மாயமான சார்லி சாப்ளின் திரைப்படம் கண்டுபிடிப்பு!

கிட்டத்தட்ட ஒரு நூற்றாண்டுக்கு முன் தயாரிக்கப்பட்டு மாயமாகிப் போன சார்லி சாப்ளின் நகைச்சுவை திரைப்படம் ஒன்று கண்டறியப்பட்டுள்ளது. சார்லின் சாப்ளின் காவல்துறை அதிகாரியாக நடித்துள்ள அத்திரைப்படம் டிவிடியாக மாற்றப்பட்டு விற்பனைக்கு வருகிறது.
உலகப் புகழ்பெற்ற நகைச்சுவை நடிகர் சார்லின் சாப்ளின் ஊமைப்பட காலத்தில் ஏராளமான படங்களைத் தயாரித்து, நடித்தவர். கசப்பான எத்தனையோ கருத்துகளை தன்னுடைய நகைச்சுவையால் மென்மையாகச் சுட்டிக்காட்டியவர். அவருடைய நகைச்சுவை நடிப்பு, இன்றைய தலைமுறையையும் சிரிக்க வைப்பதுதான் அவருடைய சாதனை.

அவர் 1914 இல் கோமாளி போலீசாக நடித்தப் படம் A Thief Catcher. பரவலாக ரசிக்கப்பட்ட இந்த பத்து நிமிட படத்தின் திரைச்சுருள் காணாமல் போய்விட்டது. அது எங்கிருக்கிறது என்றே இத்தனை வருடங்கள் தெரியாமல் இருந்தது.

இந்நிலையில், இத்திரைப்படத்தின் திரைச்சுருள் தற்போது கிடைத்துவிட்டது. மிக்சிகன் நகரில் நடந்த பழங்காலப் பொருட்கள் கண்காட்சியில் படத்தின் திரைச்சுருள் கிடைத்தது.

பால் கியூரிக்கி என்பவர் வாங்கிய பெட்டியின் மேல் 'கீ ஸ்டோன்' என்று எழுதப்பட்டிருந்தது. 'கீஸ்டோன் 'காப்ஸ்' என்ற பெயரில் போலீஸ்காரர்களைக் கிண்டலடித்து நிறைய படங்கள் வந்திருப்பதால், அந்தப் பெட்டியில் இருப்பது அந்த வகை படம் என்று பார்க்காமலேயே விட்டுவிட்டார் பால் கியூரிக்கி.

பல மாதங்களுக்குப் பிறகு பெட்டியில் இருந்த திரைச்சுருளை எடுத்து திரையிட்டு பார்த்தவர் ஆனந்த அதிர்ச்சியில் உறைந்து போனார். அது சார்லி சாப்ளின் நடித்த A Thief Catcher என்ற விவரம் தெரிய வந்ததும் சந்தோஷத்தில் திக்குமுக்காடிப் போனார்.

கீஸ்டோன் தொடர் திரைப்படங்களைத் தயாரித்த சென்னட் என்பவர், தன்னுடைய படங்களில் நடிக்க சார்லின் சாப்ளினை ஒப்பந்தம் செய்துள்ளார். அப்போது தயாரித்ததுதான் A Thief Catcher திரைப்படம்.

1914 ஆம் ஆண்டு முதல் 1976 ஆம் ஆண்டு வரை சார்லி சாப்ளின் ஏகப்பட்ட திரைப்படங்களில் நடித்தார். அவருடைய சினிமா வரலாற்றிலும் சரி, அவரைப் பற்றிய பிரிட்டீஷ் திரைப்படக் கல்லூரியின் பட்டியலிலும் சரி, இப்போது கிடைத்துள்ள A Thief Catcher படம் இடம் பெறவில்லை. கடந்த 60 ஆண்டுகளாக திருத்தப்படாத சார்லி சாப்ளின் திரைப்பட வரலாறு A Thief Catcher படத்தால் திருத்தி அமைக்கப்படுகிறது. ஆமாம் தற்போது கிடைத்துள்ள படத்தால் சார்லி சாப்ளினின் திரைப்பட எண்ணிக்கை 82 ஆக உயர்ந்துள்ளது.

காணாமல் போய் தற்போது கிடைத்துள்ள சார்லி சாப்ளினின் படத்தோடு ஹாலிவுட்டில் தயாரிக்கப்பட்டுள்ள 75 படங்களின் திரைச்சுருள்கள் எங்கே போனது என்றே இதுவரை தெரியவில்லை. ஆஸ்கார் விருது பெற்ற இயக்குநரான ஜான் போர்டு 1927 இல் இயக்கிய காதல் திரைப்படமான 'அப்ஸ்ட்ரீம்' என்ற திரைப்படத்தின் சுருள் சமீபத்தில் நியூசிலாந்து நாட்டில் கிடைத்தது குறிப்பிடத்தக்கது.