந்த நடவடிக் கையும் எடுக்கவில்லை. மாறாக, அவரது பெயரை துரோணாச்சார்யா விருதுக்கு பரிந்துரை செய்தனர். தற்போது ஐ.டபிள்யு.எப்., துணை தலைவர் என்ற முறையில் மீண்டும் புகார் கூறினேன். மல்கோத்ராவை "சஸ்பெண்ட்' செய்தால் மட்டும் போதாது. தாமதமாக நடவடிக்கை எடுத்த பொது செயலர் சகதேவ் யாதவையும் நீக்க வேண்டும். இவரை பதவியில் இருந்து தூக்கி எறியாவிட்டால், மல்கோத்ரா போன்றவர்கள் மீண்டும் பயிற்சியாளராக நியமிக்கப்படுவர். இவ்வாறு மல்லேஸ்வரி கூறினார்.