தனியார் பள்ளிகள் மேல்முறையீடு: கல்விகட்டணம் அறிவிப்பு 3 நாளில் வெளியாகிறது

தனியார் பள்ளிகள் கல்வி கட்டணம் நிர்ணயம் செய்வது குறித்து ஓய்வு பெற்ற நீதிபதி கோவிந்தராஜன் தலைமையில் கமிட்டி அமைக்கப்பட்டது. இந்த குழு ஒவ்வொரு பள்ளிகளும் தந்த தகவலின் அடிப்படையில் கல்வி கட்டணம் நிர்ணயம் செய்தது.

அரசு நிர்ணயித்த கல்வி கட்டணத்தை தனியார் பள்ளிகள் ஏற்கவில்லை. கட்டணத்தை உயர்த்தி நிர்ணயிக்க வேண்டும் என்று கோவிந்தராஜன் கமிட்டிக்கு மேல்முறையீடு செய்தன. சுமார் 5500 தனியார் பள்ளிகள் மேல் முறையீடு செய்தன. இந்த மனுக்களை நீதிபதி கோவிந்தராஜன் தலைமையிலான அலுவலர் கள் ஆய்வு செய்தனர். ஒருமாதத்திற்கும் மேலாக ஒவ்வொரு பள்ளியும் தந்த தகவல்களை தணிக்கை அதிகாரிகளை கொண்டு ஆய்வு செய்தனர்.

இதுகுறித்து நீதிபதி கோவிந்தராஜன் கூறுகையில், கல்வி கட்டணம் நிர்ணயம் தொடர்பான பள்ளிகளின் மேல் முறையீடுகளை ஆய்வு செய்யும் பணிகள் இன்னும் மூன்று நாட்களில் முடிந்துவிடும். அதன்பின்னர் இறுதி முடிவு உடனே அறிவிக்கப்படும் என்றார்.

கட்டணத்தை உயர்த்தி நிர்ணயிக்க வேண்டும் என்று மனு செய்த பெரும்பாலான பள்ளிகளின் கட்டணம் உயருகிறது. முறையான ஆதாரங்களுடன் தணிக்கை சான்றுடன் சமர்பிக்கப்பட்ட மனுக்களுக்கு கட்டணம் உயரும். எந்த கட்டமைப்பு வசதியும் இல்லாத பள்ளிகளும் ஏற்கனவே நிர்ணயிக்கப்பட்ட கட்டணத்தில் மாற்றம் இருக்காது.

இதற்கிடையில் அதிக கட்டணம் வசுலித்ததாக 8 தனியார் பள்ளிகளுக்கு மெட்ரிக் பள்ளி இயக்குனரகம் நோட்டீஸ் அனுப்பியுள்ளது. இந்த பள்ளிகள் கூடுதல் கட்டணம் வசூலிப்பது உறுதி செய்யப்பட்டு நடவடிக்கை எடுக்குமாறு கோவிந்தராஜன் கமிட்டி இயக்குனருக்கு அனுப்பியது.

ஆனாலும் இதுவரை எந்த நடவடிக்கையும் எடுக்கப்படவில்லை. இதனால் புகார் கொடுத்த பெற்றோர்கள் ஏமாற்றத்தில் உள்ளனர்