மௌனம் சுமக்கும் பறவைகள்

நியாஸ் அஷ்ரஃப் · 15/06/2010

குடைகள் போல் நிழல்
பரிமாறிக் கொண்டிருந்த
பெரு மரங்களையெல்லாம்
நான்கு வழிப் பயணத்திற்காக,
பிடுங்கியெறிந்து
பறவைகளையும் பசுமைகளையும்
விரட்டி அடித்தாயிற்று.

நீள அகலங்களை
அளவு நாடாக்களில் அளந்தும்
தொன்மக் குடிகளின் மீது
அம்புக் குறிகளிட்டும்
அப்பாவி மக்களை
அப்புறப்படுத்தியாயிற்று.

பச்சை வயல்களில்
கட்டிடங்களை விளைவித்துக் கொள்ள
குளிர்சாதன அறைகளில்
தலைவர்களிடையே
கையொப்பங்கள் பரிமாறியாயிற்று.

பூர்வீகத்தைத் தொலைத்த
மண்ணின் மைந்தர்களை
உளைச்சல் மிகுந்த உள்ளத்தோடு
நகர்ப்புறங்களில்
அகதிகளாக்கியாயிற்று.

மரங்களை இழந்த பறவைகளும்
தங்களது மொழியினை மறந்தபடி
பறந்து கொண்டிருக்கிறது
மௌனத்தை சுமந்தபடி.

- கதிர்மதி

மஞ்சுபாஷிணி · மஞ்சுபாஷிணி Tue Jul 20, 2010 10:36 pm

இருக்க இடமில்லாது இன்னும் இழக்க ஒன்னுமில்லாது சோகம் சுமந்த வரிகளாய் நீங்கள் ரசித்த பகிர்வை எங்களுடன் பகிர்ந்தமைக்கு அன்பு நன்றிகள் நியாஸ்...

எஸ்.அஸ்லி · எஸ்.அஸ்லி Tue Jul 20, 2010 11:15 pm

மரங்களை இழந்த பறவைகளும்
தங்களது மொழியினை மறந்தபடி
பறந்து கொண்டிருக்கிறது
மௌனத்தை சுமந்தபடி.
அருமையான அர்த்தமுள்ள வரிகள் வாழ்த்துக்கள். மௌனம் சுமக்கும் பறவைகள் 677196