"என் பாம்பு கணவரை கொன்னுட்டீங்களே...' : 14 வயது சிறுமி வினோதம்

arularjuna · arularjuna Thu Jul 22, 2010 12:20 pm

புவனேஷ்வர் : "அய்யயோ... என் பாம்பு கணவரை கொன்னுட்டீங்களே...' என ஒரு சிறுமி, தன் பெற்றோரைப் பார்த்துக் கதறி அழுதால் எப்படி இருக்கும்? ஊரே அதிரும்! இச்சம்பவம், ஒரிசாவில் உண்மையாகவே நடந்தது.

வடக்கு ஒரிசாவில், பலாசோர் மாவட்டத்திலுள்ள பகார்டா கிராமத்தைச் சேர்ந்தவர் கார்த்திக் சேத்தி. இவரது வீட்டிற்குள் விஷப் பாம்பு ஒன்று புகுந்து விட்டது. அதை அவரும், அவர் மனைவியும் அடித்துக் கொன்றனர். அதைக் கண்ட சேத்தியின் 14 வயது மகள் கனி, திடீரென விக்கி, விக்கி அழத் துவங்கினாள். காரணம் கேட்ட போது, அந்த பாம்பு முற்பிறவியில் தன் கணவர் என்றும், தற்போது தன்னுடன் வாழவே அந்த பாம்பு வீட்டிற்கு வந்ததாகவும் தெரிவித்தாள். இதைக் கேட்டு குடும்பத்தினர் கடும் அதிர்ச்சியடைந்தனர். கனியை சமாதானப்படுத்த முயன்றனர்; முடியவில்லை. ஊர் மக்கள், கனியையும், இறந்த பாம்பையும் பார்ப்பதற்காக, அவர்கள் வீட்டு முன் கூடி விட்டனர். கனி தொடர்ந்து பாம்புக்காக அழுது கொண்டே இருந்தாள். இந்த விஷயம் உள்ளூர் தொலைக்காட்சி செய்தியிலும் இடம் பிடித்தது.

எரிச்சலடைந்த கனியின் குடும்பத்தினர், இறந்த பாம்பை அருகிலுள்ள மைதானத்தில் தூக்கி எறிந்து விட்டனர். இதனால், கோபமடைந்த கனி, அருகிலுள்ள கோவிலுக்கு ஓடிச் சென்று, அங்கு "சாமியாட' தொடங்கினாள். கலக்கமடைந்த குடும்பத்தினர், உள்ளூர் மந்திரவாதியை அணுகி, சிறப்பு பூஜைகளுக்கு ஏற்பாடு செய்தனர். அதன்படி, கனிக்காக சிறப்பு பூஜைகளும், சில சடங்குகளும் செய்யப்பட்டன. அதன் பிறகே, கனி இயல்பு நிலைக்கு திரும்பினாள். வழக்கத்திற்கு மாறான நடவடிக்கைகளையும் நிறுத்தினாள். தற்போது, வழக்கம் போல இயல்பாக இருக்கிறாள்.இந்த சம்பவம் அம்மாவட்டத்தில் பெரும் பரபரப்பை ஏற்படுத்தியது.